Qardaşlıq və siyasi iradə

Bakı:

24 °C

88 %

9 m/s

Əlaqə

AZ RU EN

Ana səhifə / Arxiv / Qardaşlıq və siyasi iradə

Qardaşlıq və siyasi iradə

07.04.2026 [15:35]

Möhtərəm Prezidentimiz cənab İlham Əliyevin 6 aprel 2026-cı il tarixində Gürcüstana reallaşdırdığı dövlət səfəri, regionun geopolitik mənzərəsi və iki qardaş ölkə arasındakı strateji müttəfiqlik baxımından tarixi bir addım kimi qiymətləndirilir. Tbilisidə keçirilən görüşlərdən sonra dövlət başçısının mətbuata verdiyi bəyanat həm ikitərəfli əlaqələrin gələcəyi, həm də Cənubi Qafqazda dayanıqlı sülhün formalaşması üçün mühüm mesajlarla zəngin olmuşdur.

Gürcüstanda yüksək səviyyədə qarşılanan dövlət başçısı Gürcüstanın Baş naziri İrakli Kobaxidze və Prezident Mixeil Kavelaşvili ilə keçirdiyi görüşlərdən sonra mətbuata geniş bəyanatla çıxış etdi. Bu bəyanat təkcə iqtisadi əməkdaşlığı deyil, həm də regionun təhlükəsizlik arxitekturasını əhatə edən strateji yol xəritəsi xarakteri daşıyırdı.

Cənab İlham Əliyev öz çıxışında Azərbaycan və Gürcüstanın hər zaman bir-birinin yanında olduğunu xüsusi vurğuladı. O qeyd etdi ki, bu səfər iki qardaş ölkə arasındakı münasibətlərə yeni bir impuls verəcəkdir. Dövlət başçısı bildirdi ki, bu gün müzakirə etdiyimiz məsələlər bir daha göstərir ki, Azərbaycan və Gürcüstan, hər zaman olduğu kimi, bir yerdədir və bir-birinin milli maraqlarını qətiyyətlə dəstəkləyir.

Bəyanatın iqtisadi hissəsi xüsusilə diqqətçəkən idi. Möhtərəm Prezidentimiz yeni investisiya layihələrindən bəhs edərək, əməkdaşlığın miqyasının genişləndiyini qeyd etdi.

Azərbaycan və Gürcüstan artıq təkcə öz daxillərində deyil, gələcəkdə üçüncü ölkələrdə də birgə investisiya layihələri həyata keçirməyi nəzərdən keçirirlər. Orta Dəhliz və enerji təhlükəsizliyi məsələləri gündəmin əsas sütunu olaraq qaldı. Bakı-Tbilisi-Qars dəmir yolu və Xəzər dənizindən Avropaya uzanan enerji xətlərinin səmərəliliyinin artırılması təsdiqləndi.

Cənab Prezidentin bəyanatındakı ən sensasiyalı və mühüm məqamlardan biri Azərbaycan və Ermənistan arasındakı sülh prosesi ilə bağlı idi. İlham Əliyev cənabları sülhün yalnız kağız üzərində deyil, əməli addımlarla möhkəmlənməli olduğunu bildirdi. Gürcüstanın vasitəçilik rolunu Prezidentimiz Gürcüstanın sülh prosesindəki konstruktiv rolunu yüksək qiymətləndirdi.

Dövlət başçısı diqqətə çatdırdı ki, hazırda Azərbaycan və Ermənistan arasında ticarət əməliyyatları məhz Gürcüstan vasitəsilə həyata keçirilir. Bu, regionda iqtisadi reinteqrasiyanın başladığının və Gürcüstanın bu prosesdə əsas qovşaq olduğunun rəsmi təsdiqi kimi qəbul edildi.

Görüşdə regional təhlükəsizlik məsələləri də ətraflı müzakirə olunub. Prezident İlham Əliyev vurğuladı ki, Cənubi Qafqazda sülh və sabitliyin təmin edilməsi üçün kənar müdaxilələrə deyil, regional əməkdaşlığa ehtiyac var. Azərbaycan və Gürcüstanın ərazi bütövlüyü və suverenliyinə qarşılıqlı dəstək bir daha bəyan edildi.

Prezident İlham Əliyevin 6 aprel 2026-cı il tarixli Tbilisi bəyanatı Azərbaycanın xarici siyasətində Gürcüstanın nə dərəcədə strateji bir tərəfdaş olduğunu bir daha sübut etdi. Xüsusilə Ermənistanla ticarət əlaqələrinin Gürcüstan üzərindən qurulması barədə verilən mesaj, regionda "Böyük Sülh"ün iqtisadi təməllər üzərində yüksəldiyini göstərir.

Bu səfər, Cənubi Qafqazın rifahı üçün Azərbaycan-Gürcüstan ittifaqının əvəzolunmaz olduğunu bütün dünyaya nümayiş etdirdi.

Eldar Əsədov

YAP Tərtər rayon təşkilatının sədri

Paylaş:

Baxılıb: 570 dəfə