Uşaqların ibtidai sinfə hazırlıqlı olması üçün bağça tədrisi önəmlidir

Bakı:

15°C

88%

6m/s

Əlaqə

AZ RU EN

Ana səhifə / MEDİA / Uşaqların ibtidai sinfə hazırlıqlı olması üçün bağça tədrisi önəmlidir

Uşaqların ibtidai sinfə hazırlıqlı olması üçün bağça tədrisi önəmlidir

08.02.2022 [11:54]

Uşaq bağçalarının Təhsil Nazirliyinin tabeliyinə verilməsi bu sahədə ciddi keyfiyyət dəyişikliyi yaradacaq

Nardar BAYRAMLI

Hər bir ölkənin tərəqqisini şərtləndirən mühüm amillərdən biri təhsilin inkişafıdır. Bir çox ölkələrin təcrübəsinə nəzər saldıqda görürük ki, təhsil sahəsində sistemli və kompleks xarakterli tədbirlərin həyata keçirilməsi ümumi inkişafa xidmət edir, qarşıya qoyulan strateji hədəflərə çatmağa imkan yaradır. Bu baxımdan, təhsil sahəsində Azərbaycanın təcrübəsi də nümunəvi xarakter daşıyır. Prezident İlham Əliyevin “neft kapitalının insan kapitalına çevrilməsi” tezisi əsasında görülən genişmiqyaslı işlər ölkədə təhsil sisteminin XXI əsrin çağırışlarına uyğun inkişafını təmin edir.

Bu gün ölkəmizdə təhsilin bütün pillələrində yeni layihələrin reallaşdırılması istiqamətində mühüm addımlar atılır. Təhsil sahəsində həyata keçirilən islahatlar - təhsildə infrastrukturun yenilənməsi, maddi-texniki bazanın möhkəmləndirilməsi, ümumtəhsil məktəblərinin kadr potensialının və tədrisin keyfiyyətinin yüksəldilməsi bu baxımdan xüsusi qeyd edilməlidir. Pandemiya şəraitinə baxmayaraq, ölkəmizdə təhsil ocaqlarının tikintisi davam etdirilib, heç bir sosial layihə ixtisar olunmayıb. Ümumilikdə, ölkədə həyata keçirilən islahatlar, müasir infrastrukturun yaradılması nəticəsində təhsil sahəsində də yeni keyfiyyət dəyişiklikləri yüksək səviyyədə təmin olunub. Azərbaycanda təhsil infrastrukturunun yenilənməsi bilavasitə dövlət əsaslı vəsait qoyuluşu hesabına həyata keçirilir. Ölkəmizin iqtisadi potensialının, maliyyə imkanlarının artmasına adekvat olaraq təhsil sisteminin maddi-texniki bazasının möhkəmləndirilməsinə yönəldilən vəsaitlərin həcmi də getdikcə artırılır. Bu istiqamətdə paytaxtda və regionlarda intensiv iş aparılır.

Uşaq bağçalarının inkişafı da diqqət mərkəzindədir. Uşaq bağçalarının Təhsil Nazirliyinin tabeliyinə verilməsindən sonra bu sahədə intensiv işlər həyata keçirilir.

Mövzu ilə bağlı qəzetimizə açıqlama verən “Gənclər üçün Təhsil Mərkəzi”nin icraçı direktoru Fəxrəddin Həsənzadə bildirib ki, uşaq bağçalarının Təhsil Nazirliyinin tabeliyinə verilməsi çox əhəmiyyətlidir: “Məlumdur ki, təhsilin keyfiyyətinin artırılması baxımından məktəbəqədər təhsil önəmli pillədir. Eyni zamanda, məktəbəqədər təhsildə əhatəlilik yeni nəslin nailiyyətlərinin əsas təməllərindən biridir. Hesab edirəm ki, Təhsil Nazirliyinin tabeliyinə verilməklə uşaq bağçalarının işində ciddi keyfiyyət dəyişiklikləri baş verəcək”.

Ekspert bildirib ki, uşaq bağçaları ümumi orta təhsilin ilk pilləsi hesab edilir. Onun sözlərinə görə, uşaqlar ibtidai sinfə daha hazırlıqlı olsun deyə bağça tədrisi önəmlidir: “Erkən yaşdan məktəbəqədər təhsilə ayrılan müddət, məktəblinin, şagirdin məktəbdə aldığı dərs və həmin dərsin məzmunu çox vacibdir. Araşdırmalar göstərir ki, inkişaf etmiş ölkələrin bir çoxunda 3 yaşdan başlayaraq 100 faizlik təhsil əhatəliliyi mövcuddur. Uşaq bağçaları da uşaqları məktəbəqədər təhsil prosesinə hazırladığı üçün onların icra hakimiyyətlərinin tabeliyində olması doğru deyildi. “Təhsil haqqında” qanunda da göstərilir ki, uşaqlar məktəbə bağçadan gəlməlidir. Bu baxımdan, bağçaların Təhsil Nazirliyinə verilməsi doğru addımdır. Uşaqlarımız?? məktəbə hazırlıq dövrü məhz bağçadan başlayır. Bilavasitə Təhsil Nazirliyinin nəzarəti altında bağçaların inkişafına, təlim-tərbiyə işlərinin daha da yüksəldilməsinə nail olmaq lazımdır. Bağçaların Təhsil Nazirliyinin balansında olması, uşaqların təlim-tərbiyəsi gələcəkdə orta məktəblərə hazırlıq prosesinə müsbət təsir göstərəcək. Müasir texnologiyalara uşaqların marağının təmin olunması onların gələcəkdə yaxşı oxumasına, mütəxəssis kimi yetişəcəyinə stimul yarada bilər”.

Həmsöhbətimizin fikrincə, uşaq bağçaları icra hakimiyyətlərinin tabeliyində olarkən pedaqoqların işə qəbulu, uşaqların tədris-tərbiyə-təlimi ilə bağlı müəyyən problemlər yaranırdı: “Bir halda ki, uşaq bağçalarına pedaqoji təhsil almış şəxslər işə qəbul edilir, onun Təhsil Nazirliyinin tabeliyində olması tamamilə məntiqlidir. Biz əvvəlki dövrdə bir sıra problemlərin şahidi olmuşuq. İbtidai sinfə qəbulda uşaq bağçaları güzgü rolunu oynayır. Uşaq bağçalarında məktəbəqədər qruplar var, bu qrupların fəaliyyətindən çox şey asılıdır. Uşaq bağçalarındakı məktəbəqədər qruplar uşaqları məktəbə düzgün hazırlamalıdır. Uşaqların sağlamlığı, fiziki inkişafı, eyni zamanda məktəbə hazırlıqlı olması uşaq bağçalarından asılıdır. Ümid edirik ki, Təhsil Nazirliyi bu məsələləri tənzimləyəcək”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Elmi-kütləvi, mədəni-maarif, təhsil proqramlarının hazırlanması” istiqaməti üzrə hazırlanmışdır

Paylaş:

Baxılıb: 817 dəfə