Əsassız yoxlamaların aparılmasına qarşı sistemli tədbirlər görülür

Bakı:

25 °C

55 %

1 m/s

Əlaqə

AZ RU EN

Ana səhifə / Gündəm / Əsassız yoxlamaların aparılmasına qarşı sistemli tədbirlər görülür

Əsassız yoxlamaların aparılmasına qarşı sistemli tədbirlər görülür

07.02.2011 [10:21]

Prezident İlham Əliyev: Lazımsız yoxlamalar aparılmamalıdır, xüsusilə, hüquq mühafizə orqanları tərəfindən lazımsız yoxlamalara son qoyulmalıdır ki, ölkədə sahibkarlığı daha da sürətlə inkişaf etdirək, buna daha böyük təkan verək
Hazırda ölkəmizdə azad sahibkarlığın inkişaf etdirilməsi üçün lazımi şərait yaradılıb. Dövlətin bu istiqamətdə həyata keçirdiyi siyasətin əsas məqsədi sahibkarların təşəbbüskarlığını artırmaqla onların ölkənin inkişafına dəstək vermək imkanlarını yüksəltməkdir. Təbii ki, kiçik və orta sahibkarlığın inkişafı öz növbəsində dövlətin stabil inkişafına müsbət təsir edir. Sahibkarlığın inkişafı üçün azad rəqabət mühitinin təmin edilməsi və özəl müəssisələrdə aparılan əsassız yoxlamaların ləğvi zəruridir. Buna görə də, müvafiq dövlət qurumları tərəfindən sahibkarlıq subyektlərində aparılan yoxlamalar zamanı qanunvericiliyin tələblərinə riayət edilməsi, əsassız yoxlamaların aparılmaması, inzibati vəzifə tutan dövlət qulluqçuları tərəfindən korrupsiya hallarına yol verilməməsi vacib şərtlər kimi qarşıya qoyulub.
Prezidenti İlham Əliyev dəfələrlə Azərbaycanda azad sahibkarlığın inkişaf etdirilməsi üçün hüquqi və fiziki şəxslərə dövlət tərəfindən istənilən köməyin, hətta, siyasi dəstək göstərildiyini vurğulayıb. Yeri gəlmişkən, dövlət başçısı Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunmuş iclasındakı nitqində bu məsələyə bir daha toxunub: “2011-ci ildə qarşıda duran vəzifələr aydındır. Biz bu ildə də iqtisadiyyatımızın inkişafını təmin etməliyik. Əminəm ki, iqtisadiyyatımız daha da artacaqdır. Makroiqtisadi sabitlik qorunmalıdır və əminəm ki, inflyasiya birrəqəmli olacaqdır. Biz xüsusilə istehlak bazarına nəzarətimizi gücləndirməliyik. Bu sahədə böyük işlər görülüb və davam etdirilməlidir. Qiymətlərin süni şəkildə şişirdilməsinə yol verməməliyik, azad rəqabəti təmin etməliyik, inhisarçılıq meyillərinin qarşısını almalıyıq. Lazımsız yoxlamalar aparılmamalıdır, xüsusilə, hüquq mühafizə orqanları tərəfindən lazımsız yoxlamalara son qoyulmalıdır ki, ölkədə sahibkarlığı daha da sürətlə inkişaf etdirək, buna daha böyük təkan verək”.
Onu da qeyd edək ki, dövlət qurumları vəzifədən sui-istifadə və korrupsiya hallarına qarşı mübarizəni gücləndirib. Bunu müxtəlif nazirlik və komitələrdə keçirilən iclaslar da təsdiqləyir.
Məsələn, maliyyə naziri S.Şərifov maliyyə orqanlarında süründürməçilik, vəzifədən sui-istifadə və korrupsiya hüquqpozmalarına şərait yaradan halların qarşısının alınması, həmçinin, qabaqlayıcı tədbirlərin görülməsi ilə bağlı bir sıra qurumlara konkret tapşırıqlar verib: “Bütün yoxlamalar dövlət başçısının Fərmanına uyğun olaraq əvvəlcədən tətbiq olunmuş plan əsasında aparılmalıdır. Yoxlamalar zamanı müvafiq icra orqanlarının nümayəndələrinin də iştirakı təmin olunmalıdır. Eyni zamanda, nazirliyin ayrı-ayrı qurumlarına müxtəlif fəaliyyət növləri üzrə lisenziyalar almaq üçün sahibkarlar tərəfindən edilən müraciətlərə vaxtında cavab verilməli, sahibkarların qanunvericilikdə nəzərdə tutulmuş hüquqları təmin olunmalıdır”.
Heç şübhəsiz, hazırda sahibkarlıq sektorunda narahatlıq yaradan əsas amillər sırasında əsassız yoxlamaların aparılması dayanır. Əsassız yoxlamalar korrupsiya və rüşvətxorluq hallarının yaranmasına rəvac verən amillərdən biridir. Ona görə də, əsasız yoxlamaların aparılmasına qarşı sistemli tədbirlərin həyata keçirilməsi həm də korrupsiya ilə mübarizə strategiyasının bir hissəsi sayıla bilər. Daxili bazarda inhisarçılığın qarşısını almaq, azad və bərabər rəqabətə əsaslanan sahibkarlığın inkişafına şərait yaratmaq məqsədilə, bu sahədə əsassız yoxlamalara son qoymaq üçün yoxlamaların nizama salınması və istehlakçıların hüquqlarının qorunmasının təmin edilməsi, dövlət və bələdiyyə əmlakının və vəsaitlərinin idarə olunması sahəsində korrupsiya ilə əlaqədar hüquqpozmalara qarşı mübarizənin gücləndirilməsi də olduqca vacibdir.
Onu da qeyd edək ki, bu prosesdə təkcə dövlət deyil cəmiyyətin hər bir fərdi, hər bir sosial institut və qeyri-hökumət təşkilatları da yaxından və fəal iştirak etməlidir.
SEVİNC

Paylaş:

Baxılıb: 1045 dəfə