Jurnalistika üzrə magistratura ixtisaslaşmalarına qəbul üçün qabiliyyət imtahanına qeydiyyat başlayıb

Bakı:

25 °C

65 %

12 m/s

AZ RU EN

Ana səhifə / Elm / Jurnalistika üzrə magistratura ixtisaslaşmalarına qəbul üçün qabiliyyət imtahanına qeydiyyat başlayıb

Jurnalistika üzrə magistratura ixtisaslaşmalarına qəbul üçün qabiliyyət imtahanına qeydiyyat başlayıb

06.07.2026 [14:10]

Dövlət İmtahan Mərkəzi (DİM) ali təhsil müəssisələrinin magistratura səviyyəsində jurnalistika üzrə ixtisaslaşmalara qəbul üçün keçiriləcək qabiliyyət imtahanında iştirak etmək istəyən namizədlərin qeydiyyatına başlayıb.

DİM-dən AZƏRTAC-a bildirilib ki, cari ildə magistraturaya qəbul imtahanında 50 və daha çox bal toplayaraq müsabiqə şərtlərini ödəyən və ixtisaslaşma seçiminə buraxılan bütün bakalavrlar, bitirdikləri ixtisasdan asılı olmayaraq, jurnalistika üzrə magistratura ixtisaslaşmalarına qəbul olmaq üçün müraciət edə bilərlər. Qabiliyyət imtahanında iştirak etmək istəyən namizədlər iyulun 6-dan 10-dək saat 15:00-dək DİM-in elektron xidmətlər portalında sorğu anketini doldurmaqla qeydiyyatdan keçməlidirlər.

Azərbaycan Dövlət Bədən Tərbiyəsi və İdman Akademiyasının tədrisi ingilis dilində aparılan “İdman jurnalistikası” ixtisasını seçmək istəyən bakalavrlar isə jurnalistika üzrə tələb olunan minimum 50 bal toplamaqla yanaşı, xarici dil üzrə test mərhələsində azı 20 bal əldə etməlidirlər.

Namizədlər iyulun 14-dən etibarən bakalavrın qabiliyyət imtahanına buraxılış vərəqəsini çap edə biləcəklər. Qabiliyyət imtahanının iyulun 15-dən keçirilməsi nəzərdə tutulur.

Qabiliyyət imtahanında iştirak ödənişlidir. Namizədlər qeydiyyat zamanı Azərbaycan Respublikasının Tarif (qiymət) Şurası tərəfindən müəyyən edilmiş 40 manat məbləğində ödənişi şəxsi kabinetləri vasitəsilə həyata keçirməlidirlər.

Qeydiyyat zamanı bakalavrlar dövri mətbuatda dərc olunmuş 2-3 jurnalistika materialının, onlayn və audiovizual mediada yayımlanmış çıxışlarının elektron variantını, həmçinin həmin materialların müəllifə məxsus olmasını təsdiq edən media subyektinin arayışını magistratura@dim.gov.az ünvanına göndərməlidirlər.

İmtahan zamanı namizədlər şəxsiyyət vəsiqəsini, buraxılış vərəqəsini, təqdim etdikləri jurnalistika materiallarını və müəlliflik arayışını komissiyaya təqdim etməlidirlər. Sənədlərdən hər hansı biri olmadıqda və ya uyğunsuzluq aşkar edildikdə namizəd imtahana buraxılmayacaq.

Qabiliyyət imtahanı iki mərhələdən ibarət olacaq. Birinci mərhələdə namizədin çap, onlayn və audiovizual mediada yayımlanmış jurnalistika materialları qiymətləndiriləcək. İkinci mərhələdə isə şifahi müsahibə və yazılı tapşırıq vasitəsilə namizədin ümumi dünyagörüşü, jurnalistika sahəsində nəzəri və praktiki bilikləri, peşə etikası, media mühiti barədə məlumatlılığı, analitik düşüncə və yazı bacarıqları yoxlanılacaq.

Hər iki mərhələ 5 ballıq şkala üzrə qiymətləndiriləcək. Hər mərhələdən azı 3, ümumilikdə isə minimum 6 bal toplayan bakalavrlar proqram və ixtisaslaşma seçimi zamanı jurnalistika üzrə ixtisaslaşmaları seçmək hüququ qazanacaqlar.

Müsabiqə namizədlərin qabiliyyət imtahanında topladıqları yekun bala əsasən aparılacaq.

Paylaş:

Baxılıb: 110 dəfə