Azərbaycan hökumətinin həyata keçirdiyi islahatlar artım meyillərinin əldə olunmasına imkan verib

Bakı:

23°C

60%

10m/s

AZ RU EN

Ana səhifə / İqtisadiyyat / Azərbaycan hökumətinin həyata keçirdiyi islahatlar artım meyillərinin əldə olunmasına imkan verib

Azərbaycan hökumətinin həyata keçirdiyi islahatlar artım meyillərinin əldə olunmasına imkan verib

08.10.2009 [09:41]

Beynəlxalq Valyuta Fondu: Azərbaycanda ümumi daxili məhsulun artım tempi ümumilikdə Avropa iqtisadiyyatının inkişaf göstəricisindən 2-3 dəfə çox olacaq
Beynəlxalq Valyuta Fondu (BVF) postsovet dövlətlərinin 2009-cu ildəki makroiqtisadi vəziyyəti ilə bağlı növbəti proqnozlarını açıqlayıb. Əvvəlki proqnozlarına müəyyən dəyişikliklər edən fondun ekspertləri bu ilin sonuna kimi keçid dövrünü yaşayan bir sıra dövlətlərin iqtisadi vəziyyətində müəyyən irəliləyişlərin olacağını güman edirlər. Eyni zamanda, BVF-nin mütəxəssisləri bəzi ölkələrin əvvəlki kimi böhran meyilləri ilə bağlı iqtisadi geriləməyə məruz qalacağını da proqnozlaşdırırlar. Valyuta Fondunun Yaxın Şərq və Mərkəzi Asiya ölkələri üzrə departament rəhbəri Məsud Əhmədin qənaətinə görə, ümumilikdə hesabata daxil olan dövlətlərin əksəriyyəti böhranın təsirləri ilə bağlı mənfi tendensiyalardan xilas ola bilməyəcək. Qeyd olunan dövlətlərdə ən azı 1,5 faiz iqtisadi geriləmə müşahidə olunacaq. Ən çox iqtisadi geriləmə Ermənistan, Gürcüstan, Qırğızıstan və Tacikistanda qeydə alınacaq. Ermənistan böhranın zərərlərini ən çox hiss edən ölkə kimi iqtisadi cəhətdən dözülməz vəziyyətə düşəcək. İqtisadiyyatında 15 faizdən çox geriləmə proqnozlaşdırılan Ermənistanda tənəzzül uzun müddət davam edəcək.
BVF Azərbaycanla bağlı qiymətləndirmələrin nəticəsi olaraq bu qənaətə gəlib ki, respublikamızda həyata keçirilən düşünülmüş makroiqtisadi siyasət nəticəsində stabil inkişaf tempi qorunub saxlanılacaq. Azərbaycan hökumətinin həyata keçirdiyi iqtisadi və sosial islahatlar makroiqtisadi vəziyyətin sabit qalması ilə yanaşı, artım meyillərinin əldə olunmasına imkan verəcək. Respublikamız inkişaf dinamikasına görə Avropa miqyasında əsas aparıcı dövlətlərdən olacaq. BVF-nin digər iqtisadçıları da hesab edirlər ki, 2009-cu ildə Azərbaycanda ümumi daxili məhsulun artım tempi 5 faizdən artıq olacaq ki, bu da ümumilikdə Avropa iqtisadiyyatının inkişaf göstəricisindən 2-3 dəfə çox deməkdir. Avropa dövlətlərinin iqtisadi inkişaf dinamikası üzrə orta göstəricisi 1-2 faiz proqnozlaşdırılır. Hətta bir sıra Avropa dövlətlərində inkişaf tempi 1 faizdən də aşağı gözlənilir. Xüsusilə də, Macarıstan, Latviya, Polşa, çexiya, Rusiya, Slovakiya, Fransa və digər dövlətlərin artım tempi 1 faizə bərabər olacaq.
BVF-nin rəyinə görə, Azərbaycanda makroiqtisadi sabitlik ümumi iqtisadi inkişafı təmin etməklə bir çox sahələrdə - investisiya qoyuluşu, daxili sərmayələrin həcminin artması, infrastruktur və kommunikasiya layihələrinə kapital yönəldilməsi kimi bölmələrdə inkişafın da davamlılığına zəmin yaradacaq. BVF respublikamızda maliyyə sabitliyinin əsas indikatorlarından biri kimi strateji valyuta ehtiyatlarının yüksək olmasını göstərir. Belə ki, son 5 ildə Azərbaycanda strateji valyuta ehtiyatlarının 4,4 dəfə artması və Mərkəzi Bankın milli valyutanın stabilliyini qoruyub saxlaması makroiqtisadi inkişafa stimul verib. Eyni zamanda, Mərkəzi Bankın pozitiv irəliləyişlərə nail olması bank bazarında funksional və idarəetmə siyasətinin səmərəliliyindən xəbər verir. Mərkəzi Bank düşünülmüş monetar siyasət yürütməklə valyuta bazarını gərginlikdən xilas edə bilib və digər ölkələrdən fərqli olaraq Azərbaycanda valyutanın devalvasiyası baş verməyib. Nəticədə, Azərbaycanın milli valyutası dönərli valyuta ilə müqayisədə bir qədər də möhkəmlənib. Bir manat hazırda 1,20 dollara satılır. Həmçinin, MB-nin monetar ssenariləri inflyasiyanın artmasının qarşısını alıb, istehlak qiyməti indeksi 6 dəfədən çox aşağı düşüb.
BVF hesab edir ki, keçid dövrü ölkələrinin ümumi iqtisadi mənzərəsinin təhlili bütün dövlətlərin dünyada baş verən böhran meyillərinin təsirinə məruz qalmasını göstərir. Amma dünya bazarında baş verən tendensiyalar Azərbaycanın maliyyə bazarına o qədər də ciddi təsir etməyib. Azərbaycan dünyadakı böhran meyillərindən yan keçməyə müvəffəq olub. Bunun nəticəsidir ki, daxili maliyyə bazarı sabit qorunub saxlanılıb.
BVF digər postsovet ölkələrində, Qazaxıstan və Rusiyada bəzi neqativ halların müşahidə olunmasına diqqət çəkərək bu dövlətlərdə xarici maliyyə və bank təşkilatlarının passiv rol oynamasını da qeyd edir. Bu isə həmin ölkələrin tamamilə daxili maliyyə qurumlarının təsiri altına düşməsinə gətirib çıxarıb. Nəticədə, bu ölkələrdə kredit dərəcələri kəskin şəkildə yüksəlib və iqtisadi sahəyə təsir edib. Xüsusilə də, tikinti şirkətləri kredit faizlərinin yüksək olması ucbatından ciddi problemlərlə üzləşib.
ELBRUS CƏFƏRLİ

Paylaş:

Baxılıb: 1347 dəfə