Müasir dövrdə  ən böyük bəlaya çevrilən problemlərdən biri də narkomaniyadır. Hazırda bütün dünyada bu problemlə mübarizə qlobal səviyyəyə çatıb. “Ağ ölüm” adlandırılan xəstəlikdən ən çox əziyyət çəkənlər isə yeniyetmələr və gənclərdir.

Biologiya elmlər doktoru, psixoloq  Namik Qüdrətov "Yeni Azərbaycan" - a açıqlamasında bildirir ki, gənclərin narkotikə qoşulmağının  səbəbi  gündəlik problemlər, stress, depressiya və düşdüyü mühitdir. O bildirir ki, gənclər problemdən qaçmağın yolunu ya alkoqolizmdə, ya da narkomaniyada görürlər: "Narkotikdən istifadə edən insanlarda QİÇS - ə yoluxma ehtimalı çoxdur. Qeyd edək ki, QİÇS- dən  dünyasını dəyişənlərin əksəriyyəti məhz narkomanlardır. Depressiyadan əziyyət çəkən insanlar emosional vəziyyətini yaxşılaşdırmaq üçün narkotikdən  istifadə edir və problemlərini  müvəqqəti unudurlar. "

Araşdırmalar göstərir ki, narkotik istifadəçiləri arasında genetik faktor da rol oynayır. Elə ölkələr  var ki, orada narkotikdən istifadəyə icazə verilir. Eyni zamanda yoxsulluq, işsizlik, məişət zoraklığı da narkomaniyanın artmasına səbəb olan amillərdir.

Psixoloq açıqlamasında həmçinin bildirir ki, narkomaniya  çətinliklə müalicə olunur: "Ölkəmizdə narkomaniyadan  müalicə alınması üçün xüsusi klinikalar fəaliyyət göstərir.

Statistikaya baxsaq görərik ki, ölkəmizdə  narkotikə qurşanma daha çox cənub zonasında müşahidə olunur. Hazırda Bakı kəndlərində də narkotik vasitələrə aludə olanların sayında artım var”.

Havar Şəfiyeva