“Ötən il tədris və təlim prosesi həm kəmiyyət, həm də keyfiyyət baxımından təkmilləşib”

Bakı:

15°C

77%

4m/s

Əlaqə

AZ RU EN

Ana səhifə / İqtisadiyyat / “Ötən il tədris və təlim prosesi həm kəmiyyət, həm də keyfiyyət baxımından təkmilləşib”

“Ötən il tədris və təlim prosesi həm kəmiyyət, həm də keyfiyyət baxımından təkmilləşib”

10.01.2014 [09:39]

Ceyhun Yusifov: Vergi orqanı əməkdaşlarının əldə etdikləri biliklər onların praktik fəaliyyətində faydalı olmalıdır
“Vergilər Nazirliyinin Tədris Mərkəzi tərəfindən vergi əməkdaşlarının bilik və peşə hazırlığının yüksəldilməsi istiqamətində ardıcıl və məqsədyönlü işlər həyata keçirilir, yeni tədris və təlim texnologiyaları tətbiq edilir. Ötən il tədris və təlim prosesi həm kəmiyyət, həm də keyfiyyət baxımından təkmilləşib. İl ərzində 23 qısamüddətli təlim, 3 ilkin hazırlıq kursu və 28 ixtisasartırma kursu keçirilib, tədris prosesinə 1207 nəfər vergi əməkdaşı cəlb olunub. Müqayisə üçün qeyd edək ki, bu göstərici 2011-ci ildə 473 nəfər, 2012-ci ildə isə 707 nəfər idi”. Bunu KİV-ə müsahibəsində Tədris Mərkəzinin rəisi Ceyhun Yusifov bildirib.
O, deyib ki, Vergilər Nazirliyində aparılan tədris-təlim fəaliyyətinin əsas strateji xətti ondan ibarətdir ki, tədris prosesi vergi orqanlarının ehtiyaclarına yönəlməli, vergi orqanı əməkdaşlarının əldə etdikləri biliklər onların praktiki fəaliyyətində faydalı olmalıdır: “Tədris prosesi ilə əməli fəaliyyətin vəhdətini yaratmaq üçün vergi orqanlarının tədris-təlim ehtiyacları öyrənilir. İlkin hazırlıq və ixtisasartırma kurslarının tədris və mövzu planları məhz həmin ehtiyaclar üzərində qurulur. Ümumiyyətlə, tədris tələbatlarının öyrənilməsi artıq bizim davamlı işimizə çevrilib. Vergitutma ilə bağlı qanunvericilik aktlarına edilmiş dəyişikliklər və vergi inzibatçılığı üzrə qəbul olunmuş normativ sənədlər müvafiq kursların tədris-mövzu planlarında nəzərdə tutulmuş fənlər üzrə hazırlanan tədris materiallarına salınıb”.
C.Yusifovun sözlərinə görə, “Azərbaycan 2020: gələcəyə baxış” İnkişaf Konsepsiyasına uyğun olaraq, Vergilər Nazirliyi tərəfindən “Vergi sisteminin inkişafı üzrə Strateji Plan” təsdiq olunub: “Həmin plana əsasən, Tədris Mərkəzi vergi sisteminin inkişafı ilə bağlı elmi-tədqiqat işlərinin aparılmasında iştirak edir. Müasir dövrdə iqtisadiyyatın qloballaşması, ölkələr arasında əlaqələrin güclənməsi dövlət tərəfindən həyata keçirilən vergi siyasəti qarşısında da yeni və həlli vacib məsələlər qoyur. Bunların arasında vergi siyasətinin iqtisadi inkişafa təsiri və onun stimullaşdırılması xüsusi əhəmiyyət kəsb edir. Vergi siyasəti bir tərəfdən əhalinin həyat səviyyəsinin yüksəlməsində, digər tərəfdən isə büdcə gəlirlərinin formalaşmasında mühüm rol oynayır. Təcrübə göstərir ki, elmi cəhətdən əsaslandırılmış vergi siyasəti daha uğurlu nəticələrə gətirib çıxarır. Bu baxımdan, dünya iqtisadiyyatında baş verən proseslərin təhlili və passiv vergi siyasətindən aktiv vergi siyasətinə keçidin təmin olunması “Müasir qloballaşma şəraitində vergi siyasətinin imperativləri”, “Vergitutma bazasının eroziyası və gəlirlərin köçürülməsi”, “Kiçik və orta sahibkarlığın vergiyə cəlb edilməsinin müasir problemləri”, “Bilik əsaslı kapital və onun vergiyə cəlb edilməsinin müasir problemləri”, “Vergi siyasətinin sosial-iqtisadi bərabərsizliyə təsiri” və bu qəbildən olan digər mövzular üzrə elmi araşdırmaların aparılmasını zəruri edir. 2013-cü ildə Tədris Mərkəzində “Vergilərin gəlirlərin bərabərsizliyinin azaldılmasında rolu” mövzusunda elmi-tədqiqat işi yerinə yetirilib. Düşünürəm ki, apardığımız tədqiqatların nəticələri vergi siyasətinin daha da təkmilləşdirilməsi üçün faydalı ola bilər”.
Müsahibəsində “Tədrisin təşkilində yeni təlim metodlarından istifadə və biliklərin qiymətləndirilməsində yeni texnologiyaların tətbiqi keyfiyyətin yüksəlməsinə öz təsirini göstərib” deyən Mərkəzin rəisi onu da əlavə edib ki, ötən il informasiya və kommunikasiya sistemlərinin tədrisdə tətbiqi ilə bağlı bir sıra təkmilləşdirmə işləri həyata keçirilib: müxtəlif qruplar (kafedralar) və ya istifadəçilər (müəllimlər) yaratmaqla onlara sual bankından istifadə etmək hüququ verilib. İmtahan pəncərəsindən rahat istifadə etmək üçün internet modulunun yeni dizaynı tətbiq edilib.
O da bildirilib ki, Tədris Mərkəzinin fəaliyyətində beynəlxalq təcrübənin öyrənilməsi və tətbiqi məsələləri önəmli yer tutur. Ötən dövr ərzində Böyük Britaniyanın və Avstriyanın vergi sistemlərində həyata keçirilən təlim və tədris prosesləri üzrə təcrübə öyrənilib, həmin ölkələrin təlim sistemlərinin strukturu, tətbiq olunan təlim texnologiyaları, metodları və alətləri barədə əhatəli biliklər toplanıb. Hazırda qeyd olunan təcrübə və biliklərin Tədris Mərkəzində tətbiqi istiqamətində işlər aparılır. Ötən ilin may ayında Tədris Mərkəzində Avstriya Federal Maliyyə Akademiyasının təlimçilərinin iştirakı ilə “Təlimçilərin təlimi” mövzusunda treninq təşkil olunub. Treninqin əsas məqsədi Vergilər Nazirliyinin təlim-tədris fəaliyyəti ilə məşğul olan əməkdaşlarına təlimçiyə aid tələblər barədə, təlim materiallarının hazırlanması, təlimin təşkili, təlim metodları və alətləri üzrə geniş praktiki və nəzəri biliklərin verilməsi, onlara təlimçilik qabiliyyətlərinin aşılanması idi. Artıq Vergilər Nazirliyində təşkil olunan tədris-təlim proseslərində bu təcrübələrin geniş tətbiqinə başlanıb.
NADİR

Paylaş:

Baxılıb: 1299 dəfə