Avropa İttifaqının maliyyələşdirdiyi Tvinninq layihəsinin yekunlarına həsr olunmuş konfrans keçirilib

Bakı:

27 °C

63 %

15 m/s

AZ RU EN

Ana səhifə / İqtisadiyyat / Avropa İttifaqının maliyyələşdirdiyi Tvinninq layihəsinin yekunlarına həsr olunmuş konfrans keçirilib

Avropa İttifaqının maliyyələşdirdiyi Tvinninq layihəsinin yekunlarına həsr olunmuş konfrans keçirilib

22.05.2014 [09:03]

Rüfət Aslanlı: Layihənin uğurlarından biri Azərbaycanın qiymətli kağızlar bazarının qlobal bazarlara inteqrasiyası üçün zəruri hüquqi bazanın əsaslarının formalaşmasıdır
Dünən Bakıda “Azərbaycan Respublikasının qiymətli kağızlar bazarı üzrə qanunvericiliyinin Avropa İttifaqının (Aİ) qanunvericiliyinə uyğunlaşdırılması və Qiymətli Kağızlar üzrə Dövlət Komitəsinin (QKDK) institusional inkişafı” Tvinninq layihəsinin yekunlarına həsr olunmuş konfrans keçirilib. Qeyd edək ki, Avropa İttifaqının maliyyələşdirdiyi layihə Polşanın Maliyyə Nəzarəti Agentliyi tərəfindən reallaşdırılıb. Tədbiri giriş sözü ilə açan Qiymətli Kağızlar üzrə Dövlət Komitəsinin sədri Rüfət Aslanlı deyib ki, layihə çərçivəsində qiymətli kağızlar bazarının tənzimlənməsi və prudensial nəzarət tədbirləri üzrə qanunvericilik bazasının Aİ qanunvericiliyinə uyğunlaşdırılması istiqamətində işlər həyata keçirilib. Prezident İlham Əliyev tərəfindən imzalanmış “2011-2020-ci illərdə qiymətli kağızlar bazarının inkişafı Dövlət Proqramı”nın icrasının təmin olunmasına layihə tərəfindən geniş dəstəyin göstərildiyini tədbir iştirakçılarının diqqətinə çatdıran komitə sədri onu da bildirib ki, Azərbaycan Respublikasının qiymətli kağızlar bazarına dair qanunvericiliyin Avropa İttifaqının qanunvericiliyinə uyğunluğu təhlil edilərək qiymətləndirilib.
Onun sözlərinə görə, layihənin uğurlarından biri Azərbaycanın qiymətli kağızlar bazarının qlobal bazarlara inteqrasiyası üçün zəruri hüquqi bazanın əsaslarının formalaşmasıdır.
Avropa İttifaqının ölkəmizdəki nümayəndəliyinin rəhbəri xanım Malena Mard qeyd edib ki, layihənin məqsədi qiymətli kağızlar bazarı və maliyyə xidməti vasitəçilərinin fəaliyyətini Avropa İttifaqının qanunvericiliyinə uyğun olaraq tənzimləmək üçün hüquqi bazanın təkmilləşdirilməsi, o cümlədən, QKDK-nın tənzimləyici və nəzarət potensialının artırılmasına dəstək göstərilməsidir.
Diqqətə çatdırılıb ki, Tvinninq layihəsi çərçivəsində ən uğurlu amillərdən biri ekspertlər və iştirakçılar arasında təcrübə mübadiləsi olub. Avropa İttifaqı Azərbaycanın iri ticarət tərəfdaşı və ən iri investorlarından biridir. Malena Mard ümid etdiyini bildirib ki, bu, Azərbaycanın kapital bazarının inkişafına öz töhfəsini verəcək.
Sonra Polşa Respublikasının Azərbaycan Respublikasındakı səfiri Mixal Labenda çıxış edərək, dinamik iqtisadi inkişaf göstəricilərinə malik Azərbaycan ilə Polşa arasında əməkdaşlıq əlaqələrinin mühüm önəm daşıdığını və Tvinninq layihəsinin bu istiqamətdə xüsusi yeri olduğunu vurğulayıb. M.Labenda, həmçinin, gələcəkdə Azərbaycanla işgüzar əməkdaşlıq münasibətlərini daha geniş müstəvidə inkişaf etdirmək niyyətində olduqlarını bildirib.
QKDK ilə yanaşı, Polşanın Maliyyə Nəzarəti Agentliyi, İqtisadi İnkişaf Nazirliyi, qiymətli kağızlar bazarı institutlarının nümayəndələri, media təmsilçiləri və digər maraqlı tərəflər iştirak etdiyi konfransda, həmçinin, “Layihənin nailiyyətləri” və “Bazar transformasiyasının əsas elementləri” mövzularında təqdimatlar olub.
Sonra tədbir iştirakçılarını maraqlandıran suallar cavablandırılıb və qarşılıqlı maraq doğuran məsələlər barədə fikir mübadiləsi aparılıb.
Nadir AZƏRİ

Paylaş:

Baxılıb: 1310 dəfə