Azad Rəhimov: “Bakı-2017” IV İslam Həmrəyliyi Oyunları idman tarixində silinməz iz qoyacaq

Bakı:

11 °C

100 %

1 m/s

Əlaqə

AZ RU EN

Ana səhifə / İdman / Azad Rəhimov: “Bakı-2017” IV İslam Həmrəyliyi Oyunları idman tarixində silinməz iz qoyacaq

Azad Rəhimov: “Bakı-2017” IV İslam Həmrəyliyi Oyunları idman tarixində silinməz iz qoyacaq

12.05.2017 [10:02]

Azərbaycanın IV İslam Həmrəyliyi Oyunlarına ev sahibliyi etməsi olduqca mühüm hadisədir. Ölkəmizdə mövcud olan və yaradılan idman infrastrukturu yarışların yüksək səviyyədə keçirilməsinə imkan verir. “Bakı-2017” IV İslam Həmrəyliyi Oyunları idman tarixində silinməz iz qoyacaq.
AZƏRTAC xəbər verir ki, bu sözləri Azərbaycanın gənclər və idman naziri, “Bakı-2017” IV İslam Həmrəyliyi Oyunları Əməliyyat Komitəsinin baş icraçı direktoru Azad Rəhimov mayın 11-də Oyunlarla bağlı keçirilən mətbuat konfransında deyib.
Azərbaycanın IV İslam Həmrəyliyi Oyunlarına ev sahibliyi etməsindən qürur hissi keçirdiyini bildirən Azad Rəhimov növbəti 11 gün ərzində 50-dən çox ölkənin idmançılarının Azərbaycana gələrək yarışlarda medallar uğrunda mübarizə aparacaqlarını diqqətə çatdıraraq deyib: “Dünyanın dörd qitəsindən gələn idmançılar mübarizliyi, əzmkarlığı, böyük sevinci nümayiş etdirəcəklər. Əfsuslar olsun ki, bəzi ölkələr - Sudan, Liviya və Küveyt Oyunlarda iştirak etməyəcək”.
Üç minə yaxın idmançının Bakıda əsrarəngiz Oyunlarda iştirak edəcəyini söyləyən gənclər və idman naziri Azərbaycanın Oyunlara tam hazır olduğunu vurğulayıb: “Atletlər kəndi idmançıların bütün ehtiyaclarına tam cavab verir. “Bakı-2017” IV İslam Həmrəyliyi Oyunları 1,3 milyarddan çox tamaşaçı auditoriyasını əhatə edəcək. Oyunlar sülhü, mədəniyyəti, birliyi təbliğ edəcək”.
İslam Həmrəyliyi İdman Federasiyasının (İHİF) baş katibi Faysal Abdulaziz Əl-Nassar çıxış edərək ev sahibi Azərbaycanın Oyunların təşkilinə, eləcə də açılış mərasiminə mükəmməl hazırlaşdığını deyib. Yarışların keçiriləcəyi idman arenalarında yüksək şəraitin yaradıldığını vurğulayan Faysal Abdulaziz Əl-Nassar Oyunların xalqlar arasında həmrəylik əlaqələrini, dostluq münasibətlərini tərənnüm etdiyini bildirib.
Oyunların keçirilməsi üçün göstərdiyi qətiyyətli dəstəyə görə Azərbaycan Respublikasının Prezidenti İlham Əliyevə minnətdarlığını bildirən Faysal Abdulaziz Əl-Nassar “Bakı-2017” IV İslam Həmrəyliyi Oyunlarının Təşkilat Komitəsinin sədri, Birinci vitse-prezident Mehriban Əliyevanın rəhbərliyi ilə görülən yüksək səviyyəli işlərin əhəmiyyətini xüsusi vurğulayıb.
Azərbaycan Milli Olimpiya Komitəsinin və İHİF-in vitse-prezidenti Çingiz Hüseynzadə milli komandamızın bu mötəbər yarışlara hazırlığından danışaraq ölkəmizin Oyunlarda güclü heyətlə təmsil olunacağını bildirib. Təşkilati işlərin yüksək səviyyədə həll olunduğunu qeyd edən Çingiz Hüseynzadə deyib: “Azarkeşlər mükəmməl arenalarda maraqlı idman mübarizəsinin şahidi olacaqlar. Federasiyalar atletlər üçün hər cür şəraiti təmin ediblər. Bu, böyük uğurdur. Artıq Oyunların yarışları başlayıb. İlk nəticələr sevindiricidir”.
Sonra jurnalistlərin sualları cavablandırılıb.

Paylaş:

Baxılıb: 1034 dəfə