Azərbaycan və Aİ arasında növbəti təhlükəsizlik dialoqu

Bakı:

9°C

93%

0m/s

Əlaqə

AZ RU EN

Ana səhifə / MEDİA / Azərbaycan və Aİ arasında növbəti təhlükəsizlik dialoqu

Azərbaycan və Aİ arasında növbəti təhlükəsizlik dialoqu

24.02.2022 [10:30]

Təşkilat işğaldan azad olunmuş ərazilərimizin minalardan təmizlənməsinə dəstək verəcək

Nardar BAYRAMLI

Ölkəmizlə Avropa İttifaqı (Aİ) arasında mövcud olan tərəfdaşlıq münasibətləri bütövlükdə Cənubi Qafqazın geosiyasi gələcəyi üçün çox əhəmiyyətlidir. Ötən əsrin 90-cı illərindən başlayan bu münasibətlərin dinamikası zaman-zaman fərqli olub. Aİ-nin qonşuluq siyasətinə etdiyi düzəlişlər fonunda müşahidə edilən geosiyasi dəyişikliklər Brüssel-Bakı xəttində də maraqlı yeniliklərə səbəb olmaqdadır.

44 günlük Vətən müharibəsində öz torpaqlarını işğaldan azad etməklə Azərbaycanın Cənubi Qafqazda geosiyasi mənzərəni kökündən dəyişməsi bütün qlobal güclərin regiona istiqamətlənmiş siyasətinə düzəlişlər edilməsi zərurətini ortaya qoydu. Cənubi Qafqazda bundan sonrakı proseslərdə isə regionun lideri Azərbaycanla hesablaşmaq lazım gəlir. Bu məqam Aİ-Azərbaycan münasibətlərinin hazırkı mərhələsi üçün əhəmiyyət kəsb edir. Qalib dövlət olan Azərbaycan Avropa İttifaqını mühüm tərəfdaş sayır və onunla əlaqələri inkişaf etdirmək niyyətindədir. Azərbaycan Prezidenti İlham Əliyev fevralın 21-də Avropa İttifaqının Cənubi Qafqaz üzrə xüsusi nümayəndəsi Toivo Klaarın başçılıq etdiyi nümayəndə heyətini qəbul edərkən qarşılıqlı əlaqələrin inkişafından məmnunluq ifadə edilib.

Mövzu ilə bağlı qəzetimizə açıqlama verən Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib ki, Azərbaycanla Avropa İttifaqı arasında münasibətlər uğurla inkişaf etməkdədir. Ötən illər ərzində tərəflər qarşılıqlı əlaqələrin inkişafı istiqamətində vacib addımlar atıblar. Deputat bildirib ki, Avropa İttifaqı ilə Azərbaycan arasında konstruktiv dialoq mövcuddur. Bu görüş zamanı da Prezidentimiz İlham Əliyev Prezident Şarl Mişelin Azərbaycan-Avropa İttifaqı münasibətlərinə, eləcə də Ermənistan-Azərbaycan əlaqələrinin normallaşmasına verdiyi töhfələri müsbət qiymətləndirib. Ən önəmli məqam Avropa İttifaqının münaqişədən sonra regionda dayanıqlı sülhün və təhlükəsizliyin təmin olunmasına töhfə vermək istəyidir. Bu, o deməkdir ki, Avropa İttifaqı Cənubi Qafqazda dayanıqlı sülhün təmin olunmasında maraqlıdır və bu yöndə öz töhfələrini verməyə hazırdır.

Millət vəkilinin sözlərinə görə, bütün bunlar ölkəmizin yeni şəraitdə Avropa İttifaqı ilə əməkdaşlıq münasibətlərində önəmli məqamlardır: “Bütövlükdə, Azərbaycan öz milli maraqları çərçivəsində Avropa İttifaqı ilə əməkdaşlığa böyük önəm verir. Öz növbəsində, Avropa İttifaqı da ölkəmizlə münasibətlərin inkişafında maraqlı tərəf kimi çıxış edir. Bu gün Azərbaycanla qarşılıqlı-faydalı əməkdaşlığa əsaslanan tərəfdaşlıq münasibətlərinin davam və inkişaf etdirilməsi Aİ üçün xüsusi əhəmiyyət daşıyır. Çünki Cənubi Qafqaz regionunun güc mərkəzi kimi çıxış edən, mühüm geostrateji üstünlüklərə sahib olan Azərbaycanla əməkdaşlıq siyasi və iqtisadi perspektivləri nöqteyi-nəzərindən önəmli dividentlər vəd edir. Xüsusilə qeyd edilməlidir ki, Azərbaycan Avropa İttifaqının 9 üzvü ilə strateji tərəfdaşlıq haqqında sənəd imzalayıb. Artıq Azərbaycan 44 günlük Vətən müharibəsi nəticəsində özünün ərazi bütövlüyünü bərpa edib. Bu fakt Azərbaycanın beynəlxalq müstəvidə gücünü daha da artıran amillərdən biridir. Hesab edirəm ki, Azərbaycanla Avropa İttifaqı arasında münasibətlərin inkişafında yeni reallıqlar öz əksini tapır, ölkəmizin Avropa İttifaqı üçün önəmi daha da artır. Azərbaycan bu ilin birinci yarısında Avropa İttifaqı ilə ikitərəfli saziş üzrə danışıqları bitirmək və sazişi imzalamaq niyyətindədir. Bu məqsədlə mart ayında Bakıda Azərbaycan və Avropa İttifaqı arasında növbəti təhlükəsizlik dialoqunun keçirilməsi nəzərdə tutulur”.

S.Fətəliyeva, həmçinin ötən ilin dekabr ayında Azərbaycan Prezidentinin Brüsselə səfəri zamanı önəmli görüşlər keçirdiyini xatırladıb: “Avropa İttifaqı Şurasının prezidenti Şarl Mişelin vasitəçiliyi ilə Ermənistanın baş naziri ilə görüş keçirildi. Görüşdə regionda kommunikasiyaların bərpası, sərhədlərin delimitasiyası və demarkasiyası və digər məsələlərlə bağlı geniş müzakirələr aparıldı. Bu il fevralın 4-də isə Avropa İttifaqının sədri qismində Fransanın Prezidenti Emanuel Makronun təşəbbüsü ilə Azərbaycan Prezidenti İlham Əliyev, Ermənistanın baş naziri Nikol Paşinyan və Avropa İttifaqı Şurasının prezidenti Şarl Mişelin iştirakı ilə videokonfrans formatında görüş baş tutdu. Regionda sülhün, təhlükəsizliyin və əməkdaşlığın təmin olunması üçün Avropa İttifaqının göstərdiyi bu təşəbbüslər çox faydalıdır. Azərbaycan əldə edilən bütün razılaşmalara sadiqdir. Amma Ermənistan da razılaşmalara əməl etməli, vəziyyəti gərginləşdirməyə yönəlik addımlar atmamalıdır. Aİ-nin xüsusi nümayəndəsini qəbul edərkən dövlətimizin başçısı da vurğulayıb ki, keçirilən görüşlərin nəticəsi olaraq itkin düşmüş şəxslərin taleyinin və onların basdırıldığı kütləvi məzarlıqların müəyyən edilməsi məsələsində Ermənistan tərəfi konstruktiv formada davranmalıdır. Eyni zamanda, Avropa İttifaqının işğaldan azad edilmiş ərazilərimizin minalardan təmizlənməsi işinə töhfə vermək istəyi, o cümlədən ölkəmizə 2 milyard avro güzəştli kredit ayırması da təşkilatın bölgəmizlə bağlı təşəbbüslərinin əhəmiyyətli olduğunu təsdiqləyir. Bundan əlavə, Azərbaycanla Avropa İttifaqı arasında enerji sahəsində əməkdaşlıq münasibətlərin inkişafında mühüm rol oynayır”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi” istiqaməti üzrə hazırlanmışdır

Paylaş:

Baxılıb: 712 dəfə