Fevralın 28-i Azərbaycanın kino və teatr səhnəsində maraqlı obrazlar qalereyası yaratmış görkəmli aktyor, Xalq artisti Mustafa Mərdanovun anadan olmasından 130 il ötür.

Mustafa Həşim oğlu Mərdanov Cənubi Azərbaycanda - Mərənddə anadan olub. Uşaq yaşlarında ailəsi ilə birlikdə Tiflisə köçüb, 1924-cü ilə qədər orada yaşayıb. O, ilk dəfə 1909-cu il noyabrın 28-də səhnəyə çıxıb. İkinci dəfə "Xor-xor" tamaşasında Seyfulla rolunda çıxış edən Mustafanın ifası Tiflis Azərbaycan Teatrının peşəkar, təcrübəli aktyorları tərəfindən bəyənilir və onu truppaya dəvət edirlər. Beləliklə, gənc Mustafa 1910-cu ildə Tiflis Azərbaycan Teatrının tamaşalarında iştirak etməyə başlayır. Tiflis Azərbaycan Teatrının direktoru olub (1921-1922). Tiflis Kişi Gimnaziyasını (1916), Moskva Dövlət Teatr Sənəti İnstitutunu (GİTİS, 1922-1924) bitirib. 1924-cü ildən ömrünün sonuna qədər Azərbaycan Dövlət Dram Teatrında çalışıb. Teatr Xadimləri İttifaqının sədri (1962-1968) olub. Xarici film istehsalçılarının çəkdiyi “Abrek Zaur” filmində (1926, 1938, rejissor Boris Mixin / Rusiya) filmində pristav rolunda çəkilib. “50 il Azərbaycan səhnəsində xatirələrim” (1959), “Mənim müasirlərim” (1973) adlı kitabları nəşr olunub. Xalq artisti (1943) Mustafa Mərdanov 1968-ci ildə vəfat edib.

Aktyor Mustafa Mərdanov rejissor Səməd Mərdanovun qardaşıdır.

Filmoqrafiya:

Bismillah (1925, tammetrajlı bədii film) – aktyor (muzdur Qulu)

Müxtəlif sahillərdə (1926, tammetrajlı bədii film) – aktyor (Abbas)

Hacı Qara (1928, tammetrajlı bədii film) – aktyor (Kərəməli)

Vulkan üzərində ev (1928, tammetrajlı bədii film) – rejissor assistenti

Sevil (1929, tammetrajlı bədii film) – aktyor (Balaşın atası Atakişi)

Lətif (1930, tammetrajlı bədii film) – aktyor (qolçomaq əlaltısı Ələsgər)

İyirmi altı komissar (1932, tammetrajlı bədii film) – aktyor (menşevik)

Bakılılar (1938, tammetrajlı bədii film) – aktyor (menşevik)

Kəndlilər (1939, tammetrajlı bədii film) – aktyor (kəndli Təhməz və menşevik)

Yeni horizont (1940, tammetrajlı bədii film) – aktyor (trest müdiri)

Səbuhi (1941, tammetrajlı bədii film) – aktyor (akademiya rəisi)

Fətəli xan (1947, tammetrajlı bədii film) – aktyor (Şirin kişi)

Bəxtiyar (II) (1955, tammetrajlı bədii film) – filmi səsləndirən (rus müdir)

Görüş (1955, tammetrajlı bədii film) – aktyor (Əsgər)

Qara daşlar (1956, tammetrajlı bədii film) – aktyor (Dəmirov)

O olmasın, bu olsun (1956, tammetrajlı bədii film) – aktyor (Həsən bəy)

Səhər (1960, tammetrajlı bədii film) – aktyor (Əhməd kişi)

Əmək və qızıl gül (1962, tammetrajlı bədii film) – aktyor (poçtalyon)

Əhməd haradadır? (1963, tammetrajlı bədii film) – aktyor (Məmməd kişi)

Romeo mənim qonşumdur (1963, tammetrajlı bədii film) – filmi səsləndirən (Kolumb-İppolit Xviçiya)

1968-ci ildə çəkilən “Qanun naminə” filmindəki rolu aktyorun kinoda son işi olub. Mustafa Mərdanov həmin il dekabrın 12-də dünyasını dəyişib.

Mikayıl