YAP gəncliyin inkişafı üçün uğurlu layihələr həyata keçirir

Bakı:

17°C

67%

5m/s

Əlaqə

AZ RU EN

Ana səhifə / YAP xəbərləri / YAP gəncliyin inkişafı üçün uğurlu layihələr həyata keçirir

YAP gəncliyin inkişafı üçün uğurlu layihələr həyata keçirir

17.05.2016 [10:10]

YAP-ın təqaüdçüsü Nigar Abdullayeva: Mən Yeni Azərbaycan Partiyasının üzvü olduğum üçün qürur duyuram
Azərbaycanın sürətli inkişafı, ölkəmizin ictimai həyatın bütün sahələrində əldə etdiyi nailiyyətlər dövlət gənclər siyasətində də özünü bariz şəkildə göstərir. Prezident İlham Əliyevin Fərman və sərəncamları ilə bir sıra sahələr üzrə gənc kadrların məsul dövlət vəzifələrinə təyin olunması, dövlət quruculuğunda gənclərin iştirakına şərait yaradılması, gənc ailələrə kömək göstərilməsi, qaçqın və məcburi köçkün ailələrindən olan yeniyetmə və gənclərin sosial problemlərinin həlli, gənclərin hərbi vətənpərvərlik tərbiyəsi dövlət gənclər siyasətinin əsasını təşkil edir. Tələbə gənclərin təqaüdlərinin artırılması, ali və orta ixtisas təhsil müəssisələrinin maddi-texniki bazasının möhkəmləndirilməsi və dövlətin çox böyük maddi və mənəvi dəstəyi hesabına 10 mindən artıq azərbaycanlı gəncin dünyanın aparıcı ali təhsil müəssisələrində müasir elmin sirlərinə yiyələnməsi Azərbaycanın gələcəyi olan gənclərin inkişafı üçün yaradılan yüksək şəraitin və diqqətin nəticəsidir. Eyni zamanda, bu gün ölkəmizin inkişafında özünəməxsus rolu olan Yeni Azərbaycan Partiyası (YAP) da gəncliyin inkişafına xüsusi diqqət yetirir.
Qeyd etmək lazımdır ki, YAP gənclərlə bağlı bir sıra layihələrin də müəllifidir və bu layihələr vasitəsilə gənclərimizə diqqət göstərilir, fəal gənclərin üzə çıxarılıb onların potensialından səmərəli istifadə olunması yönündə addımlar atılır. Partiyamız sosial-mədəni həyatın əsas sahələrinin - elmin, təhsilin və mədəniyyətin inkişafının, gənc nəslin tərbiyəsinin ümumxalq və ümumdövlət işi səviyyəsinə qaldırılması istiqamətində həyata keçirilən dövlət siyasətinə yaxından dəstək göstərir.
Bütün sadalanan prinsiplərə hər zaman sadiqliyini nümayiş etdirən Yeni Azərbaycan Partiyasının təşəbbüsü və təşkilatçılığı ilə keçirilən və artıq ənənə halını almış, məktəblilər arasında “Heydər Əliyev məktəblilərin gözü ilə” ümumrespublika inşa müsabiqəsi xüsusi diqqət cəlb edir. Qeyd edək ki, bu layihənin əsası 2007-ci ildə Yeni Azərbaycan Partiyası, Təhsil Nazirliyi və Azərbaycan Həmkarlar İttifaqları Konfederasiyası tərəfindən qoyulub. Heydər Əliyev Fondu da bu layihəyə qoşularaq gəncliyin inkişafına öz töhfələrini verməkdədir. Həmin müsabiqənin qalibləri Ulu öndərin doğum günü ərəfəsində keçirilən təntənəli mərasim zamanı mükafatlandırılırlar. Həmin mükafatlandırmadan başqa, YAP bəyan edib ki, əgər müsabiqənin qalibləri ali məktəblərə qəbul olub tələbə adını qazanarlarsa, onlara ali təhsillərini bitirənədək təqaüd veriləcək. Artıq YAP-ın təqaüdünü alanların sayı 43 nəfərdir və onlardan ali məktəbləri başa vuranlar da var. Tələbə-gənclərə təqaüdlərin verilməsi bir daha Yeni Azərbaycan Partiyasının gənc nəslin inkişafına göstərdiyi qayğının təcəssümüdür. Bu təqaüdü alan gənclər də YAP tərəfindən belə təşəbbüslərin həyata keçirilməsindən qürur duyduqlarını bildiriblər.
Onlardan biri Nigar Əfras qızı Abdullayevadır. N.Abdullayeva 1992-ci ilin oktyabr ayında Şirvan şəhərində dünyaya gəlib və orta təhsilini də 2 saylı şəhər orta məktəbində alıb. O həm 8-ci, həm də 9-cu siniflərdə oxuyarkən “Heydər Əliyev məktəblilərin gözü ilə” inşa müsabiqəsində iştirak edib. Nigarın yazıları münsiflər heyəti tərəfindən yüksək qiymətləndirilib və o, iştirak etdiyi hər iki müsabiqədə də respublika üzrə birincilik əldə edib. 2010-cu ildə qəbul imtahanlarında 650 bal toplayan N.Abdullayeva Azərbaycan Tibb Universitetinin müalicə-profilaktika fakültəsinə daxil olub. Hazırda bu ali məktəbin sonuncu - 6-cı kursunda təhsil alan Nigar YAP-ın verdiyi təqaüddən də bəhrələnir. “Ali məktəbə daxil olduqdan sonra təqaüdlə bağlı Yeni Azərbaycan Partiyasına müraciət etdim. Müraciətimə dərhal cavab verildi və mən o zamandan bu təqaüdü alıram. Təqaüd bir tələbə olaraq mənim sosial xərclərimə çox kömək edir. Eyni zamanda, onun mənəvi cəhətdən də dəyəri böyükdür. Çünki bu təqaüd Ulu öndərimiz Heydər Əliyevin qurucusu olduğu və Prezident İlham Əliyevin rəhbərlik etdiyi partiya tərəfindən verilir”, - deyə YAP-ın təqaüdçüsü vurğulayıb.
YAP-ın bu cür layihələrinin gənclərin elm və təhsilə marağını artırdığını deyən N.Abdullayeva partiyanın gənclər siyasətinin böyük əhəmiyyət kəsb etdiyini bildirib. O, partiyanın üzvü olmaqdan da qürur duyduğunu deyib: “18 yaşım tamam olandan sonra, universitetin 1-ci kursunda təhsil alarkən, YAP-a üzv olmaq üçün müraciət etdim və müraciətim qəbul olundu. Mən Yeni Azərbaycan Partiyasının üzvü olduğum üçün qürur duyuram. Çünki bu partiyanın qurucusu Ümummilli liderimiz Heydər Əliyevdir. Və bu gün Prezident İlham Əliyevin rəhbərlik etdiyi Yeni Azərbaycan Partiyası gəncliyin inkişafına xüsusi diqqət yetirir”.
Nardar BAYRAMLI

Paylaş:

Baxılıb: 861 dəfə