Azərbaycançılıq ideologiyasının yaratdığı milli birlik...

Bakı:

12°C

87%

4m/s

Əlaqə

AZ RU EN

Ana səhifə / MEDİA / Azərbaycançılıq ideologiyasının yaratdığı milli birlik...

Azərbaycançılıq ideologiyasının yaratdığı milli birlik...

16.12.2022 [10:54]

Hər bir vətəndaşımız milli maraqlarımızın qorunmasında fəal iştirakçıya çevrilib

Hər bir ölkənin inkişafını təmin edən mühüm amillərdən biri milli maraqların və xalqa məxsus milli-mənəvi dəyərlərin, milli sərvətlərin qorunmasıdır. Mütərəqqi baxışları özündə ehtiva edən milli ideologiyanın təbliği bu prosesdə mühüm rol oynayır. Çünki bu, bir tərəfdən xalqın vahid amal ətrafında sıx birləşməsini təmin edirsə, digər tərəfdən də xalqın vətənpərvərlik ruhunun yüksəldilməsinə mühüm töhfə verir. Şübhəsiz ki, bütün bu proseslərdə bir sıra subyektlərlə yanaşı, vətəndaş cəmiyyəti institutları da mühüm rol oynayırlar. Belə ki, həmin təsisatlar müxtəlif layihələr vasitəsilə vətəndaşların və bütövlükdə cəmiyyətin milli maraqlar ətrafında səfərbər olunmasına töhfə verir, ictimai həmrəyliyin və milli birliyin təmin olunmasında fəal iştirak edir. Bu kontekstdə Azərbaycan nümunəsi də müsbət örnək kimi diqqəti cəlb edir.

Məlum olduğu kimi, ölkəmizdə xalqımızı vahid amal uğrunda sıx birləşdirən milli məfkurə məhz azərbaycançılıq ideologiyasıdır. Azərbaycançılıq ideologiyası gənc nəslin tərbiyəsində, vətənə bağlılığında, milli maraqlarımızın qorunmasında mühüm əhəmiyyətə malikdir. Azərbaycançılıq, eyni zamanda, milli həmrəyliyi təmin edən mütərəqqi dəyərlər sistemidir.

Yeri gəlmişkən, dekabrın 12-dən etibarən Qarabağ iqtisadi rayonunda ekoloji terrora son qoyulması tələbi ilə Şuşa-Xankəndi yolunda keçirilən etiraz aksiyasında ekoloqlarımızla yanaşı, Azərbaycan QHT-ləri də təmsil olunurlar. Bəlli olduğu kimi, bu aksiya Rusiya sülhməramlı kontingentinin müvəqqəti yerləşdiyi ərazilərdə faydalı qazıntı yataqlarının, xüsusilə Qızılbulaq qızıl və Dəmirli mis-molibden yataqlarının qanunsuz istismarına etiraz əlaməti olaraq həyata keçirilir. Bu mənada, vətəndaş cəmiyyətinin vahid amal uğrunda birlik nümayişi olduqca təqdiredicidir. Ümumiyyətlə, Azərbaycan həqiqətlərinin dünya ictimaiyyətinə çatdırılması işində də mühüm rola malik QHT-lər 44 günlük Vətən müharibəsi dövründə öz üzərlərinə düşən vəzifələrin öhdəsindən layiqincə gəlmişdi. Həmin dövrdə ölkəmizdə fəaliyyət göstərən QHT-lərin milli həmrəylik nümayiş etdirərək işğalçı Ermənistana qarşı birgə bəyanat qəbul etməsi, beynəlxalq təşkilatlara müraciətlər ünvanlaması haqq səsimizin dünya ictimaiyyətinə çatdırılmasında mühüm rollardan birini oynadı.

Məsələ ilə bağlı fikirlərini bölüşən Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli bildirib ki, vətəndaş cəmiyyəti institutları hər zaman öz fəaliyyətlərində milli-mənəvi dəyərlərin qorunması və təbliği, milli birliyimizin gücləndirilməsi, dünya azərbaycanlıları arasında azərbaycançılıq məfkurəsinin təbliğ edilməsi kimi mühüm amilləri ön plana çəkməlidirlər. Eləcə də gənclər arasında milli vətənpərvərlik ruhunun yüksəldilməsi, o cümlədən Azərbaycan həqiqətlərinin beynəlxalq müstəvidə tanıdılması istiqamətində mütləq şəkildə davamlı iş aparılmalıdır. Bu gün ölkəmizdə vətəndaş cəmiyyətinin sağlam inkişafı üçün hər cür şərait mövcuddur. QHT-lərimiz də bütün sahələr üzrə fəal fəaliyyət nümayiş etdirməkdədir: “Gənc nəslin vətənpərvərlik ruhunda tərbiyə olunması, ordumuzun, silahlı qüvvələrimizin təbliği mövzusuna xüsusi diqqət yetirilir. Ölkəmizdə şəhid ailələri, Qarabağ müharibəsi əlilləri, müharibə veteranları, ehtiyatda olan hərbçilər, 20 Yanvar şəhidləri, əlilləri və digər istiqamətləri öz fəaliyyətində ehtiva edən QHT-lər mövcuddur. Onların fəaliyyəti üçün Azərbaycan dövləti hər bir şərait yaradıb. Eləcə də QHT-lərimiz dövlətlə sıx əməkdaşlıq edir. Şəhid ailələrinin, Qarabağ müharibəsi əlillərinin, müharibə veteranlarının problemlərinin həlli istiqamətində mütəmadi olaraq təkliflər hazırlanıb təqdim olunur. Tərxis Olunmuş Hərbçilərin Gəncləri Maarifləndirmə İctimai Birliyi də gənc nəslin vətənpərvərlik ruhunda tərbiyə olunması üçün bir çox layihələr həyata keçirir”.

Vətəndaş cəmiyyəti institutlarının Azərbaycanın milli maraqları ətrafında sıx birləşməsini yüksək qiymətləndirən E.Həsənli bu amilin dekabrın 12-dən başlayaraq Qarabağ iqtisadi rayonunda - ekoloji terrora son qoyulması tələbi ilə Şuşa-Xankəndi yolunda keçirilən etiraz aksiyasında da özünü göstərdiyini vurğulayıb. Onun sözlərinə görə, bu gün hər bir vətəndaş öz dövlətinin milli maraqlarını qorumaq üçün bütün gücünü səfərbər etməlidir. “Mən də bu aksiyada fəal şəkildə iştirak edirəm. Bu gün fəaliyyət istiqamətindən, fəaliyyət profilindən asılı olmayaraq hər bir vətəndaş cəmiyyəti institutu təmsilçisi anlayır ki, bu fəaliyyət dövlətimizin maraqlarının qorunmasına xidmət edir. Biz bu dinc aksiyamızla Azərbaycanın milli sərvətlərinin talan edilməsinə öz etirazımızı bildiririk. Və bu gün bizim sıralarımızda Azərbaycanda yaşayan bütün millətlərin nümayəndələri təmsil olunurlar. Necə ki, 44 günlük Vətən müharibəsində dinindən, dilindən, milli etnik kimliyindən asılı olmayaraq hər bir Azərbaycan vətəndaşı eyni səfdə yer alaraq Vətəni qorudu, bu gün eyni mənzərə aksiyamızda müşahidə edilir”, - deyə E.Həsənli əlavə edib.

P.İSMAYILOV

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycançılıq ideyasının təbliği” istiqaməti üzrə hazırlanmışdır

Paylaş:

Baxılıb: 470 dəfə