Türkiyə-Ermənistan sərhədləri açılacağı təqdirdə Dağlıq Qarabağ münaqişəsinin həlli uzana bilər

Bakı:

15 °C

82 %

10 m/s

Əlaqə

AZ RU EN

Ana səhifə / Müsahibə / Türkiyə-Ermənistan sərhədləri açılacağı təqdirdə Dağlıq Qarabağ münaqişəsinin həlli uzana bilər

Türkiyə-Ermənistan sərhədləri açılacağı təqdirdə Dağlıq Qarabağ münaqişəsinin həlli uzana bilər

23.10.2009 [09:24]

Bahar Muradova: İnanıram ki, Türkiyə hakimiyyəti Azərbaycana verdiyi sözü tutacaq
Milli Məclisin sədr müavini Bahar Muradovanın SİA-ya müsahibəsi:
- Bahar xanım, Türkiyə-Ermənistan yaxınlaşması və bunun fonunda Azərbaycanla münasibətlərdə yaranan vəziyyəti necə qiymətləndirirsiniz?
- Türkiyə ilə Ermənistan arasında münasibətlərin normallaşdırılması və iki ölkə arasında sərhədlərin açılması məsələsini Dağlıq Qarabağ münaqişəsinin həlli prosesindən və ümumiyyətlə, Türkiyə-Azərbaycan, Azərbaycan-Ermənistan münasibətlərindən ayrı tutmaq olmaz. Bu, Türkiyə-Ermənistan yaxınlaşması meydana çıxan gündən Azərbaycan ictimaiyyətində və rəsmi dairələrdə narahatçılıq doğurmağa başladı. Buna da normal yanaşmaq lazımdır. Türkiyə Ermənistanla sərhədlərini ona görə bağlamışdı ki, Ermənistan Azərbaycan torpaqlarının 20 faizini işğal etmişdi, 1 milyondan çox insan öz doğma torpaqlarından qovularaq qaçqın durumuna düşmüşdü. İşğal faktı aradan qalxmadan Türkiyənin belə bir siyasi kurs həyata keçirməsi bizim üçün narahatçılıq doğurmaya bilməz. Türkiyə hakimiyyəti hər zaman bildirir ki, bu protokollar Azərbaycana qarşı yönəlməyib, Dağlıq Qarabağ münaqişəsi həll edilmədən sərhədlər açılmayacaq. Amma bu söyləntilər də bizim narahatçılığımızı aradan qaldırmır. Bu, Türkiyənin qeyri-səmimi olması ilə deyil, Ermənistanın hər zaman beynəlxalq hüquq normalarına sayqısız yanaşması və qeyri-konstruktiv olması ilə bağlıdır. Türkiyə-Ermənistan sərhədləri açılacağı təqdirdə ermənilər Dağlıq Qarabağ münaqişəsinin həlli istiqamətində aparılan danışıqlarda həddən artıq maksimalist mövqe nümayiş etdirə bilərlər ki, bu da münaqişənin həllini uzada bilər. Bizim narahatçılığımız həm də Ermənistanın Türkiyəyə qarşı irəli sürdüyü ərazi iddialarından əl çəkməyəcəyi ilə bağlıdır.
- İmzalanmış protokollar Türkiyə Böyük Millət Məclisindən keçərsə, Azərbaycanın cavab addımları nə olacaq?
- Mən istəməzdim ki, Dağlıq Qarabağ münaqişəsi həll edilmədən protokollar Türkiyə Böyük Millət Məclisindən keçsin. Biz düşünürük ki, Türkiyə-Azərbaycan münasibətləri o səviyyədədir ki, ölkələrin xarici siyasəti ayrı-ayrı dövlətlərin müstəqil siyasəti kimi qiymətləndirilməsin. Bizim maraqlarımız ortaqdır, yürütdüyümüz xarici siyasət də buna paralel olmalıdır.
İnanıram ki, Türkiyə hakimiyyəti Azərbaycana verdiyi sözü tutacaq. Bu baxımdan hansısa proqnoz vermək çətindir.
- İki ölkə arasında yaşanan bayraq gərginliyi ilə bağlı nə deyə bilərsiniz?
- Azərbaycanda bayraq haqqında qanun var. Bu Qanunda Azərbaycan bayrağının və xarici ölkələrin bayraqlarının harada asılması konkret olaraq göstərilib. Mən hesab edirəm ki, biz bu Qanunun tələblərinə hər zaman əməl etməliyik. Qanuna əməl edilmədiyi halda, bax belə problemlər yaranır.
Əgər əvvəldən Qanuna ciddi şəkildə əməl olunsaydı indi bu məsələ bu səviyyədə şişirdilməzdi. Düşünürəm ki, Bursada Türkiyə-Ermənistan milli komandalarının futbol oyunu zamanı Azərbaycan bayrağına hörmətsizlik edən konkret şəxslər tapılıb cəzalandırılmalı idilər. Bu, hər kəsə ibrət olardı ki, bayraq hər bir dövlətin, xalqın milli rəmzidir və onu təhqir etmək olmaz.
- Millət vəkillərimiz Moskvada erməni parlamentarilərlə görüşəcəklər. Bu görüşün səbəbi nədir?
- Bir müddət öncə Azərbaycanın və Ermənistanın Rusiyadakı səfirlərinin təşəbbüsü ilə azərbaycanlı və erməni ziyalılar qarşılıqlı səfərlər (Azərbaycana-Dağlıq Qarabağa, Ermənistana) etmişdilər və həmin səfərlər zamanı razılaşdırılmışdı ki, növbəti dəfə azərbaycanlı və erməni deputatlar Moskvada görüşsünlər və Dəyirmi masa keçirilsin, parlamentarilər Dağlıq Qarabağ münaqişəsinin həlli ilə bağlı qarşılıqlı fikir mübadiləsi aparsınlar. Bu görüş həmin razılaşma çərçivəsində keçiriləcək.
- Müxalifət bələdiyyə seçkiləri ərəfəsində “Siyasi Partiyalar Haqqında” Qanuna dəyişikliklər edilməsini təklif edir. Buna münasibətiniz necədir?
- Müxalifət Qanunda hansısa dəyişikliklər edilməsini istəyirsə, bu dəyişiklikləri əsaslandırmalıdır. Mən hesab edirəm ki, indi bələdiyyə seçkilərinə hazırlığın elə bir mərhələsidir ki, hansısa Qanuna dəyişiklik etmək təklifindən daha çox seçkiyə ciddi hazırlaşmaq lazımdır. Sözügedən Qanun elə bir səviyyədədir ki, istənilən şəxsin, siyası partiyanın, partiyalar blokunun seçkidə iştirakını tam şəkildə təmin edir.

Paylaş:

Baxılıb: 1345 dəfə