Energetika məsələləri üzrə ekspert Devid Koranyi: Mən “Cənub” qaz dəhlizini çox vaxt Azərbaycan dəhlizi adlandırıram

Bakı:

18 °C

77 %

0 m/s

AZ RU EN

Ana səhifə / İqtisadiyyat / Energetika məsələləri üzrə ekspert Devid Koranyi: Mən “Cənub” qaz dəhlizini çox vaxt Azərbaycan dəhlizi adlandırıram

Energetika məsələləri üzrə ekspert Devid Koranyi: Mən “Cənub” qaz dəhlizini çox vaxt Azərbaycan dəhlizi adlandırıram

20.05.2014 [08:56]

Cənubi Kaliforniya Universitetində keçirilmiş “Cənub” qaz dəhlizi layihəsinin geosiyasi nəticələri” mövzusunda konfransın birinci panel iclasında Avropa Xarici İşlər Xidməti yanında diplomat və Avropa İttifaqının Vaşinqtondakı nümayəndə heyətinin müşaviri Kristian Berqsmüller və Vaşinqtonda Atlantika Şurası nəzdində Dinu Patrisiyu Mərkəzinin direktoru vəzifəsini icra edən Devid Koranyi çıxış ediblər.
K.Berqsmüller “Avropa İttifaqının “Cənub” qaz dəhlizinə baxışı” mövzusunda məruzəsində Avropada qaz istehlakının səviyyəsi barədə söhbət açaraq deyib ki, Kanada ABŞ üçün həm qaz təchizatçısı, həm də dost və müttəfiq olduğu kimi, Norveç də Mərkəzi Avropa ölkələri üçün həm qaz təchizatçısı, həm də dost və müttəfiqdir. Sonra o, qitənin qazla təchizatını şaxələndirməyin zəruriliyini qeyd edib. O deyib ki, Rusiya Avropanın əsas qaz təchizatçısı olaraq qalır, lakin qitə ölkələri “Bütün yumurtaları bir səbətə yığma” məsəlinə riayət edir və alternativ təchizatçılar axtarırlar. Berqsmüller “Cənub” qaz dəhlizi layihəsi ilə əlaqədar qeyd edib ki, bu layihə Avropanı qazla təmin edən alternativ mənbə olmaqla yanaşı, həm də Qafqaz regionunun Avropa ilə yaxınlaşması və sıx əməkdaşlıq etməsi üçün şərait yaradacaq.
Atlantika Şurasının nümayəndəsi Devid Koranyi “Cənub” qaz dəhlizi və Avropanın enerji təhlükəsizliyi Trans-Atlantik kontekstdə” mövzusunda məruzəsində son illərdə, o cümlədən 2009-cu ildə Avropaya qaz nəqlində yaranmış böhranlar haqqında məlumat verib və vurğulayıb ki, bu böhranlardan sonra qaz nəqlinin şaxələndirilməsi zərurəti daha da artıb. D.Koranyi “Cənub” qaz dəhlizinin Avropa ölkələri üçün əhəmiyyətini qeyd edərək bildirib ki, Azərbaycan bu layihənin həyata keçirilməsinə tərəfdardır və bunun üçün çox səy göstərir. D.Koranyi deyib: “Başqalarının bacarmadığını Azərbaycan edə bilmişdir, buna görə mən “Cənub” qaz dəhlizini çox vaxt Azərbaycan dəhlizi adlandırıram”.
O, gələcəkdə “Cənub” qaz dəhlizi vasitəsilə Avropaya nəql edilən qazın həcminin artırılması üçün Türkmənistan, Şimali İraq və Şərqi Aralıq dənizi bölgəsi kimi potensial qaz mənbələri barədə konfrans iştirakçılarına məlumat verərək ümidvar olduğunu bildirib ki, gələcəkdə qaz nəqlinin həyata keçirilməsi üçün bu regionlardakı dövlətlər arasında mövcud problemlər uğurla həll ediləcək.

Paylaş:

Baxılıb: 1350 dəfə