Bakıda akademik Mahmud Kərimovun 70 illik yubileyinə həsr olunan beynəlxalq konfrans işinə başlayıb

Bakı:

15 °C

94 %

0 m/s

Əlaqə

AZ RU EN

Ana səhifə / Elm / Bakıda akademik Mahmud Kərimovun 70 illik yubileyinə həsr olunan beynəlxalq konfrans işinə başlayıb

Bakıda akademik Mahmud Kərimovun 70 illik yubileyinə həsr olunan beynəlxalq konfrans işinə başlayıb

14.11.2018 [10:05]

Noyabrın 13-də Bakıda Azərbaycan Milli Elmlər Akademiyasında (AMEA) mərhum akademik Mahmud Kərimovun anadan olmasının 70 illiyinə həsr edilən “Radiasiya prosesləri və onların tətbiqi” mövzusunda beynəlxalq konfrans işinə başlayıb.
AZƏRTAC xəbər verir ki, AMEA-nın Rəyasət Heyətinin, akademiyanın Fizika-Riyaziyyat və Texnika Elmləri Bölməsinin və Radiasiya Problemləri İnstitutunun birgə təşkilatçılığı ilə keçirilən ikigünlük tədbir radiasiya materialşünaslığı, radiasiya təhlükəsizliyi, radioekologiya, radiasiya texnologiyalarının təbabət və ətraf mühit problemlərinin həllinə tətbiqi mövzularında müzakirələri əhatə edir.
Konfransda Azərbaycan alimləri ilə yanaşı, Rusiya, Ukrayna, Qazaxıstan, Gürcüstan, Türkiyə, İran və digər ölkələrdən də alimlər iştirak edirlər.
Tədbirdə çıxış edən AMEA-nın prezidenti, akademik Akif Əlizadə Mahmud Kərimovun mənalı ömür yolundan, zəngin elmi yaradıcılığından, qazandığı nailiyyətlərdən söz açıb. Qeyd edib ki, akademik Mahmud Kərimovun Azərbaycanda fizika elminin inkişafında, bu sahədə uğurlu tədqiqatların aparılmasında böyük xidmətləri olub. Onun rəhbərliyi ilə radiasiya təhlükəsizliyi, radioekologiya, radiasiya materialşünaslığı və digər istiqamətlərdə yeni fundamental elmi və texniki tədqiqat işləri təşkil edilib.
A.Əlizadə akademik M.Kərimovun AMEA-nın prezidenti olduğu müddətdə elm təşkilatçısı kimi ölkəmizdə elmin inkişafında dərin iz qoyduğunu, akademiyanın elmi əlaqələrinin inkişafında mühüm rolu olduğunu deyib.
AMEA-nın Fizika-Riyaziyyat və Texnika Elmləri Bölməsinin akademik-katibi, akademik Nazim Məmmədov qeyd edib ki, M.Kərimovun elmi fəaliyyəti əsasən dielektriklər fizikası ilə bağlı olub. Akademik ilk dəfə olaraq polimer dielektriklərdə güclü elektrik sahəsinin təsiri ilə baş verən elementar elektron və molekulyar prosesləri tədqiq edib. Materialların xassələrinin fiziki üsullarla idarə edilməsi, polimer dielektriklərin elektrik köhnəlməsi və dağılması mexanizmlərini aydınlaşdırıb.
N.Məmmədov ömrünün 40 ilini Azərbaycan elminin inkişafına həsr edən, çoxsaylı elmi kadrlar hazırlamış alimin 200-dən çox elmi əsərin və bir neçə ixtiranın müəllifi olduğunu deyib. Qeyd edib ki, onun elmi yenilikləri çoxsaylı patent və müəlliflik şəhadətnamələri ilə rəsmiləşdirilib.
Daha sonra Radiasiya Problemləri İnstitutunun direktoru, AMEA-nın müxbir üzvü Oqtay Səmədov, Bakı Dövlət Universitetinin rektoru, akademik Abel Məhərrəmov, AMEA-nın Kimya Elmləri Bölməsinin akademik-katibi vəzifəsini icra edən, akademik Vaqif Fərzəliyev, “Azərenerji” ASC-nin “Azərbaycan Elmi-Tədqiqat və Layihə-Axtarış Energetika İnstitutu” MMC-nin direktoru, akademik Arif Həşimov, AMEA-nın İdarəetmə Sistemləri İnstitutunun direktoru, akademik Telman Əliyev, Milli Nüvə Tədqiqatları Mərkəzinin sədri, akademik Adil Qəribov və digər çıxış edənlər görkəmli alimlə bağlı xatirələrini bölüşüblər.
Noyabrın 14-də başa çatacaq konfrans Radiasiya Problemləri İnstitutunda plenar məruzələrin dinlənilməsi ilə işinə davam edib.

Paylaş:

Baxılıb: 1643 dəfə