Ermənistanda etiraz aksiyalarının yeni dalğası başlayıb

Bakı:

18 °C

82 %

1 m/s

Əlaqə

AZ RU EN

Ana səhifə / Dünya / Ermənistanda etiraz aksiyalarının yeni dalğası başlayıb

Ermənistanda etiraz aksiyalarının yeni dalğası başlayıb

12.08.2020 [08:49]

İşğalçı ölkədə Paşinyana qarşı ittihamlara diaspordakı ermənilərin tənqidləri də əlavə olunub
Məlum olduğu kimi, son günlər işğalçı Ermənistanda daxili vəziyyət həddindən artıq gərginləşib. Pandemiyanın yaratdığı problemlərin həllində acizlik nümayiş etdirən baş nazir Nikol Paşinyanın fəaliyyətsizliyi işğlçı ölkədə böhranın daha da dərinləşməsinə gətirib çıxarıb. Ölkədə pandemiya ilə əlaqədar vəziyyət isə olduqca acınacaqlıdır. Belə ki, yoluxanlarn sayı artıq 40 min nəfəri, ölənlərin sayı isə 1000 nəfəri ötüb. Üstəlik, ölkə vətəndaşlarının problemlərini həll etmək iqtidarında olmayan indiki hakimiyyət ciddi tənqid atəşinə tutulur.
Livan ermənilərinin hamısının Ermənistana gətirilməsi tələb edilir
Bununla yanaşı, hökumətə qarşı mediada tənqidlər genişlənir, bu və ya digər səbəbdən narazı kütlələr küçələrə çıxır, etraz aksiyası keçirirlər. Belə ki, son günlər “Amulsar” mədəni ətrafında və Livanda baş verən hadisələrə görə parlament və hökumət binası qarşısında aksiyalar keçirilir.
“News.am” saytı yazır ki, Livandan olan bir qrup erməni avqustun 10-da Ermənistan hökumətinin binası qarşısında etiraz aksiyası keçirib. “N.Paşinyan guya 2018-ci ildə Ermənistanda demokratiyanın qurulduğunu və birbaşa hökumətlə danışa biləcəyimizi söyləyib. Ancaq indi hökümətin qəbul otağında məktublar qəbul edilmir”, - deyə, aksiya iştirakçılarından biri, “Hayk” millətçi hərəkatının üzvü Hrayr Kostanyan bildirib. Xatırladaq ki, Livan erməniləri və digər hərəkat üzvləri hakimiyyətdən livanlı ermənilərin hamısının Ermənistana gətirilməsini tələb ediblər.
“Amulsar” mədəni ətrafında qalmaqal səngimir
Son günlər “Amulsar” mədəni ətrafında baş verən hadisələrə görə hökumət və parlalment binaları qarşısında keçirilən etiraz aksiyaları da birbaşa N.Paşinyan hədəfə alınıb. “Aysor.am”a müsahibəsində baş nazirin mətbuat katibi Mane Gevorkyan bildirib ki, baş nazir etirazçılarla görüşmək istəmir.
Qeyd edək ki, “Amulsar” mədəninin yenidən istismar edilməsi xəbərlərinə etiraz olaraq yerli sakinlərin və ətraf mühitin mühafizəsi təşkilatlarının aksiyaları artıq bir həftədir ki, davam edir. Vəziyyət “Lydian-Armenia” şirkətinin təhlükəsizlik xidməti əməkdaşları tərəfindən “Amulsar”ın müdafiəçilərinə məxsus vaqonların ərazidən köçürülməsindən sonra daha da gərginləşib. Erməni mediası yazır ki, 2 ildir “Amulsar” yatağında fəaliyyətinə mane yaradılan “Lydian-Armenia” artıq yenidən istismar üçün hazırlıq işlərinə başlayıb.
Yeri gəlmişkən, Polis xidmətinin keçmiş rəisi Vladimir Qasparyan PARA TV-yə müsahibəsində Ermənistanda vəziyyətin olduqca təhlükəli olduğunu deyib. “İnsanlar artıq telefonla danışmaqdan çəkinirlər. Qorxmuş insanlar hakimiyyəti dəstəkləməyəcək”, - deyə Qasparyan bildirib. Onun sözlərinə görə, hazırda dövlətin təhdid altında olduğunu göstərən amillər mövcuddur.
“Paşinyan “Soros” tərəfindən, bəlkə də, şeytanın özü tərəfindən göndərilib”
Yuxarıda qeyd etdiyimiz kimi, təkcə daxildəki deyil, xaricdəki ermənilər də N.Paşinyanın siyasətinə qarşı çıxır. Ona görə ki, N.Paşinyan öz fəaliyyəti ilə diasporla münasibətləri də korlayıb. “Aysor.am”da yer alan məqalədə isə qeyd edilir ki, populist bəyanatlardan başqa rəsmi İrəvanın diasporla iş üzrə heç bir real gündəmi və fəaliyyət proqramı yoxdur.
Təsadüfi deyil ki, Rusiyadakı erməni diasporunun nümayəndələri N.Paşinyanı təhqir dərəcəsində tənqid atəşinə tuturlar. Belə ki, bu yaxınlarda məqalələrlə çıxış edərək Paşinyanın əsl simasını üzə çıxaran “Russia Today” telekanalının baş redaktoru Marqarita Simonyandan sonra, onun həyat yoldaşı, rusiyalı kinorejisor Tiqran Keosayan da baş naziri kəskin tənqid edib.
O, Paşinyanın “Soros” tərəfindən, bəlkə də şeytanın özü tərəfindən qlobalizm ideyaları altında xalqın dəyərlərini məhv etmək yönündə fikirləri təbliğ etmək məqsədilə Ermənistana göndərildiyini iddia edib. Rusiyalı kinorejissor Ermənistanın baş nazirinin aqibətinin yaxşı olmayacağı barədə ehtimal da irəli sürüb.
Q.ZİYƏDDİNOĞLU