Azərbaycanın müasir inkişaf mərhələsi milli dövlətçilik ənənələrinin qorunması, suverenliyin möhkəmləndirilməsi və ölkənin beynəlxalq mövqelərinin daha da gücləndirilməsi ilə səciyyələnir. Bu gün dövlətimizin qarşısında dayanan vəzifələr yalnız əldə edilmiş nailiyyətlərin qorunması ilə məhdudlaşmır. Qlobal siyasi proseslərin sürətlə dəyişdiyi, informasiya məkanında rəqabətin kəskinləşdiyi və təhlükəsizlik anlayışının yeni məzmun qazandığı şəraitdə Azərbaycanın gələcək inkişafını təmin edəcək strateji yanaşmaların müəyyənləşdirilməsi xüsusi əhəmiyyət daşıyır.

Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin partiyanın VIII Qurultayında səsləndirdiyi fikirlər məhz bu baxımdan mühüm siyasi məzmun daşıyır. Dövlət başçısının çıxışı ölkəmizin qarşısında duran prioritetləri müəyyən etməklə yanaşı, müasir dövrdə güclü dövlət olmağın əsas şərtlərini də aydın şəkildə ortaya qoyur. Ərazi bütövlüyünün və suverenliyin tam bərpasından sonra keçirilən qurultay Azərbaycanın yeni reallıqlar şəraitində inkişaf strategiyasının daha da təkmilləşdirilməsi baxımından əlamətdar hadisədir.

Azərbaycanın son illərdə əldə etdiyi uğurlar ardıcıl siyasi kursun, düşünülmüş strategiyanın və milli maraqlara əsaslanan qərarların nəticəsidir. Ölkəmiz mürəkkəb geosiyasi şəraitdə öz müstəqil mövqeyini qoruyaraq həm regional, həm də beynəlxalq səviyyədə etibarlı tərəfdaş kimi nüfuzunu artırıb. Bu təcrübə göstərir ki, dövlətin gücü yalnız iqtisadi göstəricilər və hərbi imkanlarla ölçülmür. Güclü siyasi iradə, milli həmrəylik, iqtisadi müstəqillik və uzunmüddətli hədəflərə xidmət edən idarəçilik də dövlət qüdrətinin mühüm dayaqlarıdır.

Prezident İlham Əliyevin çıxışında təhlükəsizlik məsələlərinə xüsusi diqqət yetirilməsi də təsadüfi deyil. Müasir dünyada baş verən münaqişələr, beynəlxalq hüququn tətbiqində müşahidə olunan ziddiyyətlər və yeni risklər hər bir dövlətin öz müdafiə imkanlarını daim gücləndirməsini zəruri edir. Azərbaycanın bu istiqamətdə həyata keçirdiyi siyasət sülhün və sabitliyin qorunmasına, ölkəmizin gələcək inkişafı üçün etibarlı zəmin yaradılmasına xidmət edir. Bununla yanaşı, dövlət başçısının yanaşmasında mühüm bir prinsip aydın görünür: əldə edilmiş tarixi nailiyyətlər arxayınlıq üçün əsas deyil, yeni vəzifələrin məsuliyyətlə yerinə yetirilməsi üçün möhkəm təməldir. Suverenliyin qorunması, iqtisadi imkanların genişləndirilməsi, işğaldan azad edilmiş ərazilərdə bərpa və quruculuq işlərinin davam etdirilməsi, vətəndaşların rifahının yüksəldilməsi vahid inkişaf strategiyasının bir-birini tamamlayan istiqamətləridir.

Prezident İlham Əliyevin VIII Qurultaydakı çıxışında diqqət çəkən əsas məqamlardan biri ideoloji təhlükəsizlik məsələsidir. İnformasiya texnologiyalarının sürətlə inkişaf etdiyi, rəqəmsal platformaların ictimai düşüncəyə təsir imkanlarının genişləndiyi müasir dövrdə milli maraqların qorunması təkcə fiziki sərhədlərin mühafizəsi ilə məhdudlaşmır. Cəmiyyətin informasiya təhlükəsizliyinin təmin edilməsi, saxta məlumatların və manipulyativ təsirlərin qarşısının alınması da dövlətin strateji vəzifələri sırasında yer alır.

Belə bir şəraitdə cəmiyyətin maarifləndirilməsi, gənc nəslin milli-mənəvi dəyərlərə bağlı və müasir biliklərə yiyələnmiş vətəndaşlar kimi yetişməsi xüsusi aktuallıq qazanır. İdeoloji dayanıqlılıq insanlara yalnız məlumat təqdim etməklə deyil, onlarda tənqidi düşüncə, düzgün məlumatı yanlış informasiyadan ayırmaq bacarığı və milli maraqlara məsuliyyətli münasibət formalaşdırmaqla möhkəmlənir.

Dövlət başçısının ideoloji işin müasir tələblərə uyğun qurulması, formal yanaşmalardan uzaqlaşaraq real nəticələrə üstünlük verilməsi ilə bağlı fikirləri də mühüm əhəmiyyət daşıyır. Cəmiyyətə çatdırılan məlumat inandırıcı, əsaslandırılmış və ictimai reallıqlarla uzlaşan olmalıdır. Azərbaycanın əldə etdiyi uğurların, həyata keçirilən layihələrin və qarşıya qoyulan məqsədlərin geniş ictimaiyyətə düzgün çatdırılması milli həmrəyliyin güclənməsinə, vətəndaşların dövlətin inkişaf proseslərində fəal iştirakına töhfə verir.

Yeni Azərbaycan Partiyasının VIII Qurultayında müəyyənləşdirilən yanaşmalar partiyanın qarşısında dayanan vəzifələrin də yeni dövrün tələbləri əsasında dəyərləndirilməsini zəruri edir. Ulu Öndər Heydər Əliyevin yaratdığı və möhkəm dövlətçilik prinsipləri üzərində formalaşan siyasi təşkilat bu gün ölkənin inkişaf prioritetlərinin ictimaiyyətə çatdırılmasında, milli maraqlar ətrafında həmrəyliyin gücləndirilməsində və cəmiyyətlə dövlət arasında əlaqələrin möhkəmləndirilməsində mühüm rol oynayır.

Partiyanın fəaliyyəti yalnız siyasi qərarların dəstəklənməsi və tədbirlərin təşkili ilə məhdudlaşmamalıdır. Müasir dövrdə əsas məsələ cəmiyyətin müxtəlif təbəqələri ilə canlı ünsiyyət qurmaq, insanların müraciət və təşəbbüslərinə diqqətlə yanaşmaq, gənclərin ictimai-siyasi proseslərdə iştirakını genişləndirmək və görülən işlərin nəticələrini obyektiv şəkildə təqdim etməkdir. Bu yanaşma partiya fəaliyyətinin səmərəliliyini artırmaqla yanaşı, onun ictimai etimadının möhkəmlənməsinə də xidmət edir.

İdeoloji fəaliyyətin keyfiyyəti, ilk növbədə, onun insanlara nə dərəcədə təsir göstərməsi və cəmiyyətin aktual ehtiyaclarına cavab verməsi ilə ölçülür. Buna görə də müasir kommunikasiya vasitələrindən istifadə, operativ məlumatlandırma, gənclərlə məqsədyönlü iş və ictimai təşəbbüslərin dəstəklənməsi partiyanın qarşısında duran mühüm istiqamətlərdəndir. Əsas məqsəd milli maraqları qoruyan, dövlətçilik düşüncəsini gücləndirən və cəmiyyətin inkişafına real töhfə verən fəaliyyət modelini daha da təkmilləşdirməkdir.

Prezident İlham Əliyevin VIII Qurultaydakı çıxışının əsas mahiyyəti Azərbaycanın qazandığı nailiyyətlərdən gələcək inkişaf üçün möhkəm zəmin kimi istifadə etmək, dəyişən beynəlxalq şəraitə çevik uyğunlaşmaq və milli maraqları bütün qərarların mərkəzində saxlamaqdır. Bu yanaşma göstərir ki, dövlətin dayanıqlı inkişafı hərbi və iqtisadi güclə yanaşı, cəmiyyətin intellektual potensialından, milli birliyindən və ideoloji müqavimət imkanlarından da asılıdır.

Bu gün Azərbaycanın qarşısında duran vəzifələrin uğurla yerinə yetirilməsi dövlətlə cəmiyyətin qarşılıqlı etimadına, ümumi məqsədlər naminə birgə fəaliyyətinə və hər bir vətəndaşın məsuliyyətli mövqeyinə söykənir. Yeni Azərbaycan Partiyasının VIII Qurultayı da bu baxımdan yalnız görülmüş işlərin qiymətləndirilməsi deyil, qarşıdakı mərhələnin prioritetlərinin müəyyənləşdirilməsi kimi mühüm siyasi əhəmiyyət daşıyır. Milli maraqlara əsaslanan ardıcıl siyasət, müasir çağırışlara uyğun düşüncə tərzi və cəmiyyətin fəal iştirakı Azərbaycanın gələcək inkişafının əsas təminatlarıdır. Güclü dövlətin davamlı uğurları isə əldə edilmiş nəticələri qorumaqla yanaşı, gələcəyin tələblərinə indidən hazır olmaq bacarığı ilə müəyyənləşir.

Fidan Hüseynova

YAP Quba rayon təşkilatının sədri