Ceyhun Məmmədov: Sosial şəbəkələrdə Azərbaycan dilindən düzgün istifadə olunmasına diqqət artırılmalıdır

Bakı:

21 °C

94 %

0 m/s

AZ RU EN

Ana səhifə / Arxiv / Ceyhun Məmmədov: Sosial şəbəkələrdə Azərbaycan dilindən düzgün istifadə olunmasına diqqət artırılmalıdır

Ceyhun Məmmədov: Sosial şəbəkələrdə Azərbaycan dilindən düzgün istifadə olunmasına diqqət artırılmalıdır

11.08.2026 [12:20]

Ana dilinin saflığının qorunması, gənc nəslin Azərbaycan dilində düzgün və səlis danışması, milli-mənəvi dəyərlərin gələcək nəsillərə ötürülməsi hər birimizin qarşısında duran mühüm vəzifələrdəndir. Müasir dövrdə qloballaşma və rəqəmsal mühitin təsirləri bu məsələnin əhəmiyyətini daha da artırır.

Milli Məclisin deputatı Ceyhun Məmmədov AZƏRTAC-a açıqlamasında bildirib ki, ana dilinin qorunması milli kimliyin və milli yaddaşın mühafizəsi baxımından xüsusi əhəmiyyət daşıyır.

Azərbaycan Milli Elmlər Akademiyasının 80 illik yubileyində Azərbaycan Respublikasının Prezidenti tərəfindən ana dilinin saflığının qorunması ilə bağlı səsləndirilən mühüm mesajlar bu gün cəmiyyətdə geniş müzakirə olunur.

“Dil həm də bizim yaddaşımızdır, milli kimliyimizdir. Azərbaycan xalqı bu dili qorumaq üçün çox çətin dövrlərdən və mərhələlərdən keçib. Bu baxımdan gənc nəslin düzgün tərbiyəsi, ana dilində səlis danışması və dilimizin saflığının qorunması bu gün hər birimizin qarşısında duran mühüm vəzifələrdəndir”, – deyə deputat vurğulayıb.

Müsahibimiz diqqətə çatdırıb ki, xüsusilə gənclərə milli-mənəvi dəyərlərin, ana dilinə sevgi və hörmət hissinin aşılanması vacibdir. Gənclər bizim gələcəyimizdir və onlar bu dəyərləri gələcək nəsillərə ötürməlidirlər. Dünyada minlərlə xalqın mövcud olmasına baxmayaraq, onların yalnız bir hissəsinin müstəqil dövləti var. Azərbaycan xalqının ən böyük üstünlüklərindən biri müstəqil dövlətə və zəngin dövlətçilik ənənələri ilə yanaşı, öz ana dilinə sahib olmasıdır.

“Bu gün biz çox xoşbəxtik ki, müstəqil dövlətimiz var və eyni zamanda, öz dilimiz var. Dilimizin qorunması yalnız dilçilik məsələsi deyil, eyni zamanda, milli təhlükəsizlik, milli kimlik və gələcək nəsillərin tərbiyəsi məsələsidir. Ona görə də hər bir Azərbaycan vətəndaşı ana dilinin qorunmasına öz töhfəsini verməlidir”, – deyə C.Məmmədov bildirib. Qloballaşma və informasiya texnologiyalarının sürətlə inkişaf etdiyi müasir dövrdə ana dilinin saflığının qorunması daha da aktual məsələyə çevrilib.

Deputatın sözlərinə görə, xüsusilə sosial şəbəkələrdə və rəqəmsal platformalarda Azərbaycan dilindən düzgün istifadə olunmasına diqqət artırılmalıdır. Bu gün dilin gələcək inkişafı və qorunması baxımından ailənin, məktəbin, ali təhsil müəssisələrinin və bütövlükdə cəmiyyətin üzərinə böyük məsuliyyət düşür. Uşaqlar və gənclər ana dilində düzgün və səlis danışmağa, yazmağa və Azərbaycan dilinin zənginliyindən düzgün istifadə etməyə təşviq olunmalıdırlar.

“Biz bu gün dilimizi necə qoruyuruqsa, gələcək nəsillər də bizdən bunu öyrənəcək. Buna görə də ana dilinə münasibət hər bir ailədən, hər bir məktəbdən və hər bir vətəndaşdan başlamalıdır. Dilimizi qorumaq, zənginləşdirmək və gələcək nəsillərə sağlam şəkildə ötürmək hamımızın mənəvi borcudur”.

Paylaş:

Baxılıb: 381 dəfə