Bakıda “İnformal və qeyri-formal üsullarla əldə edilmiş səriştələrin tanınması” mövzusunda müzakirələr aparılıb

Bakı:

24 °C

57 %

6 m/s

AZ RU EN

Ana səhifə / Elm / Bakıda “İnformal və qeyri-formal üsullarla əldə edilmiş səriştələrin tanınması” mövzusunda müzakirələr aparılıb

Bakıda “İnformal və qeyri-formal üsullarla əldə edilmiş səriştələrin tanınması” mövzusunda müzakirələr aparılıb

01.11.2018 [09:05]

Oktyabrın 31-də Bakıda Azərbaycan Respublikasının Təhsil Nazirliyi, Avropa İttifaqı və BMT-nin İnkişaf Proqramının birgə reallaşdırdığı “Azərbaycanda peşə təhsili və təlimi mərkəzlərinin müasirləşdirilməsi” qrant proqramı çərçivəsində “İnformal və qeyri-formal üsullarla əldə edilmiş səriştələrin tanınması” mövzusunda konfrans keçirilib.
AZƏRTAC xəbər verir ki, müvafiq qurumların nümayəndələrinin, peşə təhsili müəssisələri əməkdaşlarının, Avropa İttifaqının Azərbaycandakı nümayəndəliyi təmsilçilərinin, ekspertlərin iştirak etdikləri tədbirdə təhsil naziri Ceyhun Bayramov ölkəmizdə peşə təhsilinin inkişafına xüsusi önəm verildiyini bildirib və bu sahədə həyata keçirilən tədbirlərdən danışıb. Nazir peşə təhsilinin ölkənin sosial-iqtisadi inkişafına təkan verən, iqtisadiyyatın bütün sahələri üçün ixtisaslı kadr hazırlığını təmin edən aparıcı təhsil pilləsi olduğunu, bu sahədə ölkə rəhbərliyi tərəfindən məqsədyönlü tədbirlərin həyata keçirildiyini diqqətə çatdırıb.
C.Bayramov “Peşə təhsili və təliminin inkişafına dair Strateji Yol Xəritəsi”, “Peşə təhsili haqqında” Qanunun əhəmiyyətini qeyd edib, peşə təhsilində uğurlu nəticələrin əldə olunacağına əminliyini vurğulayıb. Nazir informal və qeyri-formal üsullarla əldə edilmiş səriştələrin tanınmasının Strateji Yol Xəritəsinin əsas hədəflərindən biri olduğunu deyib. O, bu sahədə beynəlxalq əməkdaşlığın səmərəli olduğunu vurğulayıb.
Əmək və əhalinin sosial müdafiəsi naziri Sahil Babayev iqtisadiyyatda müasir meyillərin peşə təhsili qarşısında yeni tələblər qoyduğunu və əmək bazarında rəqabətə davamlı ixtisaslı kadrlara tələbatın artdığını söyləyib, kadr hazırlığı sisteminin inkişafı istiqamətində kompleks tədbirlərin həyata keçirilməsinin vacibliyini diqqətə çatdırıb.
BMT-nin Azərbaycandakı rezident əlaqələndiricisi və BMT-nin İnkişaf Proqramının rezident nümayəndəsi Qulam İsaqzai həyata keçirilən layihələrin ölkəmizdə peşə təhsili sisteminin məzmun və keyfiyyətinin yaxşılaşdırılmasına təkan verdiyini bildirib, yeni yaradılan mərkəzlərin peşə təhsilinin inkişafı sahəsində mühüm rol oynayacağına inamını ifadə edib.
Avropa İttifaqının Azərbaycandakı nümayəndəliyinin əməkdaşı Aleksandra Nerisanu təmsil olunduğu qurum ilə ölkəmiz arasında əlaqələrin yüksələn xətt üzrə inkişaf etdiyini, əsas diqqətin respublikamızda peşə təhsilinə yönəldiyini və bir sıra birgə layihələrin həyata keçirildiyini söyləyib.
Tədbirdə informal və qeyri-formal üsullarla əldə edilmiş səriştələrin tanınması mexanizmi ilə bağlı beynəlxalq təcrübənin öyrənilməsi və hazırlanacaq normativ sənədlərlə bağlı geniş müzakirələr aparılıb.
Sonra plenar iclaslarda “Vətəndaşların qeyri-formal və informal təhsil formaları vasitəsilə əldə etdikləri bilik, bacarıq, səriştə və təcrübənin qiymətləndirilməsi və tanınması Qaydaları” layihəsi barədə beynəlxalq ekspertlərin fikirləri dinlənilib.
Qeyd edək ki, konfrans Avropa İttifaqının maliyyə dəstəyi ilə BMT-nin İnkişaf Proqramı tərəfindən icra olunan “Gəncədə Sənaye üzrə Regional Peşə Kompetensiya Mərkəzinin yaradılmasına dəstək” layihəsi çərçivəsində reallaşdırılıb.

Paylaş:

Baxılıb: 1838 dəfə