WUF13 Səhnəsində Azərbaycanın səsi

Bakı:

26 °C

47 %

7 m/s

Əlaqə

AZ RU EN

Ana səhifə / YAP xəbərləri / WUF13 Səhnəsində Azərbaycanın səsi

WUF13 Səhnəsində Azərbaycanın səsi

20.05.2026 [11:17]

Bakıda keçirilən WUF13 – 13-cü Ümumdünya Şəhərsalma Forumu Azərbaycanın beynəlxalq əməkdaşlıq və dayanıqlı inkişaf sahəsində artan rolunu nümayiş etdirən mühüm hadisə oldu. Dünyanın müxtəlif ölkələrindən dövlət nümayəndələri, ekspertlər, memarlar və şəhərsalma üzrə mütəxəssislər bu forumda bir araya gələrək gələcəyin şəhərlərinin necə qurulmalı olduğunu müzakirə etdilər. Forumun açılış mərasimində çıxış edən Prezident Ilham Əliyev bildirdi ki, Bakının belə mötəbər tədbirə ev sahibliyi etməsi Azərbaycanın beynəlxalq nüfuzunun və ölkəmizə göstərilən etimadın aydın göstəricisidir.

Dövlət başçısı vurğuladı ki, şəhərlər yalnız yaşayış məntəqələri deyil, insanların həyat keyfiyyətini müəyyən edən əsas sosial və iqtisadi mərkəzlərdir. Müasir şəhərsalma insanların rahatlığına, təhlükəsizliyinə, ekoloji tarazlığa və texnoloji yeniliklərə əsaslanmalıdır. Prezident İlham Əliyevin sözlərinə görə, düzgün planlaşdırılmış şəhərlər həm iqtisadi inkişafı sürətləndirir, həm də vətəndaşların rifahını yüksəldir.

Çıxış zamanı Azərbaycanın son illərdə həyata keçirdiyi genişmiqyaslı quruculuq və abadlıq işlərindən bəhs edildi. Xüsusilə Bakı şəhərində yaradılan yeni parklar, yollar, nəqliyyat layihələri və sosial infrastruktur ölkənin müasir inkişaf modelinin nümunəsi kimi təqdim olundu. Prezident qeyd etdi ki, bu layihələrin əsas məqsədi insanların daha rahat və sağlam mühitdə yaşamasını təmin etməkdir.

Dövlət başçısı azad edilmiş ərazilərdə həyata keçirilən yenidənqurma prosesinə xüsusi diqqət çəkdi. O bildirdi ki, həmin torpaqlarda şəhər və kəndlər sıfırdan qurulur, ən müasir texnologiyalar tətbiq olunur və “ağıllı şəhər”, “ağıllı kənd” konsepsiyaları əsasında yeni yaşayış məntəqələri yaradılır. Yaşıl enerji zonalarının formalaşdırılması, günəş və külək enerjisindən istifadə, ekoloji təmiz nəqliyyat sistemlərinin qurulması Azərbaycanın gələcəyə hesablanmış siyasətinin əsas istiqamətlərindəndir.

Prezident İlham Əliyev beynəlxalq əməkdaşlığın vacibliyini də xüsusi vurğuladı. O qeyd etdi ki, urbanizasiya ilə bağlı problemlər təkcə bir ölkənin deyil, bütün dünyanın ortaq çağırışlarıdır. Əhalinin artması, iqlim dəyişiklikləri, resurslardan səmərəli istifadə və sosial bərabərliyin qorunması kimi məsələlər yalnız birgə fəaliyyət nəticəsində həll oluna bilər. WUF13 məhz bu məqsədlə ölkələr arasında təcrübə mübadiləsi və əməkdaşlıq üçün mühüm platforma rolunu oynayır.

Çıxışında dövlət başçısı Azərbaycanın dayanıqlı inkişaf məqsədlərinə sadiqliyini bir daha bəyan etdi. O bildirdi ki, ölkəmiz müasir texnologiyaların tətbiqi, ekoloji mühitin qorunması və insanların rifahının yüksəldilməsi istiqamətində ardıcıl addımlar atır. Azərbaycanın şəhərsalma sahəsində topladığı təcrübə beynəlxalq səviyyədə maraq doğurur və digər ölkələrlə bölüşülür.

Prezident İlham Əliyevin WUF13-də səsləndirdiyi fikirlər Azərbaycanın gələcəyə yönəlmiş inkişaf strategiyasını aydın şəkildə ortaya qoydu. Bu çıxış bir daha göstərdi ki, ölkəmiz təkcə regionun deyil, həm də dünyanın dayanıqlı inkişaf təşəbbüslərində fəal iştirak edir. Bakının bu mötəbər forumu uğurla təşkil etməsi Azərbaycanın qlobal dialoqa verdiyi töhfənin və beynəlxalq nüfuzunun parlaq ifadəsinə çevrildi.

Vüqar Həsənli

YAP Şahbuz rayon təşkilatının məsləhətçisi

Paylaş:

Baxılıb: 365 dəfə