27 Sentyabr – tarixi Zəfərə aparan yolun başlanğıcı

Bakı:

25 °C

73 %

11 m/s

Əlaqə

AZ RU EN

Ana səhifə / YAP xəbərləri / 27 Sentyabr – tarixi Zəfərə aparan yolun başlanğıcı

27 Sentyabr – tarixi Zəfərə aparan yolun başlanğıcı

25.09.2026 [12:36]

Fəsli Nəbiyev

YAP Gənclər Birliyinin sədr müavini

27 Sentyabr Azərbaycan xalqının müasir tarixində xüsusi yer tutan, milli yaddaşımızda qəhrəmanlıq, birlik və Vətənə sədaqət rəmzi kimi yaşayan tarixdir. 2020-ci ilin həmin günündə Ermənistan silahlı qüvvələrinin növbəti hərbi təxribatına cavab olaraq Azərbaycan Ordusunun başladığı əks-hücum əməliyyatları 44 günlük Vətən müharibəsinə və nəticə etibarilə Azərbaycanın tarixi Zəfərinə gətirib çıxardı.

Bu tarixi hadisələrin mərkəzində Prezident, Müzəffər Ali Baş Komandan İlham Əliyevin rəhbərliyi ilə həyata keçirilən dövlət siyasəti, Azərbaycan Ordusunun gücü və xalqımızın milli birliyi dayanırdı.

2020-ci il sentyabrın 27-də xalqa müraciət edən Prezident İlham Əliyev Ermənistan silahlı qüvvələrinin Azərbaycanın yaşayış məntəqələrini və hərbi mövqelərini atəşə tutduğunu bildirmiş, şəhidlərimizin qanının yerdə qalmayacağını bəyan etmişdi. Həmin gün Azərbaycan Ordusu düşmənin hərbi təxribatının qarşısını almaq üçün əks-hücum əməliyyatlarına başladı.

Sonrakı hadisələr dövlət başçısının bu mövqeyinin konkret siyasi və hərbi nəticələrlə tamamlandığını göstərdi.

Qəti siyasi iradənin nəticəsi

Vətən müharibəsinə aparan yol yalnız 2020-ci ilin sentyabrında baş verən hadisələrlə məhdudlaşmırdı. Azərbaycan təxminən 30 il ərzində Ermənistanın işğalı nəticəsində yaranmış münaqişənin sülh yolu ilə və beynəlxalq hüquq çərçivəsində həllinə çalışmışdı. BMT Təhlükəsizlik Şurasının 822, 853, 874 və 884 saylı qətnamələrinin uzun illər icrasız qalması, danışıqlar prosesinin nəticə verməməsi və Ermənistan tərəfindən hərbi təxribatların davam etdirilməsi mövcud vəziyyətin dəyişməsinə imkan vermirdi.

Prezident İlham Əliyev bu illər ərzində Azərbaycanın ərazi bütövlüyünün danışıqların əsas predmeti olmadığını, ölkəmizin öz torpaqlarında ikinci erməni dövlətinin yaradılmasına imkan verməyəcəyini müxtəlif çıxışlarında dəfələrlə ifadə etmişdi.

Eyni zamanda, həmin dövr Azərbaycanın iqtisadi və hərbi imkanlarının ardıcıl şəkildə gücləndirildiyi mərhələ idi. Güclü dövlət institutlarının formalaşdırılması, ordunun müasir tələblərə uyğun qurulması və Azərbaycanın beynəlxalq mövqelərinin möhkəmləndirilməsi qarşıya qoyulan milli məqsədlərin həyata keçirilməsi üçün mühüm zəmin yaratdı.

2020-ci il sentyabrın 27-də isə Prezident, Ali Baş Komandan İlham Əliyevin əmri ilə Azərbaycan Ordusu genişmiqyaslı əks-hücum əməliyyatına başladı. Dövlət başçısı bir il sonra Anım Günü ilə əlaqədar xalqa müraciətində bu barədə deyirdi: “Mənim əmrimlə Azərbaycan Ordusu bu qanlı cinayətə cavab olaraq genişmiqyaslı əks-hücum əməliyyatına başlamış” və 44 günlük müharibədə Qələbə qazanmışdır.

44 gün ərzində dəyişən hərbi-siyasi reallıq

Azərbaycan Ordusu Vətən müharibəsi zamanı Cəbrayıl, Füzuli, Zəngilan, Qubadlı və Şuşa şəhərləri də daxil olmaqla yüzlərlə yaşayış məntəqəsini işğaldan azad etdi. Şuşanın azad olunması müharibənin gedişində həlledici mərhələlərdən biri oldu.

Döyüş meydanında qazanılmış üstünlük siyasi müstəvidə də Azərbaycanın mövqeyini əsaslı şəkildə dəyişdirdi. 10 noyabr 2020-ci il tarixli üçtərəfli Bəyanatdan sonra Ağdam, Kəlbəcər və Laçın rayonları Azərbaycana qaytarıldı.

Bu nəticə təsadüfi deyildi. Prezident İlham Əliyevin rəhbərliyi ilə həyata keçirilmiş siyasətin mühüm xüsusiyyətlərindən biri hərbi, siyasi və diplomatik imkanların vahid dövlət məqsədi ətrafında səfərbər olunması idi.

44 günlük müharibə günlərində Prezident İlham Əliyevin Azərbaycan və xarici media vasitəsilə etdiyi çıxışlar da Azərbaycanın mövqeyinin beynəlxalq ictimaiyyətə çatdırılmasında mühüm rol oynayırdı. Dövlət başçısı Azərbaycanın mübarizəsinin ölkənin ərazi bütövlüyünün bərpasına yönəldiyini bildirir, beynəlxalq hüquqa və BMT Təhlükəsizlik Şurasının müvafiq qətnamələrinə istinad edirdi.

Prezident–Ordu–xalq birliyi

Vətən müharibəsi Azərbaycan cəmiyyətində milli həmrəyliyin yüksək səviyyəsini nümayiş etdirdi. Müharibə günlərində Azərbaycan Ordusunun arxasında bütöv xalq dayanmışdı.

Prezident İlham Əliyevin çıxışlarında dəfələrlə vurğulanan “dəmir yumruq” məhz dövlətin, Ordunun və xalqın vahid məqsəd ətrafında birliyini ifadə edən siyasi və ictimai rəmzə çevrildi.

Bu birlik 44 gün ərzində Azərbaycan cəmiyyətinin əsas güc mənbələrindən biri oldu. Siyasi mənsubiyyətindən, sosial vəziyyətindən və yaşadığı bölgədən asılı olmayaraq insanların ərazi bütövlüyünün bərpası məqsədi ətrafında birləşməsi milli həmrəyliyin real nümunəsini yaratdı.

Müharibənin yekunlarını qiymətləndirərkən Prezident İlham Əliyev də Qələbənin əsas mənbələrindən biri kimi Azərbaycan xalqının iradəsini və Ordunun qəhrəmanlığını önə çəkib. Dövlət başçısının vurğuladığı kimi, Qələbəni təmin edən qəhrəman əsgər və zabitlərin şücaəti və fədakarlığı Azərbaycan tarixinin ayrılmaz hissəsinə çevrilib.

Şəhidlərin xatirəsinə dövlət səviyyəsində ehtiram

Tarixi Zəfərin qazanılmasında ən böyük fədakarlığı Vətən uğrunda həyatını fəda edən şəhidlərimiz göstərdilər.

Prezident İlham Əliyevin 2020-ci il 2 dekabr tarixli Sərəncamı ilə sentyabrın 27-si Azərbaycan Respublikasında Anım Günü kimi təsis edildi. Sərəncamda bu qərarın Vətən müharibəsində qəhrəmancasına döyüşmüş, Azərbaycan Bayrağını işğaldan azad olunan torpaqlarda dalğalandırmış və ölkənin ərazi bütövlüyü yolunda canından keçmiş bütün şəhidlərimizə dərin ehtiramın ifadəsi olduğu göstərilir.

Prezident İlham Əliyevin şəhidlərimizin xatirəsinə münasibətində ardıcıl bir mövqe xüsusi diqqət çəkir. Dövlət başçısı 2021-ci ildə Anım Günü ilə bağlı müraciətində Birinci və İkinci Qarabağ müharibələrinin şəhidlərinin Azərbaycan xalqının qəlbində əbədi yaşayacağını bildirərək, ölkəmizin Qələbəni məhz onların qəhrəmanlığı və fədakarlığı sayəsində qazandığını vurğulamışdı.

2022-ci il sentyabrın 27-də Füzuli rayonunda çıxışı zamanı Prezident İlham Əliyev yenidən şəhidlərin Vətən və torpaq uğrunda canlarını fəda etdiklərini, xalqımızın öz şəhidləri və qəhrəman əsgər-zabitləri ilə fəxr etdiyini bildirib.

Bu münasibət yalnız mənəvi ehtiramla məhdudlaşmır. Şəhid ailələrinin və qazilərin sosial müdafiəsi, mənzil və digər sosial təminat proqramları, yaralanmış hərbçilərin müalicəsi və reabilitasiyası dövlət siyasətinin mühüm istiqamətlərindən biri kimi müəyyən edilib. Prezident İlham Əliyev şəhid ailələrinə qayğını dövlətin və şəxsən Prezidentin borcu kimi səciyyələndirib.

Anım Günündən Zəfər salnaməsinə

27 Sentyabrın Azərbaycan tarixində tutduğu yer illər keçdikcə daha dolğun məna qazanır.

2020-ci ildə həmin tarix ərazi bütövlüyümüzün bərpası uğrunda həlledici mübarizənin başlanğıcı oldu. 44 günlük Vətən müharibəsinin nəticəsində Azərbaycan öz torpaqlarının böyük hissəsini hərbi yolla azad etdi, digər ərazilərin qaytarılmasına nail oldu və regionda yeni siyasi reallıq formalaşdı.

Sonrakı mərhələdə Azərbaycanın bütün ərazisində dövlət suverenliyinin təmin olunması bu tarixi prosesin davamı oldu.

Bu baxımdan 27 Sentyabr yalnız keçmişin xatırlanması deyil. Bu tarix Azərbaycanın hansı mərhələlərdən keçərək bugünkü mövqeyinə çatdığını göstərən mühüm siyasi və tarixi istinad nöqtəsidir.

Prezident İlham Əliyevin rəhbərliyi ilə həyata keçirilən dövlət siyasəti, Azərbaycan Ordusunun qəhrəmanlığı və xalqımızın milli birliyi nəticəsində uzun illər davam etmiş işğala son qoyuldu. Bununla yanaşı, qazanılmış hər bir nəticənin təməlində şəhidlərimizin fədakarlığının dayandığı heç zaman unudulmur.

Məhz buna görə də 27 Sentyabr – Anım Günü Azərbaycanın tarixi Zəfərinin başlanğıcını, dövlətin siyasi iradəsini, xalqın birliyini və şəhidlərimizin əbədi xatirəsini özündə birləşdirən xüsusi tarixdir.

Prezident İlham Əliyevin sözləri ilə desək: “Bu Qələbəni bizə bəxş edən qəhrəman əsgər və zabitlərimiz bizim qürur mənbəyimizdir.”

Paylaş:

Baxılıb: 105 dəfə