Azərbaycan-Özbəkistan münasibətlərinin yüksələn xətlə inkişaf edəcəyi şübhə doğurmur

Bakı:

26 °C

83 %

2 m/s

Əlaqə

AZ RU EN

Ana səhifə / YAP xəbərləri / Azərbaycan-Özbəkistan münasibətlərinin yüksələn xətlə inkişaf edəcəyi şübhə doğurmur

Azərbaycan-Özbəkistan münasibətlərinin yüksələn xətlə inkişaf edəcəyi şübhə doğurmur

28.08.2023 [15:10]

Azərbaycan türk dünyası ilə münasibətlərə xüsusi önəm verir. Türkiyə ilə müxtəlif sahələrdə əməkdaşlıq bu gün ən yüksək səviyyədədir. Türk Dövlətləri Təşkilatı çərçivəsində digər türkdilli ölkələrlə əlaqələr hər keçən gün yeni müstəviyə qədəm qoyur. Azərbaycan türk dünyasında sarsılmaz nüfuzu ilə seçilən ölkələrdən biridir. Məhz 2022-ci ildə dövlətimizin başçısının Özbəkistana üç dəfə səfər etməsi Azərbaycan Prezidentinin qardaş ölkə ilə əməkdaşlığın inkişafına böyük önəm verməsinin göstəricisidir.

Azərbaycan və Özbəkistan arasında diplomatik münasibətlər 1995-ci il oktyabrın 2-də qurulmuşdur. Buna baxmayaraq, Azərbaycan və özbək xalqları arasında ənənəvi dostluq və qardaşlıq əlaqələri tarixən mövcud olub. Ortaq tarixi, dini və mədəniyyəti bölüşən, eyni kökə malik olan hər iki xalq arasındakı əlaqələr qədim dövrlərə söykənir.

Özbəkistan Prezidentinin Şavkat Mirziyoyevin avqustun 22-23-də Azərbaycana səfəri iki ölkə arasındaki münasibətlərə xüsusi önəm verir. Belə ki, cənab Şavkat Mirziyoyev ötən ay keçirilən növbədənkənar seçkilərdə prezident seçildikdən sonra ilk rəsmi səfərini məhz Azərbaycana etdi. Bu çox mühüm bir hadisədir və iki ölkə arasında mövcud qardaşlıq, dostluq münasibətlərinin bariz nümunəsidir. Digər tərəfdən bu görüşlər fikir mübadiləsi aparmaq, birgə tapşırıqların icrasına nəzarət etmək və əməkdaşlığa dair ümumi öhdəliklərini gücləndirmək üçün platforma rolunu oynayır.

Azərbaycanın Qarabağ və Şərqi Zəngəzur iqtisadi rayonlarında başladığı tikinti-quruculuq, infrastruktur layihələrinə Özbəkistan da öz töhfəsini verib. Özbəkistan prezidenti Azərbaycana səfəri çərçivəsində azad edilmiş Qarabağ torpaqlarında oldu. Şavkat Mirziyoyev Qarabağa səfər edən ikinci türk dövləti başçısı idi. Prezident Füzulidə şəxsi təşəbbüsü ilə tikilən məktəbin açılışında iştirak etdi. Füzulidə Özbəkistan Prezidenti Şavkat Mirziyoyevin şəxsi təşəbbüsü ilə tikilən Mirzə Uluqbəyin adını daşıyan məktəbin açılışında dövlətimizin başçısı Qarabağın bərpa işində xarici dövlətin ilk hədiyyəsini qeyd edərək, yüksək dəyərləndirdi. Bu onun Qarabağda quruculuq işlərinə böyük önəm verdiyinin göstəricisidir. Öz növbəsində Azərbaycan da Cənubi Qafqazın mühüm dövləti kimi regionda Özbəkistanın əsas tərəfdaşı ola bilər.

Mühüm nəqliyyat marşrutlarının üzərində yerləşən Azərbaycan və Özbəkistan bu sahədə də fəal əməkdaşlıq həyata keçirir. Prezident İlham Əliyevin uzaqgörən siyasətinin nəticəsi olaraq ölkəmizdə bir sıra mühüm nəqliyyat-logistika infrastrukturu yaradılıb və Azərbaycan beynəlxalq nəqliyyat şəbəkələrinə inteqrasiya olunub. Bunlar Azərbaycan vasitəsilə Mərkəzi Asiya ölkələrindən, o cümlədən Özbəkistandan yükdaşımaların həcminin daha da artmasına təkan verəcək.

Azərbaycan Prezidenti cənab İlham Əliyevin rəhbərliyi və uzaqgörən xarici siyasəti nəticəsində Azərbaycanın Özbəkistan, eləcə də digər Mərkəzi Asiya ölkələri ilə əməkdaşlığı daim yüksələn xətt üzrə inkişaf edir, xalqlarımız arasında dostluq, qardaşlıq münasibətləri dərinləşir və çoxşaxəli tərəfdaşlığımız yeni inkişaf mərhələsinə qədəm qoyur.

Varis Rüstəmov,

Yeni Azərbaycan Partiyası Sabirabad rayon təşkilatının sədri

Paylaş:

Baxılıb: 548 dəfə