Enerji strategiyası: milli maraqlar və beynəlxalq tərəfdaşlıq

Bakı:

24 °C

60 %

3 m/s

Əlaqə

AZ RU EN

Ana səhifə / YAP xəbərləri / Enerji strategiyası: milli maraqlar və beynəlxalq tərəfdaşlıq

Enerji strategiyası: milli maraqlar və beynəlxalq tərəfdaşlıq

03.06.2026 [11:34]

İyunun 1-də Bakı Ekspo Mərkəzində Bakı Enerji Həftəsinin rəsmi açılış mərasimi keçirilib. Tədbir çərçivəsində 31-ci Beynəlxalq Xəzər Neft və Qaz Sərgisi “Caspian Oil and Gas”, 14-cü Xəzər Beynəlxalq Təmiz Enerji Sərgisi “Caspian Power” və 31-ci “Baku Energy Forum” fəaliyyətə başlayıb. Azərbaycan Respublikasının Prezidenti İlham Əliyev açılış mərasimində iştirak edərək proqram xarakterli çıxış edib. Artıq uzun illərdir keçirilən Bakı Enerji Həftəsi dünyanın enerji sektorunda mühüm hadisələrdən biri hesab olunur. Hər il müxtəlif ölkələrdən dövlət rəsmilərini, enerji şirkətlərinin nümayəndələrini, investorları və ekspertləri bir araya gətirən bu platforma enerji sahəsində əməkdaşlığın genişlənməsinə və yeni təşəbbüslərin müzakirəsinə geniş imkan yaradır.

Prezident İlham Əliyev çıxışında Azərbaycanın enerji sahəsində əldə etdiyi nailiyyətlərə toxunaraq bildirib ki, ölkəmiz beynəlxalq enerji bazarında etibarlı tərəfdaş kimi tanınır. Dövlət başçısı Azərbaycanın Avropanın enerji təhlükəsizliyinin təmin olunmasına verdiyi töhfələri xüsusi vurğulayıb və bu istiqamətdə həyata keçirilən layihələrin əhəmiyyətindən danışıb. Tədbirdə diqqət çəkən məqamlardan biri də bərpaolunan enerji sahəsində görülən işlər olub. Son illərdə günəş və külək enerjisi üzrə həyata keçirilən layihələr Azərbaycanın enerji siyasətində yeni mərhələnin başlanmasından xəbər verir. Xüsusilə Qarabağ və Şərqi Zəngəzur iqtisadi rayonlarında həyata keçirilən yaşıl enerji layihələri ölkənin bu sahədəki inkişafını aydın şəkildə nümayiş etdirir.

“Caspian Oil and Gas” sərgisi neft-qaz sənayesində tətbiq olunan müasir texnologiyaların təqdimatı baxımından maraqla qarşılanıb. “Caspian Power” sərgisi isə təmiz enerji və enerji səmərəliliyi sahəsində yenilikləri nümayiş etdirmək üçün əlverişli imkan yaradıb. Eyni zamanda, “Baku Energy Forum” çərçivəsində keçirilən panel müzakirələrdə enerji bazarlarının gələcəyi, yaşıl keçid və beynəlxalq əməkdaşlığın perspektivləri geniş şəkildə müzakirə olunub.

Bakı Enerji Həftəsi bir daha göstərdi ki, Azərbaycan təkcə enerji resurslarına malik ölkə deyil, həm də qlobal enerji dialoqunun aparıldığı mühüm mərkəzlərdən biridir. Bu cür tədbirlər ölkəmizin beynəlxalq nüfuzunun möhkəmlənməsinə, yeni tərəfdaşlıqların qurulmasına və enerji sahəsində qarşıya qoyulan strateji hədəflərin reallaşdırılmasına əlavə töhfə verir.

Azərbaycanın iştirakçısı olduğu enerji layihələri həm iqtisadi inkişafın sürətlənməsinə, həm də regionda əməkdaşlıq və sabitliyin möhkəmlənməsinə xidmət edir. Bakı Enerji Həftəsi isə bu uğurların nümayiş olunduğu və gələcək perspektivlərin müzakirə edildiyi ən mühüm beynəlxalq platformalardan biri kimi öz əhəmiyyətini qoruyub saxlayır.

Araz Xudadanov

YAP Sabunçu rayon təşkilatının sədri

Paylaş:

Baxılıb: 341 dəfə