Akademik Milli Dram Teatrı 2017-ci ilə "Ölülər"lə start verdi

Bakı:

30 °C

47 %

2 m/s

Əlaqə

AZ RU EN

Ana səhifə / Mədəniyyət / Akademik Milli Dram Teatrı 2017-ci ilə "Ölülər"lə start verdi

Akademik Milli Dram Teatrı 2017-ci ilə "Ölülər"lə start verdi

02.02.2017 [16:09]

Yeni quruluşda nümayiş olunan səhnə əsəri böyük maraqla qarşılanıb
Azərbaycan Dövlət Akademik Milli Dram Teatrı 2017-ci ildə teatrsevərləri "Ölülər" tamaşası ilə salamlayıb. Görkəmli yazıçı və publisist Cəlil Məmmədquluzadənin "Ölülər" pyesi əsasında hazırlanmış eyniadlı ikihissəli komediya-tamaşa teatrın direktoru və bədii rəhbəri, Xalq artisti Azərpaşa Nemətin quruluşu əsasında səhnələşdirilib. Xalq artistinin sözlərinə görə, məşhur "Ölülər" tragikomediyası bədii xüsusiyyətlərinə görə dünya dramaturgiyasının klassik nümunələri sırasına daxil olub: "Böyük mütəfəkkir Cəlil Məmmədquluzadənin 1909-cu ildə yazdığı "Ölülər" komediyası ideya orijinallığı, mövzu zənginliyi ilə bərabər, bədii vasitələri, janr xüsusiyyətləri və s. cəhətlərdən də kamil bədii sənət incisidir. "Ölülər"in ilk tamaşası 1916-cı il aprelin 29-da Bakıda Hacı Zeynalabdin Tağıyevin teatrında olub. Səhnə həyatı yaşadığı ilk gündən "Ölülər" böyük maraqla qarşılanıb. Bu gün isə "Ölülər" əsəri yeni quruluşda tamaşaçıya təqdim olunub".
Yüksək zövqlə səhnələşdirilən tamaşa üçün rəngarəng dekorasiyalar hazırlanıb. Bu dəfə "Ölülər"in Şeyx Nəsrullahı Xalq artisti Nurəddin Mehdixanlı, Kefli İsgəndəri isə aktyor Anar Heybətov olub. Əsərdəki mənəvi əsarət, fanatizm və cəhalət aktyorların ifasında özünəməxsus çalarlarla açılıb. "Ölülər"dəki komizm bir xalqın taleyi ilə bağlı olan dərin ictimai uyğunsuzluğun, ölü şüurla ağıl, mənəvi korluqla gözüaçıqlıq, ifrat xurafat və fanatizmlə sağlam düşüncə, həqiqətlə mistika arasındakı dərin, barışmaz ziddiyyətin məhsuludur.
Məlumat üçün bildirək ki, tamaşada görkəmli bəstəkar Qara Qarayevin "Ölülər" əsəri üçün bəstələdiyi musiqi yeni versiyada təqdim olunub. Mədəniyyət və Turizm Nazirliyinin sifarişi ilə hazırlanan səhnə əsərinin elmi məsləhətçisi akademik İsa Həbibbəylidir.
Tamaşadan sonra izləyicilərin də fikirlərini öyrənməyə çalışdıq. Teatrsevər Mehriban Abdullayevanın sözlərinə görə, 2017-ci ilin ilk tamaşası uğurlu olub: "Azərbaycan klassik ədəbiyyatının ən görkəmli əsərlərindən biri olan "Ölülər" tragikomediyasının yenidən Milli Dram Teatrında tamaşaya qoyulması teatr aləmində önəmli hadisədir. Şeyx Nəsrullahı canlandıran Nurəddin Mehdixanlı obraza yeni çalar qatmağı bacarıb. Kefli İsgəndəri oynayan Anar Heybətov isə cavan olmağına baxmayaraq, rolunun öhdəsindən gələ bilib. Mən xüsusi olaraq, İsgəndərin atası Hacı Həsən rolunu canlandıran Kazım Abdullayevin ifasını bəyəndim. Tamaşaçı kimi onun oyunundan zövq aldım. Jest və mimikalarına, səs diapazonuna heyran qaldım. Xüsusilə də, qəbiristanlıq səhnəsindəki çıxışı, 9 yaşlı qızının siğə edilməsinə razılıq verməsi, o cümlədən qardaşının ruhunu hiss etməsi anını birəbir izləyicilərə aşılamağı bacardı. Cahil, bədbəxt, eyni zamanda, əlacsız Hacı Həsəni heç vaxt unutmayacağam. Bu obraz bir çox gerçəkliyin aynasıdır".
Əli Məcidov isə tamaşanın final səhnəsindən təsirləndiyini deyir: "Çox gözəl tamaşa idi. Aktyorların oyunu, əsərin quruluşu, hər şey çox uğurlu alınıb. Hiss olunur ki, aktyorlar bu tamaşa üzərində aylarla işləyiblər. Şeyxin qarşılanması, xüsusilə də finalda diri "Ölülərin" yerin altına girməsi məqamı tükürpədici idi".
Səhnə əsərində digər rolları xalq artistləri Laləzar Mustafayeva, Rafiq Əzimov, Hacı İsmayılov, əməkdar artistlər Kazım Abdullayev, Əjdər Həmidov, Aslan Şirin, Elşən Cəbrayılov, Əli Nur, Hicran Nəsirova, Sabir Məmmədov, Elxan Quliyev, Məzahir Cəlilov, Kazım Həsənquliyev, Firuz Xudaverdiyev, Mirzə Ağabəyli və başqaları ifa ediblər.
Qeyd edək ki, xronometrajı 130 dəqiqə olan səhnə əsərinin rejissorları Anar Sadıqov və Əlif Cahangirlidir.
Müşfiqə BAYRAMLI

Paylaş:

Baxılıb: 1130 dəfə