Tbilisidə keçirilən beynəlxalq konfransda dayanıqlı inkişaf üzrə Azərbaycan modeli yüksək qiymətləndirilib

Bakı:

15 °C

72 %

9 m/s

AZ RU EN

Ana səhifə / İqtisadiyyat / Tbilisidə keçirilən beynəlxalq konfransda dayanıqlı inkişaf üzrə Azərbaycan modeli yüksək qiymətləndirilib

Tbilisidə keçirilən beynəlxalq konfransda dayanıqlı inkişaf üzrə Azərbaycan modeli yüksək qiymətləndirilib

30.05.2018 [09:43]

Mayın 28-də Tbilisidə BMT-nin Dayanıqlı İnkişaf Proqramına uyğun olaraq Gürcüstan hökuməti və parlamentinin birgə təşkil etdiyi “Dayanıqlı İnkişaf-2030” beynəlxalq konfransı öz işinə başlayıb.
AZƏRTAC xəbər verir ki, konfransda Azərbaycanda dayanıqlı inkişafla bağlı görülən işlər, qəbul olunmuş proqram və sənədlər yüksək qiymətləndirilib.
Parlamentlərarası İttifaqın baş katibi Martin Çunqonq çıxışı zamanı dayanıqlı inkişaf məqsədlərinə nail olmaq üçün parlament ilə hökumətin əməkdaşlığının vacibliyini vurğulayıb. Bildirib ki, bu istiqamətdə Azərbaycanda çox uğurlu addımlar atılıb və gözəl nəticələr var.
O deyib: “Dayanıqlı inkişaf məqsədlərinə nail olmaq üçün Azərbaycandakı hökumət-parlament əməkdaşlığı bir sıra ölkələr üçün çox yaxşı nümunədir”.
Konfransda Gürcüstan parlamentinin sədri İrakli Kobaxidze, xarici işlər naziri Mixail Canalidze, BMT-nin rezident əlaqələndiricisi Niels Skot və başqaları çıxış edərək dayanıqlı inkişafla bağlı fikirlərini bölüşüblər.
Tədbirdə iştirak edən Azərbaycan Milli Məclisinin Səhiyyə komitəsi sədrinin müavini Musa Quliyev və Dayanıqlı İnkişaf üzrə Milli Əlaqələndirmə Şurasının katibi Hüseyn Hüseynov ölkəmizdə dayanıqlı inkişaf, Azərbaycanın bu sahədə beynəlxalq təşkilatlarla əməkdaşlığı, eləcə də parlament-hökumət əməkdaşlığı barədə məlumat verib, qazanılmış təcrübədən danışıblar.
İki gün davam edəcək tədbirdə dayanıqlı inkişafın əsas istiqamətləri, bu sahədə görülən işlər, eləcə də hazırlanan proqram və layihələr barədə ətraflı məlumat verilir.
Tədbirdə, həmçinin dayanıqlı inkişafa, xüsusilə regionda dayanıqlı inkişaf məqsədlərinə nail olunmasında əsas çətinliklərin müzakirəsi nəzərdə tutulub. Eyni zamanda, bu prosesə bütün maraqlı tərəflərin cəlb olunması, xüsusilə özəl sektorla parlamentin dayanıqlı inkişaf məqsədlərinə töhfəsi məsələləri müzakirə olunacaq.
Milli Məclisin Səhiyyə komitəsinin sədr müavini Musa Quliyev jurnalistlərə müsahibəsində deyib ki, dayanıqlı inkişafa nail olmaq üçün Azərbaycanda çox mühüm işlər görülüb: “Yüksək səviyyəli parlament və hökumət əməkdaşlığı qurulub. Dayanıqlı inkişafın əsas məqsədi BMT-nin minilliyin inkişafına doğru hədəflərinə çatmaqdır. Burada insan haqları, demokratiya, ölkənin iqtisadi inkişafı, hüquqi, siyasi və iqtisadi sahələrdə islahatlar və s. məsələlər nəzərdə tutulub. Azərbaycanda bu istiqamətdə, eyni zamanda, beynəlxalq inteqrasiya ilə bağlı çoxlu işlər görülüb və proses davam edir”.
Dayanıqlı İnkişaf üzrə Milli Əlaqələndirmə Şurasının katibi Hüseyn Hüseynov isə bildirib ki, Azərbaycanın bu tədbirə dəvət olunmasının əsas məqsədi ölkəmizin təcrübəsini region dövlətləri ilə bölüşməkdir. Azərbaycan 2016-2017-ci illər üzrə Dayanıqlı İnkişaf Məqsədləri ilə bağlı BMT-yə hesabatını təqdim edən birinci ölkədir. Hesabat artıq BMT və digər beynəlxalq təşkilatlar tərəfindən yüksək qiymətləndirilib. Biz 2019-cu ildə də hesabatı ilk dövlətlərdən biri olaraq təqdim etməyə hazırlaşırıq və bununla əlaqədar BMT-yə müraciət olunub.

Paylaş:

Baxılıb: 730 dəfə