Zəngilan – Zəfərimizin və milli qürurumuzun ünvanı

Bakı:

21 °C

83 %

12 m/s

Əlaqə

AZ RU EN

Ana səhifə / Arxiv / Zəngilan – Zəfərimizin və milli qürurumuzun ünvanı

Zəngilan – Zəfərimizin və milli qürurumuzun ünvanı

19.10.2026 [12:49]

20 Oktyabr – Zəngilan Şəhəri Günü xalqımızın yaddaşına əbədi həkk olunmuş şanlı tarixlərdən biridir. Bu gün Azərbaycan xalqı 27 illik həsrətin sona çatmasını, doğma torpaqlarımızın azadlığını və milli iradəmizin təntənəsini böyük qürur hissi ilə qeyd edir. Zəngilanın azad edilməsi yalnız bir şəhərin düşmən işğalından qurtuluşu deyil, həm də Azərbaycanın ərazi bütövlüyünün bərpasına doğru atılmış mühüm tarixi addım idi.

1993-cü il oktyabrın 29-da Ermənistan silahlı qüvvələri tərəfindən işğal edilən Zəngilan uzun illər ərzində ağır dağıntılara, talanlara və ekoloji terrora məruz qaldı. Minlərlə insan doğma evindən didərgin düşərək həyatını məcburi köçkünlük şəraitində davam etdirməli oldu. Zəngilanlıların qəlbində isə bir arzu yaşayırdı: ata-baba yurduna qayıtmaq, doğma torpağın havasını yenidən udmaq və Vətən torpağında azad yaşamaq.

Bu arzu 2020-ci il oktyabrın 20-də gerçəyə çevrildi. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun apardığı uğurlu hərbi əməliyyatlar nəticəsində Zəngilan şəhəri işğaldan azad edildi. Vətən müharibəsinin 24-cü günündə əldə edilən bu qələbə Azərbaycanın hərbi qüdrətini, əsgər və zabitlərimizin peşəkarlığını, xalqımızın sarsılmaz birliyini bütün dünyaya nümayiş etdirdi.

Zəngilanın azadlığı uğrunda canından keçən şəhidlərimizin xatirəsi hər bir azərbaycanlının qəlbində yaşayır. Qəhrəman əsgərlərimiz ən çətin döyüşlərdə belə geri çəkilmədən irəliləyərək üçrəngli bayrağımızı doğma torpaqlarımızda dalğalandırdılar. Onların fədakarlığı sayəsində bu gün Zəngilanın küçələrində həyat yenidən canlanır, torpağın bağrında quruculuq işləri aparılır. Şəhidlərimizin əziz xatirəsini yaşatmaq, qazilərimizə və şəhid ailələrinə ehtiram göstərmək hər birimizin mənəvi borcudur.

Prezident İlham Əliyevin qətiyyətli siyasi iradəsi və Azərbaycan Ordusunun rəşadəti ilə qazanılan Zəfər ölkəmizin tarixində yeni mərhələnin əsasını qoydu. Dövlət başçısının Zəngilana səfərləri, burada həyata keçirilən layihələrlə yaxından maraqlanması və şəhərin gələcəyinə yönəlmiş təşəbbüsləri azad edilmiş torpaqların dirçəldilməsinin dövlət siyasətinin prioritet istiqamətlərindən olduğunu göstərir.

Təsadüfi deyil ki, Prezident İlham Əliyevin 31 iyul 2023-cü il tarixli Sərəncamı ilə 20 oktyabr Zəngilan Şəhəri Günü təsis edildi. Bu qərar tarixi qələbənin əbədiləşdirilməsi, xalqımızın yaddaşında Zəngilanın azadlıq gününün yaşadılması baxımından mühüm əhəmiyyət daşıyır.

Bu gün Zəngilanın adı həm qəhrəmanlıq, həm də milli birlik anlayışları ilə yanaşı çəkilir. Onun azadlığı Azərbaycanın öz torpaqlarına sahib çıxmaq əzmini, haqq uğrunda mübarizəsini və tarixi ədalətin bərpasını təcəssüm etdirir. Zəngilanın hər qarışında şəhidlərimizin qanı, qazilərimizin fədakarlığı və xalqımızın Vətən sevgisi var.

20 Oktyabr bizi həm qürurlandırır, həm də məsuliyyətimizi xatırladır. Qazanılmış Zəfəri qorumaq, azad edilmiş torpaqları abadlaşdırmaq və gələcək nəsillərə güclü Azərbaycan miras qoymaq hamımızın qarşısında duran mühüm vəzifədir.

Zəngilanın azadlığı bir daha sübut etdi ki, xalq öz torpağına bağlılığını itirmədikdə, dövlət və ordu bir yumruq kimi birləşdikdə ən çətin məqsədlərə belə çatmaq mümkündür. Bu gün Zəngilan azaddır, Azərbaycan bütövdür, üçrəngli bayrağımız doğma torpaqlarımızda qürurla dalğalanır.

YAP Samux rayon təşkilatının sədr müavini Sevinc Xəlilova

Paylaş:

Baxılıb: 74 dəfə

Xəbər lenti

Hamısına bax