Paşinyan dövlətə xəyanətdə ittiham olunacaq?

Bakı:

30 °C

39 %

0 m/s

Əlaqə

AZ RU EN

Ana səhifə / Analitik / Paşinyan dövlətə xəyanətdə ittiham olunacaq?

Paşinyan dövlətə xəyanətdə ittiham olunacaq?

06.05.2022 [10:31]

Məlik MƏMMƏDOV

Ermənistan İkinci Qarabağ müharibəsindəki məğlubiyyətin doğurduğu növbəti daxili siyasi böhranı yaşayır. Artıq bir aya yaxındır ki, ölkədə mitinqlər keçirilir. Erməni müxalifəti düşünür ki, Nikol Paşinyanı 2018-ci ilin mayında onlardan hakimiyyəti alıb isti yerlərindən məhrum etdiyinə, indi isə Azərbaycan və Türkiyə ilə sülh şəraitində birgə yaşamaq üçün danışıqlar apardığına görə cəzalandırmağın vaxtı çatıb.

Aprelin 6-da Ermənistanda başlayan etiraz aksiyaları Brüsseldə əldə olunan razılaşmalara reaksiya olub. Aprelin 25-də Ermənistanda revanşist müxalifət “ümummilli etiraz hərəkatı”na başlayıb. Bəyan edilən məqsəd Ermənistanın baş nazirinin Azərbaycanla danışıqlarının qarşısını almaq üçün Nikol Paşinyanı istefaya məcbur etməkdir. Revanşistlər bir neçə gündən sonra bu məqsədlərinə çata biləcəklərini bildirirlər.

Serj Sarkisyan və Robert Köçəryan ortada çox görünməməyə və revanşistlərin cəhdlərinə “arxa cəbhə”də rəhbərlik etməyə üstünlük verirlər. Çünki təcrübənin göstərdiyi kimi, Ermənistan cəmiyyəti öz keçmiş əzabkeşlərinin hakimiyyətə qayıtmasını qəti şəkildə istəmir. Ona görə də bu tamaşanın əsas personajları kimi Ermənistanda siyasi arenada nisbətən yeni olan, “Ermənistan” müxalifət blokundan parlamentin vitse-spikeri, daşnak İşxan Saqatelyan və müxalifətin “Mənim şərəfim var” parlament fraksiyasının lideri Artur Vanetsyan çıxış edirlər. Ermənistanın ikinci prezidentinin oğlu Levon Köçəryanın timsalında isə “ədalət uğrunda mübarizə” imicini formalaşdırmağa cəhdlər edilir.

“Ermənistanı və Qarabağı xilas et” hərəkatı liderlərinin planına görə, on minlərlə marginal İrəvanın küçə və meydanlarına çıxaraq Nikol Paşinyanın “kapitulyant” siyasətindən narazılıq nümayiş etdirməli idi. Ancaq ötən günlər göstərdi ki, “Ermənistanı xilas etmək” istəyənlər dəfələrlə azdır.

Əvvəlki kimi xalqdan gözlənilən dəstəyi ala bilməyən müxalifətçilər keçmiş hakimiyyətin əlaltılarının qaldığı strukturlar vasitəsilə hərəkətə keçməyə qərar veriblər. Məsələn, Ermənistan Baş Prokurorluğu vasitəsilə. Qeyd edək ki, Ermənistanın baş prokuroru Artur Davtyan bu vəzifəyə 2016-cı ildə keçmiş prezident Serj Sarkisyanın dövründə təyin edilib.

Aprelin 26-da Ermənistan Baş Prokurorluğu İkinci Qarabağ müharibəsində həlak olan erməni hərbçilərin yaxınlarının baş nazir Nikol Paşinyanın Cinayət Məcəlləsinin bir sıra maddələri (o cümlədən dövlətə xəyanət) üzrə təqsirləndirilən şəxs qismində cəlb edilməsi ilə bağlı tələbini müstəntiqin baxılmasına göndərib. Mayın 4-də isə “Ermənistan” fraksiyasının deputatı Artur Kazinyan öz “facebook” səhifəsində yazıb ki, Ermənistanın Korrupsiyaya Qarşı Mübarizə Komitəsi dolayısı ilə Nikol Paşinyanın dövlətə xəyanət və digər cinayətlər törətməkdə ittiham oluna biləcəyini təsdiqləyib. Onun sözlərinə görə, Nikol Paşinyanın cinayət məsuliyyətinə cəlb edilməsi ilə bağlı vəsatət rədd edilməyib, qərarın qəbulu üçün əsas hallar aydınlaşdırılana qədər təxirə salınıb.

Lakin revanşistlərin belə bir addımı, çətin ki, özünü doğrultsun. 44 günlük müharibədəki məğlubiyyətdən bir neçə ay sonra Ermənistanın Baş Qərargahının Paşinyanı satqın adlandıraraq istefaya çağırmasını yaxşı xatırlayırıq. Lakin sonda strukturun rəhbərliyi, o cümlədən bu gün heç kimin xatırlamadığı Baş Qərargah rəisi Onik Qasparyan işdən çıxarılıb. Baxmayaraq ki, Baş Qərargah kimi qurumun hakimiyyət ilə mübarizə üçün (Baş Prokurorluqla müqayisədə) daha geniş alətləri var. Buna görə də, çox güman ki, Paşinyana qarşı başlanan istintaq, sadəcə, baş prokurorun dəyişikliyi ilə yekunlaşacaq.

Paylaş:

Baxılıb: 1811 dəfə