Elmir Vəlizadə: Nəqliyyat sahəsində Azərbaycan-Rusiya əməkdaşlığı yeni müstəviyə və inkişaf mərhələsinə keçir

Bakı:

13 °C

76 %

13 m/s

AZ RU EN

Ana səhifə / İqtisadiyyat / Elmir Vəlizadə: Nəqliyyat sahəsində Azərbaycan-Rusiya əməkdaşlığı yeni müstəviyə və inkişaf mərhələsinə keçir

Elmir Vəlizadə: Nəqliyyat sahəsində Azərbaycan-Rusiya əməkdaşlığı yeni müstəviyə və inkişaf mərhələsinə keçir

05.09.2018 [09:20]

Prezident İlham Əliyevin Rusiyaya rəsmi səfəri zamanı sentyabrın 1-də Soçidə Azərbaycan və Rusiya prezidentlərinin iştirakı ilə imzalanan çoxlu sayda sənədlər iki ölkə arasındakı siyasi, iqtisadi və digər sahələrdə əlaqələrin inkişafının yeni mərhələyə qədəm qoymasına səbəb olacaq. Azərbaycan və Rusiya arasında nəqliyyat sahəsində mövcud münasibətlərin genişləndirilməsi və hüquqi bazanın formalaşdırılması istiqamətində imzalanan “Azərbaycan Respublikası Hökuməti və Rusiya Federasiyası Hökuməti arasında rəqəmsal nəqliyyat sistemləri sahəsində əməkdaşlıq haqqında Memorandum” da bu sənədlərdən biridir. Memorandum nəqliyyat sahəsində Azərbaycan-Rusiya əməkdaşlığının yeni müstəviyə və inkişaf mərhələsinə keçməsinə xidmət edəcək.
Bu sözləri AZƏRTAC-a nəqliyyat, rabitə və yüksək texnologiyalar nazirinin müavini Elmir Vəlizadə deyib.
Nazir müavini qeyd edib ki, həmin sənədin imzalanması Azərbaycan və Rusiya arasında nəqliyyat sahəsində əməkdaşlığın inkişaf etdirilməsinə, “Şimal-Cənub” beynəlxalq nəqliyyat dəhlizinin rəqəmsal infrastrukturunun yaradılması üzrə əməkdaşlığın genişləndirilməsinə, hər iki dövlətdə informasiya-kommunikasiya texnologiyalarının nəqliyyat sahəsində tətbiqinə, innovasiya texnologiyalarının yaradılması və öyrənilməsi üzrə elmi-tədqiqat, texnoloji və eksperimental proqramların, layihələrin həyata keçirilməsinə, əldə edilmiş təcrübə və bilik mübadiləsinə səbəb olacaq.
“İmzalanmış sənəd ölkələrimiz üçün mühüm əhəmiyyət daşıyan sənədlərdən biridir. Memorandum nəqliyyat sahəsində Azərbaycan və Rusiya arasında əməkdaşlığın yeni müstəviyə və inkişaf mərhələsinə keçməsinə xidmət edəcək”, - deyə E.Vəlizadə qeyd edib.
Nazir müavini bildirib ki, memorandumda nəqliyyat sahəsində logistika, innovativ texnologiyalar və mövcud informasiya sistemlərinin inkişafında ölkələr arasında əməkdaşlığın daha da genişləndirilməsi qeyd olunur: “Bu baxımdan da həm ölkələrarası, həm də ölkələrin özündə bu sahədə işlərin görülməsi müddəası da sənəddə öz əksini tapıb. Bütün bunlar onu göstərir ki, bu sənədin imzalanması üçün ölkələrdə artıq müəyyən əsas, bünövrə mövcuddur. Həm Azərbaycanın, həm Rusiyanın informasiya-kommunikasiya texnologiyalarının xüsusilə də nəqliyyat sahəsində tətbiqi üzrə müsbət təcrübələri mövcuddur. Hesab edirik ki, bu təcrübələrin bölüşülməsi çox vacibdir”.
“Şimal-Cənub” beynəlxalq nəqliyyat dəhlizinin inkişaf etdirilməsi üçün memorandumda xüsusi müddəalar da nəzərdə tutulub. Nəqliyyat infrastrukturunun ilə yanaşı, bu sahədə informasiya texnologiyalarının infrastrukturunun inkişaf etdirilməsi nəzərdə tutulub. Azərbaycan qarşısına qoyduğu nəqliyyat-tranzit, logistika mərkəzinə çevrilməsi hədəfinə yaxınlaşır. Artıq bizim buna müəyyən potensialımız da var. Azərbaycanın yaratdığı infrastruktur, yəni, avtomobil yolları, dəmir yolları, Bakı Beynəlxalq Ticarət Limanı və sair buna tam şəkildə imkan yaradır. Bu baxımdan, ölkələrimiz üçün “Şimal-Cənub” beynəlxalq nəqliyyat dəhlizi çox mühüm əhəmiyyətə malikdir. Bu gün dəhliz iki ölkənin iqtisadi potensialını yüksəldir. Hesab edirəm ki, imzalanmış memorandum bizə yeni bir mərhələyə keçməyə imkan yaradacaq, ölkələrimiz arasındakı əməkdaşlıq daha da inkişaf edəcək”, - deyə nazir müavini vurğulayıb.

Paylaş:

Baxılıb: 871 dəfə