Alternativsiz siyasət

Bakı:

12 °C

87 %

6 m/s

Əlaqə

AZ RU EN

Ana səhifə / YAP xəbərləri / Alternativsiz siyasət

Alternativsiz siyasət

21.07.2022 [17:15]

Vüqar İsayev

Yeni Azərbaycan Partiyası Göygöl rayon təşkilatının sədri

Bu gün ölkəmizin uğurlu inkişafı milli maraqlarımıza xidmət edən yeni-yeni regional və beynəlxalq layihələrin reallaşmasını zəruri edir və Azərbaycan heç kimdən asılı olmayan, öz müqəddəratını sərbəst həll etməyə qadir olan, müstəqil siyasət yürüdən güclü dövlətdir.

Prezident İlham Əliyev tərəfindən həyata keçirilən, xalqın iradəsinə və milli maraqlara söykənən dövlət siyasətinə alternativ yoxdur. Ölkə başçısının düşünülmüş siyasətinin, gələcəklə bağlı mükəmməl proqramların icrasının və xalq-iqtidar birliyinin nəticəsi olaraq Azərbaycan öz dinamik inkişafını davam etdirir, ölkə iqtisadiyyatı yüksələn xətlə irəliləyir, bütün istiqamətlərdə qarşıya qoyulan vəzifələr uğurla icra edilir. Müasir tarix Azərbaycanın bütün sahələrdə uğurlu inkişaf dövrü kimi xarakterizə olunur.

İyulun 15-də Azərbaycan Respublikasının Prezidenti İlham Əliyevin sədrliyi ilə keçirilmiş bu ilin altı ayının yekunlarına həsr olunan müşavirə zamanı səsləndirilən fikirlər deməyə əsas verir ki, müsbət nəticələr verən dərin iqtisadi islahatların aparılması, ixracın stimullaşdırılması və idxaldan asılılığın azaldılması, qeyri-neft sektorunun inkişafının sürətləndirilməsi və sənaye potensialının gücləndirilməsi sahəsində həyata keçirilən tədbirlər ölkəmizin gücünü və qüdrətini durmadan artırır.

Uğurla həyata keçirilən xarici siyasət istiqamətində önəmli addımlar atılır və ölkəmizin beynəlxalq nüfuzu günü-gündən yüksəlir. Dünya birliyi Azərbaycana böyük hörmətlə yanaşır, ölkəmizdə aparılan islahatlar dünyanın aparıcı iqtisadi mərkəzləri və maliyyə qurumları tərəfindən yüksək qiymətləndirirlir.

Azərbaycanın Qoşulmama Hərəkatına uğurla sədrlik etməsi və sədrliyimizin yekdil fikirlə 2023-cü ilə qədər artırılması onu göstərir ki, ölkəmiz 120 ölkə arasında çox böyük nüfuz qazanmışdır və bizə olan inam daha da artmışdır. Bu yaxınlarda İslam Əməkdaşlıq Təşkilatının yeni Baş katibinin Azərbaycana, eyni zamanda azad edilmiş torpaqlara Füzuliyə, Şuşaya səfər etməsi, erməni vəhşiliyinin təzahürlərini öz gözü ilə görməsi ölkəmizin ədalətli mövqeyini bir daha nümayiş etdirir.

Avropa İttifaqı ilə əməkdaşlığın aparılması, Türk Dövlətləri Təşkilatı çərçivəsində Azərbaycanın fəaliyyəti, Türkiyə, Qırğızıstan, Özbəkistan və Türkmənistan, eyni zamanda qonşu ölkələr Rusiya, İran, Gürcüstan dövlət başçıları ilə Prezident İlham Əliyevin görüşlərinin keçirilməsi Azərbaycan-Ermənistan münasibətlərinin normallaşması, enerji təhlükəsizliyi, nəqliyyat, energetika, digər sahələr üzrə fəal əməkdaşlığın genişləndirilməsinin ölkəmiz üçün əsas prioritetlərdən biri olduğunu və bu istiqamətdə vacib addımlar atıldığını göstərir. Eyni zamanda, Amerika-Azərbaycan əlaqələrinin inkişafı istiqamətində önəmli addımlar atılır. Bir sözlə, əsas güc mərkəzləri ilə yanaşı beynəlxalq təşkilatlarla əlaqələrimiz genişlənir. Onlar ölkəmizin öz sözünün sahibi olduğunu birmənalı şəkildə qəbul edirlər və verdiyi bütün vədlərə əməl etdiyinin şahidi olurlar.

Prezident İlham Əliyevin qeyd etdiyi kimi, bu ilin altı ayında Azərbaycan-Ermənistan əlaqələrinin normallaşdırılması istiqamətində müəyyən addımlar atılsa da, əfsuslar olsun ki, hələlik real nəticələr yoxdur. Sərhədlərin delimitasiyası üzrə işçi qrupların birinci görüşü keçirilsə də, bu istiqamətdə Ermənistan tərəfindən konkret addımlar atılmır. Müsbət hal ondan ibarətdir ki, Azərbaycanın təşəbbüsü ilə sülh müqaviləsinin əsasını təşkil edəcək beş əsas baza prinsipi Ermənistan tərəfindən rəsmən qəbul edilib. Lakin, Vətən müharibəsindən 1 il 8 ay ötməsinə baxmayaraq, Ermənistan 10 noyabr 2020-ci ildə imzalanmış Bəyannamədə təsbit edilən məsələlərdən boyun qaçırır və hələ də məcburən üzərinə götürdüyü öhdəliklərini yerinə yetirmir. Zəngəzur dəhlizinin açılması sahəsində də Ermənistan heç bir iş görmür. Ermənistan silahlı dəstələrinin Azərbaycan ərazisində qalması yolverilməzdir və təəssüf ki, bu məsələdə Rusiyanın da könkret mövqeyi hiss olunmur. Ermənistan qəti olaraq bilməlidir ki, biz öz tarixi torpaqlarımızın sahibiyik və öhdəliklərini yerinə yetirməsə 1920-ci ilin noyabrında bizdən qoparılmış dogma torpağımız olan Zəngəzurda və digər ərazilərimizdə sülhü bərqərar etmək üçün heç də bir daha 28 il gözləməyəcəyik.

Ötən dövr ərzində iqtisadiyyatın inkişafı ordu quruculuğuna öz müsbət təsirini göstərmiş, bu sahə daim dövlətin diqqət mərkəzində saxlanılmışdır. Azərbaycanın artıq güclü ordusu vardır, bu gün silahlı qüvvələrimiz ölkəmizin maraqlarını müdafiə etməyə qadirdir. Azərbaycanda çoxlu sayda silah-sursat istehsal olunur, ölkəmiz özünü təmin etməklə yanaşı, xarici ölkələrə də silah-sursat ixrac edir.Təlimlərlə bağlı ciddi addımlar atılıb. Yeni silahlı birləşmələr yaradılıb. Yeni kontraktlar imzalanıb, hərbi texnika, silah-sursatlar alınır və alınacaq. Biz ordu quruculuğu sahəsində öz işlərimizi davam etdiririk və bu il artan iqtisadi və maliyyə imkanlarımızın bir hissəsi məhz bu məsələlərə istiqamətləndirilib.

Hərbçilərin sosial müdafiəsi məsələləri də Azərbaycanda yüksək səviyyədə təmin edilir. Şəhid ailələri və müharibə əlilləri daim dövlət qayğısı ilə əhatə olunur, onlara dövlət tərəfindən mənzillər verilir. Keçən il 3 min mənzil və fərdi ev verilmişdir, bu il isə 1500 mənzil və ev verilir. Bütövlükdə, Birinci və İkinci Qarabağ müharibələrinin şəhid ailələrinə və müharibə əlillərinə 12 min 500 mənzil verilib.

Reabilitasiya mərkəzləri yaradılmışdır və ən müasir texnologiyalarla təchiz edilmişdir. Minlərlə xidmət göstərilir, müharibə əlilləri üçün, veteranlar üçün, şəhid ailələri üçün məşğulluq marafonları keçirilir. Ümumiyyətlə, bu kateqoriyadan olan insanları fəal işə cəlb etmək üçün böyük işlər görülür.

Bu gün Qarabağ yenidən qurulur, şəhərlər, kəndlər salınır, infrastruktur işləri həyata keçirilir.

Paylaş:

Baxılıb: 573 dəfə