Azərbaycan Milli Elmlər Akademiyası rəyasət heyətinin növbəti iclasında bir sıra mühüm qərarlar qəbul edilib

Bakı:

15°C

77%

4m/s

AZ RU EN

Ana səhifə / Elm / Azərbaycan Milli Elmlər Akademiyası rəyasət heyətinin növbəti iclasında bir sıra mühüm qərarlar qəbul edilib

Azərbaycan Milli Elmlər Akademiyası rəyasət heyətinin növbəti iclasında bir sıra mühüm qərarlar qəbul edilib

10.04.2014 [09:18]

Aprelin 9-da Azərbaycan Milli Elmlər Akademiyası (AMEA) rəyasət heyətinin növbəti iclası keçirilib.
AzərTAc xəbər verir ki, iclası AMEA-nın prezidenti, akademik Akif Əlizadə açaraq iştirakçıları gündəlikdə duran məsələlərlə tanış edib.
Birinci məsələnin müzakirəsi zamanı bildirilib ki, AMEA-nın Botanika İnstitutunun alimləri eukariot genomlarının təşkili, ekspressiyası və təkamülünün xüsusiyyətlərinin kompyuter analizi sahəsində mühüm tədqiqatlar aparıb, bir sıra bioinformatik analiz vasitələri əldə ediblər. Bu işlər institutun bioloji məhsuldarlığın fundamental problemləri şöbəsinin rəhbəri, AMEA-nın həqiqi üzvü, professor Cəlal Əliyev və bioinformatika laboratoriyasının müdiri, biologiya üzrə elmlər doktoru İlham Şahmuradovun rəhbərliyi ilə həyata keçirilib.
Qeyd olunub ki, araşdırmalar əsasında fundamental və praktiki əhəmiyyət kəsb edən bir sıra önəmli nəticələr alınıb.
İclasda bioinformatika laboratoriyasının müdiri, biologiya üzrə elmlər doktoru İlham Şahmuradovun həmin araşdırmaların nəticələrindən bəhs edən “İnteqrativ biologiya və bioinformatika” mövzusunda məruzəsi dinlənilib.
Bildirilib ki, aparılan tədqiqatlar sayəsində insan, heyvan və bitki genomlarının fəaliyyətini tənzimləyən bəzi elementlərin axtarışı üzrə yüksək dəqiqliyə malik kompyuter proqramları, bitki promotorları üzrə məlumat bazası yaradılıb. Ali bitkilərdə plastid və mitoxondrilərdən nüvəyə gen transferinin bir sıra təkamül və funksional xüsusiyyətləri aşkar edilib.
Diqqətə çatdırılıb ki, bioinformatika sahəsində elmi terminlər üzrə Azərbaycan dilində ilk izahlı lüğət tərtib olunub. Həmçinin qeyd edilib ki, son 15 ildə biologiyanın inkişafında digər önəmli məqam müxtəlif elm sahələrindən bilik və tədqiqat vasitələri əsasında elmlərarası yeni bir sahənin - inteqrativ biologiyanın formalaşması və sürətlə inkişaf etməsidir.
Bildirilib ki, eukariot genomlarının təşkili, ekspressiyası və təkamülünün xüsusiyyətlərinin kompyuter analizi sahəsində aparılmış tədqiqatlar nəticəsində insan, heyvan və bitki genomlarının fəaliyyətini tənzimləyən bəzi elementlərin axtarışı üzrə yüksək dəqiqliyə malik kompyuter proqramları, bitki promotorları üzrə məlumat bazası yaradılıb. Ali bitkilərdə plastid və mitoxondrilərdən nüvəyə gen transferinin bir sıra təkamül və funksional xüsusiyyətləri aşkar edilib.
Vurğulanıb ki, tədqiqatlarda ABŞ-ın, Birləşmiş Krallığın, Pakistanın və Səudiyyə Ərəbistanı Krallığının aparıcı elmi mərkəzlərinin alimləri də iştirak edib, nəticələr barədə beynəlxalq elmi konfranslarda məruzələr dinlənilib.
İclasda AMEA-nın 70 illik yubileyinə həsr olunmuş tədbirlər planının layihəsi müzakirə edilib, bu sənəd təkmilləşdirildikdən sonra Nazirlər Kabinetinə təqdim olunması barədə qərar qəbul olunub.
AMEA rəyasət heyətinin iclasında, həmçinin Prezident İlham Əliyevin müvafiq Sərəncamı ilə Azərbaycanda 2014-cü ilin “Sənaye ili” elan edilməsi ilə bağlı akademiyanın və onun aidiyyəti qurumlarının üzərinə düşən vəzifələrin icrası ilə bağlı müzakirələr aparılıb.
Akademiyanın rəyasət heyətinin qərarı əsasında AMEA-nın bir sıra alimləri adlı mükafatlara layiq görülüblər. Bildirilib ki, mükafatların təsis olunmasının məqsədi elmin inkişafında mühüm nailiyyətlər əldə edən alimləri daha yüksək səviyyəli tədqiqatlara həvəsləndirmək və Azərbaycanda görkəmli alimlərinin xatirəsini əbədiləşdirməkdir.
Aktual elmi və texnoloji problemlərin həllinə yönəlmiş elmi-tədqiqat proqramlarının seçilməsi və maliyyələşdirilməsi üçün müsabiqə elan edilməsi, həmçinin AMEA üzvlüyünə seçkilərlə əlaqədar elmi bölmələrdə ekspert komissiyalarının yaradılması haqqında qərarlar qəbul edilib. Eyni zamanda, akademiyanın yeni nizamnamə layihəsi bəyənilib və ümumi yığıncağın müzakirəsinə verilməsi qərara alınıb.
Rəyasət heyətinin növbəti qərarları ilə AMEA-nın 19 institut və təşkilatının direktorlarının təyinatları təsdiq olunub, Mərkəzi Nəbatat Bağının direktoru vəzifəsinin icrası isə Botanika İnstitutunun direktoru, biologiya üzrə elmlər doktoru Validə Əlizadəyə həvalə edilib.

Paylaş:

Baxılıb: 2003 dəfə