23 oktyabr 2026-cı il tarixində Yeni Azərbaycan Partiyası Nəsimi rayon təşkilatının S. Rüstəm küçəsi 31 üzrə (Azərbaycan Respublikası Mənzil İnşaat Dövlət Agentliyi) ərazi partiya təşkilatında müşavirə keçirilib. Müşavirə Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevin YAP-ın VIII Qurultayındakı nitqindən irəli gələn məsələlərə həsr olunub.

Tədbir Ulu Öndər Heydər Əliyevin və ölkəmizin ərazi bütövlüyü və suverenliyi uğrunda canlarından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Sonra Azərbaycan Respublikasının Dövlət Himni səsləndirilib.

Müşavirəni S. Rüstəm küçəsi 31 üzrə ərazi partiya təşkilatının sədri, Azərbaycan Respublikası Mənzil İnşaat Dövlət Agentliyinin İdarə Heyəti sədrinin müşaviri Ceyhun Hüseynova aparıb. O, Partiya Sədrinin qurultaydakı nitqinin qarşıdakı illər üçün aydın yol xəritəsi olduğunu vurğulayıb. Ceyhun Hüseynova dövlət başçısının sosial siyasətlə bağlı fikirlərinə toxunub. O qeyd edib ki, Prezident İlham Əliyevin vurğuladığı kimi, dövlətin məqsədi Azərbaycan xalqının rifahının ildən-ilə yaxşılaşmasıdır. Vətəndaşların mənzil şəraitinin yaxşılaşdırılması da bu siyasətin mühüm istiqamətlərindən biridir. Moderator bildirib ki, Agentliyin kollektivi əlçatan mənzil layihələri ilə dövlətin sosial siyasətinin həyata keçirilməsinə töhfə verir.

YAP Nəsimi rayon təşkilatının sədri Azər Süleymanov VIII Qurultayın Azərbaycanın ərazi bütövlüyünü və suverenliyini tam bərpa etməsindən sonra keçirilən ilk qurultay olduğunu qeyd edib. O, Partiya Sədrinin qarşıya qoyduğu vəzifələri diqqətə çatdırıb. Bunlar sırasında hərbi gücün artırılmasını, ideoloji təhlükəsizliyin təmin olunmasını, fəal xarici siyasəti, iqtisadi sabitliyin qorunmasını və «Böyük Qayıdış»ı sadalayıb. Azər Süleymanov Partiya Sədrinin YAP fəalları qarşısında qoyduğu tapşırıqlardan da danışıb. Bu tapşırıqlar ideoloji işin formal yanaşmalardan uzaq, müasir formatda qurulması və Azərbaycan reallıqlarının hər bir vətəndaşa çatdırılmasıdır.

Partiyanın veteran üzvü, Agentliyin şöbə müdiri Dilxoş Nuryev çıxışında Partiya Sədrinin qələbələrimizin başlanğıcı ilə bağlı fikrinə toxunub. Dövlət başçısı bu başlanğıcın 1992-ci ilin noyabrında Naxçıvanda keçirilən təsis qurultayında qoyulduğunu vurğulamışdı. Dilxoş Nuryev partiyanın yarandığı çətin illəri xatırladıb, Ulu Öndər Heydər Əliyevin ətrafında birləşən insanların ölkəni xaosdan xilas etdiyini bildirib. O, veteranların təcrübəsinin gənc nəslə ötürülməsinin və tarixi həqiqətlərin unudulmamasının vacibliyini vurğulayıb.

Müşavirənin sonunda iştirakçılar Prezident İlham Əliyevin VIII Qurultayda müəyyən etdiyi vəzifələrin icrasında fəal iştirak edəcəklərini bildiriblər.

Tədbir Yeni Azərbaycan Partiyasının Himni ilə yekunlaşıb.