Fransada inklüziv təhsil böhranı: 48 mindən çox əlilliyi olan şagird müşayiətçisiz qalıb

Bakı:

26 °C

49 %

1 m/s

Əlaqə

AZ RU EN

Ana səhifə / Dünya / Fransada inklüziv təhsil böhranı: 48 mindən çox əlilliyi olan şagird müşayiətçisiz qalıb

Fransada inklüziv təhsil böhranı: 48 mindən çox əlilliyi olan şagird müşayiətçisiz qalıb

11.02.2026 [22:28]

Fransada inklüziv təhsilin həyata keçirilməsi ilə bağlı çətinliklər davam edir. Milli Təhsil Nazirliyinin məlumatlarına görə, ötən tədris ilinin əvvəlində əlilliyi olan 48 min 726 əlilliyi olan şagird müşayiətçi ilə təmin olunmayıb. Bu rəqəm Departament Əlillik evləri (MDPH) tərəfindən müşayiət qərarı verilmiş təxminən 352 min şagirdin 14,2 faizinə bərabərdir.

AZƏRTAC xəbər verir ki, bu narahatedici göstəricilər Milli Assambleyada sosialist partiyasından olan deputat Fatiha Kelua Haşi tərəfindən gündəmə gətirilib. Deputat vəziyyətin 2024-cü illə müqayisədə daha da pisləşdiyini bildirib və müşayiətsiz qalan şagirdlərin sayının bir il ərzində 35 faiz artdığını vurğulayıb. Sözügedən məlumatlar parlamentin istintaq komissiyasının işi çərçivəsində hazırlanıb və komissiyanın məruzəçisi Sebastyən Sən-Pastör tərəfindən açıqlanıb.

Fatiha Kelua Haşi müşayiətçi çatışmazlığının ağır nəticələrə səbəb olduğunu qeyd edib. Onun sözlərinə görə, bir çox uşaqlar faktiki olaraq təhsildən kənarda qalır, valideynlər isə iş qrafiklərini dəyişməyə və ya peşə fəaliyyətlərini tamamilə dayandırmağa məcbur olurlar. Eyni zamanda, müəllimlər də artıq yüklənmiş siniflərdə işləmək məcburiyyətində qalırlar. Deputat müşayiətçilərin zəif status və aşağı maaş problemi ilə üzləşdiyini xatırladaraq, onların dövlət qulluqçusu statusu, iş vaxtı və peşə hazırlığı ilə bağlı genişmiqyaslı islahatın başlanmasına çağırıb.

Hökumət adından cavab verən milli təhsil naziri Eduard Joffre isə müşayiətçilərin inklüziv məktəbdə həlledici rol oynadığını bildirib. O qeyd edib ki, 2017-ci ildən bəri müşayiətçilərin sayı 68 faiz artıb və bu peşə milli təhsil sistemində ikinci ən geniş yayılmış iş sahəsinə çevrilib. Nazir, həmçinin son iki ildə onların əməkhaqlarının 13 faiz artırıldığını və üç ildən sonra müddətsiz əmək müqaviləsi ilə işə qəbul olunduqlarını xatırladıb. Onun sözlərinə görə, müşayiət hüququ verilən uşaqların sayı hər il 10–13 faiz artır ki, bu da sistem üzərində ciddi təzyiq yaradır. Nazir vurğulayıb ki, inklüziv təhsil yalnız fərdi insan müşayiəti ilə məhdudlaşmamalı, eyni zamanda, pedaqoji və maddi əlçatanlıq prinsipləri gücləndirilməlidir.

Nazir, həmçinin təhsil və tibbi-sosial marşrutlar arasındakı uyğunsuzluqlara diqqət çəkib. Onun sözlərinə görə, minlərlə şagird, əslində, tibbi-pedaqoji institutlara aid olsa da, adi məktəb sistemində təhsil almaqda davam edir. Müşayiətçilərin dövlət qulluqçusu statusuna keçirilməsi məsələsinə gəlincə, nazir bu variantın araşdırılacağını, lakin iş vaxtı və coğrafi mobillik baxımından çətinliklər yaratdığını bildirib.

Mövcud vəziyyət fonunda “Hamı üçün inklüziv məktəb” (Une École Inclusive pour Tous) assosiasiyası MDPH qərarlarının yerinə yetirilməməsi səbəbilə onlarla məhkəmə iddiaları qaldıracağını elan edib. Bu addım Fransada inklüziv təhsilin tətbiqi ətrafında davam edən dərin narazılığı və struktur böhranı bir daha üzə çıxarır.

Paylaş:

Baxılıb: 444 dəfə