Vüsal Hüseynov
YAP Xocavənd rayon təşkilatının sədri
Azərbaycanın qədim tarixi, mədəniyyəti və milli qüruru ilə hər zaman seçilən Şuşa şəhəri xalqımızın yaddaşında sadəcə yaşayış məntəqəsi deyil, milli ruhun, mənəvi bütövlüyün və sarsılmaz iradənin simvoludur. Otuz ilə yaxın davam edən erməni işğalı, tarixi abidələrimizin dağıdılması və doğma ocaqlarımızdan didərgin düşməyimiz xalqımızın qəlbində sağalmaz yara olsa da, ədalətin bərpası inancı heç zaman sönməmişdir. Müzəffər Ali Baş Komandan, Prezident İlham Əliyevin rəhbərliyi ilə qazanılmış şanlı Zəfər bu həsrətə son qoydu. Dövlət başçısının həmin tarixi anı və qürur dolu reallığı ifadə edərək vurğuladığı kimi: “Biz uzun illər davam edən ayrılıqdan sonra doğma Şuşaya qayıtdıq. Şuşanı bərpa edirik, Şuşanı yenidən qururuq. Şuşa şəhəri öz əvvəlki əzəmətini, öz əvvəlki simasını bərpa edir.” Bu müqəddəs qayıdış həm də xalqımızın öz gücünü, birliyini və tarixin gedişatını dəyişmək əzmini bütün dünyaya nümayiş etdirməsi oldu.
Vətən müharibəsinin şah əsəri olan 8 Noyabr Şuşanın azad edilməsi günü hərb tariximizə qızıl hərflərlə yazıldı. Sıldırım qayaları aşaraq, yalnız yüngül silahlarla və misilsiz qəhrəmanlıqla düşmən üzərinə yeriyən Azərbaycan əsgər və zabitləri Ali Baş Komandanın əmrini şərəflə yerinə yetirdilər. 8 noyabr 2020-ci ildə Şuşanın azad olunması xəbəri xalqımıza zəfər müjdəsi bəxş etdi və düşmənin müqavimətini tamamilə qıraraq müharibənin taleyini həll etdi. Prezident İlham Əliyevin qeyd etdiyi kimi: “Şuşasız bizim işimiz natamam olardı. Şuşa Qarabağın tacıdır, Şuşa bizim müqəddəs şəhərimizdir.” Bu baxımdan, 8 Noyabr təkcə hərbi Zəfər günü deyil, həm də milli ləyaqətimizin, mənəvi bütövlüyümüzün və müstəqillik tariximizin ən parlaq səhifəsidir.
Bu gün işğaldan azad edilmiş digər bölgələrimizdə olduğu kimi, Şuşada da misli görünməyən miqyasda quruculuq və bərpa işləri həyata keçirilir. "Böyük Qayıdış" Proqramı çərçivəsində qədim şəhərimizin tarixi siması və memarlıq üslubu qorunmaqla yanaşı, ən müasir infrastruktur qurulur. Cıdır düzündən ucalan azan səsi, bərpa edilən məscidlər, tarixi abidələr, həmçinin təşkil olunan mötəbər mədəniyyət tədbirləri Şuşanın əzəli sahiblərinə qayıtdığını və ədəbi-mədəni həyatına yenidən qovuşduğunu bütün dünyaya sübut edir. Şuşa şəhəri günü və 8 Noyabr Zəfəri münasibətilə bu müqəddəs torpaqlara dönüşümüzü qeyd edərkən, Azərbaycan dövlətinin qüdrətini, xalqımızın birliyini və şəhidlərimizin əziz xatirəsini bir daha dərin ehtiramla yad edirik. Qarabağın tacı olan Şuşa bu gün həm də gələcəyə inamla baxan qüdrətli Azərbaycanın sarsılmaz simvolu kimi əbədi parlayacaqdır.
