Tərtərdə şəhid ailələri və Vətən müharibəsi iştirakçılarına orden və medallar təqdim olunub

Bakı:

25 °C

73 %

8 m/s

AZ RU EN

Ana səhifə / YAP xəbərləri / Tərtərdə şəhid ailələri və Vətən müharibəsi iştirakçılarına orden və medallar təqdim olunub

Tərtərdə şəhid ailələri və Vətən müharibəsi iştirakçılarına orden və medallar təqdim olunub

01.07.2021 [09:22]

Prezident, Müzəffər Ali Baş Komandan İlham Əliyevin müvafiq sərəncamlarına əsasən, ərazilərimizin işğaldan azad olunması uğrunda aparılan hərbi əməliyyatlarda iştirak edərək igidlik və şücaət göstərmiş, vəzifə borcunu ləyaqətlə və vicdanla, döyüş tapşırıqlarını uğurla yerinə yetirərək Vətən müharibəsi zamanı şəhidlik zirvəsinə yüksəlmiş tərtərli igidlərin ailələrinə və Vətən müharibəsi iştirakçılarına orden və medalların təqdimetmə mərasimi keçirilib.
Tərtər Rayon İcra Hakimiyyətinin, YAP Tərtər rayon təşkilatının üzvləri, hüquq-mühafizə orqanlarının rəhbərləri, şəhidlərin ailə üzvləri, qazilər, Qarabağ müharibəsi veteranları və ictimaiyyət nümayəndələrinin iştirak etdiyi tədbirdə əvvəlcə “Şəhidlər” abidə kompleksi ziyarət edilib, abidə önünə gül dəstələri düzülüb. Heydər Əliyev adına Mədəniyyət və İstirahət Parkında davam edən tədbiri Tərtər rayon İcra Hakimiyyətinin başçısı Müstəqim Məmmədov giriş sözü ilə açaraq şəhidlərimizin döyüş yoluna nəzər salıb, onların əsl vətənpərvər, qorxmaz, cəsur və yüksək nizam-intizamlı hərbçi olduqlarını bildirib.
Qeyd edilib ki, ölkəmizin ərazi bütövlüyü uğrunda canlarından keçən şəhidlərimiz heç vaxt unudulmayacaq, onların əziz xatirəsi qəlbimizdə daim yaşayacaq. Ölkəmizdə şəhid ailələrinə və qazilərə göstərilən diqqət və qayğı dövlət siyasətinin prioritet məsələlərindəndir. Bildirilib ki, xalqımızın “Dəmir yumruq” ətrafında sıx birləşməsi, Azərbaycan Ordusunun qüdrəti, gənclərimizin Vətən sevgisi, əsgərlərimizin döyüşlərdəki şücaəti, xalq və ordu birliyi sayəsində torpaqlarımız işğaldan azad edildi, tarixi ədalət bərpa olundu.
Tədbirdə çıxış edən Səfərbərlik və Hərbi Xidmətə Çağırış üzrə Dövlət Xidmətinin Tərtər Rayon Şöbəsinin rəisi Elşən Abdullayev ölkəmizdə ordu quruculuğu sahəsində aparılan islahatlardan bəhs edib.
Tədbirdə çıxış edən YAP Tərtər rayon təşkilatının sədri Ramiz Şabanov 26 İyun - Silahlı Qüvvələr Günü münasibətilə 44 günlük Vətən müharibəsində şəhidlik zirvəsinə ucalmış şəhidlərin valideynlərini, qaziləri təbrik edib. O, həmçinin Vətən müharibəsinin ən gənc qəhrəmanı, qazi Azər Abdullazadəyə YAP-a üzvlük vəsiqəsini və qiymətli hədiyyəni təqdim edib.
Tədbirdə Azərbaycan Prezidenti, Müzəffər Ali Baş Komandan İlham Əliyevin sərəncamları ilə təltif olunmuş 37 tərtərli şəhidin orden və medalları ailə üzvlərinə, 14 nəfər müharibə iştirakçısı və qazinin orden və medalları isə özlərinə təqdim olunub.
Şəhid ailələri və Vətən müharibəsi iştirakçıları onlara göstərilən dövlət qayğısına görə Prezident, Müzəffər Ali Baş Komandan İlham Əliyevə minnətdarlıqlarını bildiriblər.

Paylaş:

Baxılıb: 728 dəfə