SOCAR AQŞ BMT-nin Qlobal Sazişi üzrə lider elan olunmuş ilk Azərbaycan şirkətidir

Bakı:

24 °C

88 %

9 m/s

Əlaqə

AZ RU EN

Ana səhifə / İqtisadiyyat / SOCAR AQŞ BMT-nin Qlobal Sazişi üzrə lider elan olunmuş ilk Azərbaycan şirkətidir

SOCAR AQŞ BMT-nin Qlobal Sazişi üzrə lider elan olunmuş ilk Azərbaycan şirkətidir

27.09.2019 [08:42]

SOCAR AQŞ BMT-nin Qlobal Saziş və sosial məsuliyyət sahəsində qəbul olunmuş 10 prinsipinə uyğunlaşdırılmış biznes fəaliyyətinə əsasən Qlobal Saziş lideri elan edilib. BMT-nin Nyu-Yorkda keçirilən Qlobal Saziş liderləri həftəsində SOCAR AQŞ dünyanın aparıcı korporativ təşəbbüskarları arasında ən fəal iştirakçı kimi dəyərləndirilib, dünyanın aparıcı korporativ təşəbbüskar şirkəti seçilib.
Şirkətdən bildirilib ki, BMT-nin Qlobal Sazişinin icraçı direktoru Layz Kinqo deyib: “Lider şirkətlər BMT-nin Qlobal Sazişi çərçivəsində yüksək səviyyədə əməkdaşlıq nümayiş etdirirlər. Bugünkü tədbirdə təqdir olunan və dayanıqlı korporativ inkişafını təkmilləşdirən şirkətlərin timsalında müxtəlif sahədə və səviyyələrdə fəaliyyət göstərən tərəfdaşların birgə əməkdaşlığına böyük ehtiyac duyulur. Biz, bu sahədə atılan addımlarla daha yaxşı dünya qurmağa nail ola bilərik”.
SOCAR AQŞ-nin Baş direktoru Ramin İsayev isə bildirib: “SOCAR AQŞ BMT-nin Qlobal Sazişi üzrə lider şirkət seçilməyindən məmnunluq duyur. Şirkətimiz 2008-ci ildə fəaliyyətə başladığı gündən bəri yeni, daha məhsuldar iş yerləri açmaqla, insan kapitalının inkişafına töhfə verməklə və ətraf mühitin yaxşılaşdırılması istiqamətində tədbirlər həyata keçirməklə dayanıqlı inkişafa dəstək verməkdədir. BMT-nin Qlobal Sazişi üzrə lider şirkət kimi dayanıqlı inkişaf prinsip və məqsədlərinin korporativ strategiyamızda yer alması digər şirkətlərlə əməkdaşlıq və müasir texnologiyaların tətbiqi sahəsində yeni fürsətlər yaradacaq. Qlobal məqsədlərin tələblərinə riayət etməyimiz şirkətimizin gələcəyi üçün səciyyəvi rol oynayacaq!”
Qeyd edək ki, BMT-nin Qlobal Sazişinin lider şirkəti bu saziş qarşısında öhdəliyini nümayiş etdirmək üçün onun fəaliyyət platformalarından ən azı ikisində iştirak edən, təşkilatın 10 prinsipinə və Qlobal Məqsədlərinə uyğun olan qabaqcıl təcrübələrini müəyyənləşdirərək həyata keçirən, bu prinsiplərin reallaşdırılması ilə bağlı ətraflı hesabat təqdim edən şirkətlər arasından seçilir.
SOCAR AQŞ BMT-nin Qlobal Sazişi qarşısındakı öhdəliyini “Davamlı İnkişaf Məqsədləri” və “Beynəlxalq Təchizat Zəncirində Düzgün İş” fəaliyyət platformalarında iştirakı ilə nümayiş etdirib. Qlobal Sazişin hər bir fəaliyyət platforması şirkətləri, yerli saziş şəbəkələrini, aparıcı mütəxəssisləri, vətəndaş cəmiyyətlərini, hökumətləri və BMT tərəfdaşlarını mürəkkəb və aidiyyəti məsələləri həll etməyə və Davamlı İnkişaf Məqsədlərinə nail olmaq istiqamətində innovativ yanaşma nümayiş etdirməyə çağırır.
SOCAR AQŞ 2018-ci ilin noyabrından etibarən BMT-nin Qlobal Sazişinə qoşulub.
Müəssisənin səhmdarları SOCAR, Nobel Oil Services və Abşeron Qazma MMC-dir.

Paylaş:

Baxılıb: 1010 dəfə