“Sülh naminə Daş” xatirə simvolu təqdim olunub

Bakı:

31 °C

43 %

3 m/s

Əlaqə

AZ RU EN

Ana səhifə / Mədəniyyət / “Sülh naminə Daş” xatirə simvolu təqdim olunub

“Sülh naminə Daş” xatirə simvolu təqdim olunub

17.10.2015 [13:11]

Yaponiyanın “Sülh naminə Daş Hirosima Assosiasiyası” təşkilatı və Yaponiyanın “Kyodo News” informasiya agentliyi dünyada sülhün təbliği məqsədilə “Sülh naminə Daş” adlı xatirə simvolunu Azərbaycan Respublikasına hədiyyə edib.
AZƏRTAC xəbər verir ki, oktyabrın 16-da Mədəniyyət və Turizm Nazirliyinin təşkilatçılığı ilə Azərbaycan Milli İncəsənət Muzeyində bu simvolun təqdimat mərasimi keçirilib.
Tədbirdə çıxış edən mədəniyyət və turizm naziri Əbülfəs Qarayev İkinci Dünya müharibəsindən sonra Yaponiyanın Hirosima şəhərinə atılmış atom bombasının bəşəriyyət tarixində ən böyük faciələrdən biri olduğunu söyləyib.
Nazir diqqətə çatdırıb ki, müxtəlif ictimai təşkilatlar, dövlət orqanları tərəfindən sülhün bərpa olunması naminə layihələr həyata keçirilir. “Sülh naminə Daş Hirosima Assosiasiyası” bu təşkilatlar arasında layiqli yer tutub. 1991-ci ildən bu assosiasiya müxtəlif layihələr reallaşdırır. Assosiasiyanın təşəbbüsü və Yaponiya hökumətinin dəstəyi ilə keçirilən “Sülh naminə Daş” adlı xatirə simvolunun təqdim edilməsi layihəsi bir sıra ölkələri əhatə edir. Faciənin baş verdiyi ərazidən çıxarılan daş lövhələr dünyada sülh çağırışının simvoluna çevrilib.
Nazir ölkəmizin müharibə şəraitində yaşadığını, torpaqlarının 20 faizinin düşmən tapdağı altında olduğunu vurğulayaraq Azərbaycan dövlətinin apardığı siyasətin sülhə yönəldiyini, mövcud münaqişənin sülh yolu ilə həllinə çalışdığını söyləyib.
Ə.Qarayev qeyd edib ki, “Sülh naminə Daş” simvolunun Milli İncəsənət Muzeyinin ekspozisiyasına daxil edilməsi atom faciəsi qurbanlarına hörmət rəmzi olmaqla yanaşı, Azərbaycan-Yaponiya mədəni əlaqələrinin inkişafına yeni töhfədir.
“Sülh naminə Daş Hirosima Assosiasiyası”nın sədri Michio Umemoto nəzərə çatdırıb ki, bu faciədən 70 il ötməsinə baxmayaraq, onun yaratdığı fəsadları hələ də bir çox insanlar öz üzərində daşıyırlar. Hirosima qurbanlarının xatirəsi hər il Yaponiyada dərin hüznlə yad edilir.
Michio Umemoto bu gün təqdim edilən daş lövhənin atom bombasının düşdüyü ərazidən 200 metr aralıdan çıxarıldığını qeyd edərək bildirib ki, simvolu qəbul etməyə razı olduğu üçün başda Prezident İlham Əliyev olmaqla Azərbaycan hökumətinə təşəkkür edirik. Ölkələrin bu simvolu qəbul etməsi ilə hədəf seçdiyimiz sülh çağırışı bir qədər də genişlənir.
Yaponiyanın Azərbaycandakı səfiri Tsuquo Takahaşi vətəndaşlarımızın Yaponiyaya sevgi ilə yanaşmasının onu çox sevindirdiyini dilə gətirib. O, təqdim edilən simvolun Azərbaycan ilə Yaponiya arasında dostluq münasibətlərində irəliyə atılan daha bir addım olduğunu vurğulayıb.
Sonra “Sülh naminə Daş” adlı xatirə simvolunun açılışı olub.
Azərbaycan hökuməti adından simvolun sənədini Baş nazirin müavini Elçin Əfəndiyev qəbul edib.
Tədbir iştirakçıları, həmçinin muzeydə Hirosima faciəsini əks etdirən fotosərgi ilə də tanış olublar.

Paylaş:

Baxılıb: 1181 dəfə