Regional sənaye quruculuğunda yaxşı nəticələr

Bakı:

24 °C

53 %

4 m/s

Əlaqə

AZ RU EN

Ana səhifə / Gündəm / Regional sənaye quruculuğunda yaxşı nəticələr

Regional sənaye quruculuğunda yaxşı nəticələr

30.10.2025 [11:55]

Həm daxili tələbat ödənilir, həm də xaricə mal ixrac olunur

Azərbaycan nümunəvi inkişaf modelinə malik olan ölkədir. Davamlı inkişafın bütün ölkə boyunca təmin edilməsi isə dünyada böyük maraqla qarşılanan bu modelin ən səciyyəvi cəhətlərindən birini təşkil edir. Respublikamızda 2004-cü ildən etibarən Prezident İlham Əliyevin imzaladığı müvafiq sərəncamlara uyğun olaraq regionların sosial-iqtisadi inkişafına dair Dövlət proqramları reallaşdırlır. Ötən dövrdə yerli iqtisadi potensial və tarixi əmək ənənələri nəzərə alınmaqla hazırlanan bu proqramlar çərçivəsində böyük həcmlərdə investisiya qoyuluşu hesabına ölkənin bütün bölgələrində yüksəksəviyyəli infrastruktur qurulub, yeni istehsal müəssisələri yaradılıb, quruculuq-abadlıq işləri görülüb.

Əlamətdar haldır ki, Prezident İlham Əliyev regionlarda müxtəlif layihələrin yüksək səviyyədə həyata keçirilməsinə xüsusi diqqət yetirir. Dövlətimizin başçısı mütəmadi qaydada regionlara səfərlərə gedir, ictimaiyyətin nümayəndələri ilə görüşür, onların arzu və istəkləri ilə maraqlanır. Bu səfərlər həmçinin yeni-yeni təməlqoyma və açılış mərasimləri ilə də yadda qalır. Elə bu günlərdə Prezident İlham Əliyev Sabirabad və İmişli rayonlarında növbəti dəfə belə tədbirlərə qatılıb.

Sabirabadda yeni istehsal müəssisələri ilə tanışlıq

Prezident İlham Əliyev oktyabrın 28-də Sabirabad Sənaye Məhəlləsində “Humix” Məhdud Məsuliyyətli Cəmiyyətinin (MMC) aqrokimyəvi vasitələrin istehsalı müəssisəsinin fəaliyyəti ilə tanış olub. Sabirabad Sənaye Məhəlləsi dövlətimizin başçısının 2017-ci ildə imzaladığı Sərəncamla yaradılıb. İndiyədək burada 8 rezident qeydiyyatdan keçib və fəaliyyətə başlayıb.

“Humix” MMC ilə tanışlıq zamanı bildirilib ki, müəssisəyə 2021-ci ildə Sabirabad Sənaye Məhəlləsinin rezidenti statusu verilib. Müəssisədə orqanik mineral (toz), kimyəvi (maye və toz) və qranul gübrələr istehsal olunur. Türkiyə, Çin və yerli texnologiya əsasında fəaliyyət göstərən müəssisənin illik istehsal gücü 18 min ton gübrə təşkil edir.

Dövlətimizin başçısı Sabirabad Sənaye Məhəlləsində “Azera Toxumçuluq” Məhdud Məsuliyyətli Cəmiyyətinin (MMC) toxum istehsalı müəssisəsinin fəaliyyəti ilə də tanış olub.”Azera Toxumçuluq” MMC 2021-ci ildə Sabirabad Sənaye Məhəlləsinin rezidenti kimi qeydiyyata alınıb.

Burada Türkiyənin qabaqcıl texnologiyalarının tətbiqi ilə standart və hibrid toxum istehsalı müəssisəsi qurulub. Hazırda burada bir sıra toxumluq kənd təsərrüfatı məhsulları istehsal olunur. Müəssisə ildə 500 ton yonca, 800 ton hibrid qarğıdalı, 350 ton hibrid günəbaxan, 2 min ton arpa, 2 min ton buğda toxumu istehsalı gücünə malikdir.

Prezident İlham Əliyevin Sabirabad Sənaye Məhəlləsində fəaliyyəti ilə tanış olduğu istehsal müəssisələrindən biri də “Taşobası” Məhdud Məsuliyyətli Cəmiyyətinin pambıq emalı zavoduolub. 2023-cü ildə Sabirabad Sənaye Məhəlləsinin rezidenti kimi qeydiyyata alınan “Taşobası” MMC-nin pambıq emalı zavodunda Türkiyə, Almaniya və İtaliya texnologiyalarının tətbiqi ilə mahlıc və texniki çiyid istehsal olunur.

Zavodun layihə dəyəri 3,3 milyon manatdır. Müəssisə ildə 8 min ton mahlıc, 10 min ton texniki çiyid istehsalı gücünə malikdir. İndiyədək istehsal edilən məhsulun dəyəri 2,6 milyon manat olan hissəsi satılıb ki, bunun da 2,2 milyon manatı ixracın payına düşür.

Sabirabad Sənaye Məhəlləsində fəaliyyət göstərən istehsal obyektlərindən biri də “Fırtına Su Sistemləri” Məhdud Məsuliyyətli Cəmiyyətinin su filtrlərinin istehsalı müəssisəsidir. Səfər çərçivəsində dövlətimizin başçısı bu müəssisənin də fəaliyyəti ilə tanış olub.

“Fırtına Su Sistemləri” MMC 2024-cü ildə Sabirabad Sənaye Məhəlləsinin rezidenti kimi qeydiyyata alınıb.Layihə dəyəri təxminən 1,2 milyon manat olan müəssisədə Çin texnologiyası əsasında mayenin süzülməsi və təmizlənməsi üçün avadanlıqlar istehsal edilir. Müəssisədə ildə 210 min ədəd filtr, 15 min ədəd su filtri cihazı istehsalı planlaşdırılır.

İmişlidə arpa emalı müəssisəsi istifadəyə verilib

Regionlara növbəti səfəri çərçivəsində Prezident İlham Əliyev “Promalt” Məhdud Məsuliyyətli Cəmiyyətinin arpa emalı müəssisəsinin açılışında iştirak edib.

Müəssisədə pivə istehsalında əsas xammal hesab olunan arpanın xüsusi proseslərdən keçərək mayalanma və fermentasiya üçün hazır vəziyyətə gətirilməsi ilə əldə edilən məhsul - malt istehsal olunacaq. İsveçrənin “Bühler GmbH” şirkətinin müasir texnologiyası əsasında hazırlanmış avadanlıqla təchiz olunan və emal prosesi tam avtomatlaşdırılan müəssisədə ildə 11 min ton arpa istehsal ediləcək.

Müəssisənin investisiya dəyəri 33,2 milyon manatdır. Qeyd edək ki, İqtisadiyyat Nazirliyinin tabeliyində Azərbaycan Biznesinin İnkişafı Fondu, “Azərşəkər” MMC və “Azərsun Holdinq” MMC-nin tərəfdaşlığı əsasında həyata keçirilən layihəyə dövlətin investisiya təşviqi mexanizmi çərçivəsində vergi və gömrük güzəştləri ilə dəstək göstərilib. “Carlsberg Azerbaijan” pivə zavoduna da xammal satışı həyata keçirən müəssisə Cənubi Qafqazda pivəlik arpa səmənisinin emalı üzrə ixtisaslaşmış ilk müasir istehsal obyektidir. Layihə regionda aqrar-sənaye inteqrasiyasını gücləndirməklə yanaşı, texnoloji modernləşmə, daxili bazarın dayanıqlı xammal təminatı, istehsalın lokallaşdırılması baxımından mühüm əhəmiyyət daşıyır.

Mübariz FEYİZLİ

Paylaş:

Baxılıb: 633 dəfə