İsveçdə qış günlərinin sayı azalır

Bakı:

22 °C

68 %

4 m/s

Əlaqə

AZ RU EN

Ana səhifə / Dünya / İsveçdə qış günlərinin sayı azalır

İsveçdə qış günlərinin sayı azalır

22.12.2025 [09:18]

Son bir neçə onillik ərzində İsveçdə qışın bir neçə həftəsi yoxa çıxıb. İsveçin cənub bölgələrində qışın, ümumiyyətlə, baş verməməsi artıq yeni norma kimi qəbul olunur.

AZƏRTAC xəbər verir ki, İsveç Meteorologiya və Hidrologiya İnstitutunun (SMHI) məlumatları dəyişikliklərin sistemli və sürətlənən xarakter daşıdığını göstərir.

Bu ilin dekabr ayı da mövcud tendensiyanın növbəti təsdiqi olub. Ayın birinci yarısında ölkənin əksər regionlarında havanın temperaturu iqlim normasından 7-8 dərəcə yüksək olub.

Qışların tədricən yoxa çıxması təkcə mövsümi idman növlərinə və “ağ Milad” ümidlərinə zərbə vurmur, eyni zamanda, cəmiyyətin bir çox sahəsində gözlənilməz problemlər yaradır. Paralel olaraq göllərdə buz örtüyünün formalaşması kəskin şəkildə azalıb. 2019/2020-ci illər mövsümündə İsveçin cənubunda müşahidələrin bütün tarixi ərzində ilk dəfə olaraq heç bir buzlaşma halı qeydə alınmayıb. Bu, yalnız qış istirahətinə deyil, həm də göl ekosistemlərinə təsir göstərir, belə ki, suyun keyfiyyəti pisləşir, yosunların artımı güclənir, içməli su təminatı üçün risklər artır.

İqtisadi nəticələr isə ziddiyyətlidir: bir tərəfdən isitmə məqsədilə elektrik enerjisinə tələbat azalır, digər tərəfdən dağ-xizək sənayesi ciddi itkilərlə üzləşir. Proqnozlara görə, kurortlarda qar örtüyünün həcmi 25-40 faiz azalacaq, qış mövsümü isə daha qısa və qeyri-sabit olacaq.

Ölkənin demək olar ki, bütün ərazisində qar örtüyü azalır. İsveçin cənub və mərkəzi hissələrində qarlı günlərin sayı təxminən bir ay azalıb. Şimal bölgələrində qar daha uzun müddət qalsa da, temperaturun sıfır dərəcə ətrafında tez-tez dəyişməsi təhlükəli buzlaşmaya, qeyri-sabit buz örtüyünə və qar uçqunu riskinin artmasına səbəb olur.

Daha bir ciddi problem torpağın donmamasıdır. Daha mülayim və rütubətli qışlar torpaq qatının dayanıqlığını zəiflədir, qış fırtınaları zamanı meşələrə, avtomobil və dəmir yollarına, həmçinin elektrik ötürücü xətlərə ziyan dəyməsi riskini artırır. Meşə təsərrüfatı yeni çağırışlarla üzləşir: yumşaq torpaqda ağır texnikanın istifadəsi daha böyük ziyan vurur, xüsusilə ekstremal yay leysanları ilə birgə eroziya və sürüşmə ehtimalını gücləndirir.

İqlimşünaslar mədəni dəyişiklikləri də qeyd edirlər. Ölkənin cənubunun bir sıra regionlarında meteoroloji qış artıq, ümumiyyətlə, başlamır, payız mövsümü isə fevralın ortalarınadək davam edir. Bu hal yeni bir anlayışın - “qışsız dövr”ün formalaşmasına səbəb olub.

Paylaş:

Baxılıb: 712 dəfə