Rəngləri fərqli olsa da...

Bakı:

23 °C

57 %

2 m/s

Əlaqə

AZ RU EN

Ana səhifə / Maraqlı / Rəngləri fərqli olsa da...

Rəngləri fərqli olsa da...

25.07.2024 [11:15]

Beynəlxalq Afrika Mənşəli Qadınlar Günüdür

Yeganə BAYRAMOVA

Zəncirlərdə dəri rənginin nə üçün qara olduğu bir çox məqamlarda diqqətimizi çəkir. Məsələn, qaradərili birini gördükdə həmin an onların dəri rəngindən başqa saçlarına, üz cizgilərinə də fikir veririk. Lakin qaradərili insanlardakı bu fərqlilik səbəbsiz deyil. Belə ki, zəncilərin dərisində yüksək miqdarda melanin piqmenti olduğuna görə, onlar qaradərili olurlar.

Tarixən irqi ayrı-seçkilik zəminində bir çox iğtişaşlar baş verib. Bu qarşıdurmalar nəticəsində milyonlarla zənci də qurbana çevriliblər. Əslində onlara qarşı yenə də müəyyən ayrı-seçkiliyə rast gəlmək mümkündür desək, yanılmarıq.

Yeri gəlmişkən, bu gün Beynəlxalq Afrika Mənşəli Qadınlar Günü kimi qeyd olunur. Bu gün ilk dəfə 1964-cü il, iyulun 25-də siyasətçi və fəal Aoua Keytanın təşəbbüsü ilə keçirilib. İki il əvvəl, 1962-ci ildə Afrika qitəsinin hər yerindən olan qadınlar “Pan-Afrika Qadınlar Təşkilatı”nı yaratmaq üçün Dar Es Salaamda bir araya gəlmişdilər. Mədəni, etnik, irq və dil fərqlərinə baxmayaraq, məqsəd qüvvələri birləşdirmək, qaradərili qadınların da qitənin iqtisadi, sosial və siyasi inkişafına tam inteqrasiyasını təşviq etmək idi. Beləliklə, Afrika qadınlarının həyat şəraitinin yaxşılaşdırılmasına kömək etmək üçün belə bir əlamətdar günün təsis edilməsi təklif edilir.

Xatırladaq ki, 23 dekabr 2013-cü il tarixli 68/237 saylı qətnamə ilə Birləşmiş Millətlər Təşkilatının Baş Assambleyası 2015-2024-cü illəri Afrika mənşəli qadınlar üçün Beynəlxalq Onillik elan etmişdi. Ancaq statistik göstəricilərə əsasən, qaradərili qadınlara qarşı dözümsüzlük, o cümlədən onların müasir təzahürləri, bəzi hallarda isə zorakılıq yenə davam edir.

Qeyd edək ki, Beynəlxalq Afrika Mənşəli Qadınlar Günü ilə bağlı aidiyyəti təşkilatlar elm, idman, hüquq, incəsənət, siyasət və digər sahələrdə fərqlənən qaradərili qadınların əldə etdikləri uğurları təbliğ edirlər. Beləliklə, dövlətlərin ayrı-seçkiliyə əsaslanan zorakılığın kökünü kəsmək, o cümlədən Afrika əsilli insanlara, xüsusən də qadınlara qarşı bütün irqçi və ayrı-seçkilik xarakterli bəyanatların qarşısını almaq, aradan qaldırmaq, qadağan etmək və cəzalandırmaq üçün müvafiq tədbirlər görmək öhdəliyi var.

Ancaq hər birimiz ayrı-seçkiliyin bütün formalarını aradan qaldıraraq, daha inklüziv və müxtəlifliyə hörmət edən cəmiyyətlər qurmaq üçün məsuliyyət daşıyırıq. Çünki bütün xalqların, millətlərin və dinlərin dostluğu üçün istər irqi, istərsə də dini ayrı-seçkiliyin ləğvi vacibdir.

Paylaş:

Baxılıb: 773 dəfə