İkili standartlara əsaslanan siyasətə son qoymaq zamanıdır

Bakı:

20 °C

83 %

4 m/s

Əlaqə

AZ RU EN

Ana səhifə / YAP xəbərləri / İkili standartlara əsaslanan siyasətə son qoymaq zamanıdır

İkili standartlara əsaslanan siyasətə son qoymaq zamanıdır

19.12.2022 [14:26]

Rusiya Federasiyası sülhməramlı kontingentinin müvəqqəti yerləşdiyi Azərbaycan ərazilərində təbii sərvətlərin qeyri-qanuni istismarı, habelə ekoloji vəziyyətin pisləşməsi ilə bağlı ilkin monitorinq məqsədilə Azərbaycan dövlət qurumlarının nümayəndələrinin və mütəxəssislərin əraziyə girişinə maneçilik törədilməsi səbəbindən Azərbaycan vətəndaş cəmiyyəti nümayəndələrinin və ekoloqların etiraz aksiyası təşkil olunub.

Əsas tələb budur ki, Azərbaycanın sözügedən ərazilərində təbii sərvətlərin qeyri-qanuni istismarı dayandırılmalı, bütün təbii sərvətlərin istismarı Azərbaycan Respublikası qanunvericiliyi əsasında həyata keçirilməlidir. İşğalçı dövlət yenə də əsassız iddiaları, qərəzli təbliğatı ilə diqqətdədir. Belə ki, Ermənistan tərəfinin guya Laçın yolunun bağlanması, bölgədə humanitar fəlakət yaşanması, etnik təmizlənmə həyata keçirilməsi barədə iddiaları böhtandır və həqiqəti əks etdirmir. Laçın yolu azərbaycanlı etirazçılar tərəfindən deyil, Rusiya Federasiyasının sülhməramlı kontingenti tərəfindən bağlanıb. Azərbaycan vətəndaş cəmiyyəti nümayəndələri sadəcə talan edilmiş təbii sərvətlərin qanunsuz daşınmasının qarşısını almağa çalışır. Təbii sərvətlərimizin talanmasına, ekoloji terrora etiraz etmək haqqımızdır. Aksiya iştirakçıları tələbləri yerinə yetirilənədək bu addımlarını davam etdirəcəklərini bildirirlər. Aksiyaya qoşulanların sayı günbəgün artır. Bu, dünyaya sülh, ədalət mesajı olmaqla yanaşı, birliyimizin, həmrəyliyimizin nümayişidir. 30 il işğalçı dövlət torpaqlarımızın malik olduğu təbii sərvətlərdən istifadə edərək iqtisadi durumunu yaxşılaşdırmağa çalışıb. Azərbaycanın şanlı Zəfərindən sonra beynəlxalq ekspertlərin təhlillərində bu məqam xüsusi yer aldı ki, iqtisadi böhran içərisində çabalayan Ermənistanın iqtisadi vəziyyəti daha da ağırlaşacaq. Azərbaycan yeraltı və yerüstü sərvətlərlə zəngin ölkədir. Yenilməz, məğrur xalqımız daim bu sərvətlərin sahibi olduğu üçün qürur duymaqla yanaşı, onları qorumağa səy göstərib.

Şuşa-Laçın yolunda keçirilən etiraz aksiyası bunun bir daha təsdiqidir. Azərbaycan məsuliyyətli ölkədir. Ermənistanın apardığı qərəzli təbliğatın əksinə olaraq Azərbaycan tərəfi ərazilərimizdə yaşayan bütün erməni sakinlərin humanitar ehtiyaclarını qarşılamağa hazırdır. Ermənilərin apardıqları təbliğatın əsassızlığını təsdiqləyən bu faktı da qeyd etməliyik ki, Rusiya sülhməramlılarının nəzarətində olan ərazidə cəmi 30-35 min insan yaşayır. Onların böyük hissəsi isə hərbi qulluqçulardır. Azərbaycan fəalların sülh aksiyası Qarabağda yaşayan ermənilər üçün heç bir təhdid yaratmır. Keçirilən sülh aksiyası səbəbindən Qarabağ ermənilərinin yaşadığı ərazilərin qazla təchizatı dayandırılmayıb və həyati əhəmiyyətli yüklərin keçməsinə maneçilik törədilməyib. Rusiya sülhməramlılarının müvəqqəti yerləşdiyi ərazilərdə qaz təchizatı Ermənistan tərəfindən həyata keçirilir və sözügedən ərazilər ölkəmizin qaz təchizatı sisteminə hələ ki inteqrasiya olunmayıb. Tarixi Zəfərimizdən ötən iki ildə görünən budur ki, Ermənistan 2020-ci il 10 noyabr tarixli üçtərəfli Bəyanatı kobud şəkildə pozur. Laçın yolundan hərbi məqsədlər, minaların və talan olunan təbii sərvətlərin daşınması üçün istifadə edir, bununla da Praqa və Soçi görüşlərində Azərbaycanın ərazi bütövlüyü və suverenliyinə hörmət edilməsi üzrə qəbul etdiyi öhdəliklərə zidd olaraq qanunsuz fəaliyyətini davam etdirir. Azərbaycanın Ermənistana irəli sürdüyü sülh təklifi əksər dünya gücləri tərəfindən dəstəklənir və buna nail olmaq üçün səylərini əsirgəməyəcəklərini bildirirlər. 30 illik işğal dövründə Ermənistana dəstək missiyasını yerinə yetirən bəzi dövlətlər hazırda gizli, yaxud aşkar şəkildə bu funksiyalarını yerinə yetirib vəziyyəti gərginləşdirməyə çalışmaqla dövlətlərarası münasibətlərdə əsas amil olan etimad mühitinə öz mənfi təsirlərini göstərirlər. İkili standartlara əsaslanan siyasətə son qoymaq zamanıdır.

Nihad Pənahov

YAP Tovuz rayon təşkilatının sədri

Paylaş:

Baxılıb: 537 dəfə