Ermənistanın səmimiyyətinə inanmaq olmaz

Bakı:

25 °C

55 %

0 m/s

Əlaqə

AZ RU EN

Ana səhifə / Müsahibə / Ermənistanın səmimiyyətinə inanmaq olmaz

Ermənistanın səmimiyyətinə inanmaq olmaz

31.10.2009 [11:24]

Dəniz Bölükbaşı: Tarixin dərinliklərindən gələn dostluq və qardaşlıq münasibətlərimiz bu narazılıqların da arxada qoyulmasına yardımçı oldu
“Türkiyə ilə Azərbaycan iki qardaş ölkə olaraq tarixin bütün sınaqlarından üzüağ çıxıblar. Düzdür, məlum Sürix protokolunun imzalanmasından sonra müəyyən narazılıqlar yaşandı. Lakin xalqlarımızın tarixin dərinliklərindən gələn dostluq və qardaşlıq münasibətləri bu narazılıqların da arxada qoyulmasına yardımçı oldu. Milliyyətçi Hərəkat Partiyası (MHP) olaraq bu qardaşlığın bundan sonra da dünya düzənində öz sözünü deyəcəyinə inanırıq”. Bunu qəzetimizə müsahibəsində Türkiyə Böyük Millət Məclisinin MHP-dən olan üzvü Dəniz Bölükbaşı deyib.
- Bakıya bu səfəriniz sizdə hansı təəssüratı yaratdı?
- Milliyyətçi Hərəkat Partiyasının millət vəkilləri olaraq bura gəlməyimizin səbəbi Azərbaycan tərəfinin narahatlığını bölüşdüyümüzü Bakıda qardaşlarımıza bəyan etməkdir. Azərbaycanın dərindən yaralandığını görürük. ölkənizdə böyük bir narahatlıq hissi var və biz bunu təbii qarşılayırıq. MHP olaraq bizim tələbimiz bundan ibarətdir ki, AKP iqtidarı, ümumiyyətlə, protokolların parlamentdə müzakirəsini dayandırmalıdır. Daha dəqiq desək, protokollar geri qaytarılmalıdır.
- ümumiyyətlə, Türkiyə-Ermənistan yaxınlaşması məsələsində ermənilərin səmimiyyətinə inanırsınızmı?
- Əsla. Ermənistanın səmimiyyətinə inanmaq olmaz. Bizim partiyamızın məsələ ilə bağlı mövqeyi bəllidir və mən hələ Türkiyədə olarkən Azərbayan KİV-nə açıqlamamda da bəyan etmişdim ki, Ermənistanla başlayan dialoq prosesi çox təhlükəlidir. çünki Ermənistanın Konstitusiyasında və Müstəqillik Bəyannaməsində Türkiyəyə qarşı ərazi iddiaları yer alıb. Ermənistan bizim sərhədlərimizi tanımır, Türkiyənin şərq hissəsini “Qərbi Ermənistan” adlandırır, Ağrı dağını milli simvol kimi görür və beynəlxalq miqyasda Türkiyəyə qarşı qarayaxma kampaniyası aparır. Eyni zamanda, Ermənistan tərəfi bu günə kimi həmin addımlarının heç birindən imtina etməyib. Əksinə, ötən hər gün ərzində öz mövqeyini daha da sərtləşdirib. Həmin sərtləşmə özünü Ermənistan-Azərbaycan, Dağlıq Qarabağ münaqişəsinin danışıqlar prosesində də göstərib. Azərbaycan Respublikasının Prezidenti İlham Əliyevin də qeyd etdiyi kimi, Kişinyov görüşündə erməni tərəfi əvvəllər razılaşdırılmış məsələləri belə yenidən müzakirəyə çıxarmağa cəhd göstərib. Yəni, görünən odur ki, protokolların imzalanması nəinki ermənilərin işğalçılıq siyasətindən əl çəkməsinə yol açıb, əksinə, onları daha da azğınlaşdırıb. Bütün bunlardan sonra, xüsusilə də, işğal altındakı Azərbaycan torpaqları azad edilmədiyi təqdirdə Türkiyə ilə Ermənistan arasında diplomatik əlaqələrin qurulması, sərhədlərin açılması yolverilməzdir. Düşünürük ki, hakim Ədalət və İnkişaf Partiyasından olan millət vəkilləri, o cümlədən, hökumət bunu nəzərə alacaq və protokolların parlamentdən keçməsi qeyri-mümkün olacaq.
- Bəzən bu cür fikirlər səslənir ki, guya bu protokolların imzalanması və Türkiyə-Ermənistan sərhədlərinin açılması ermənilərin Türkiyəyə qarşı qondarma “soyqırımı” iddialarından əl çəkməsinə səbəb olacaq. Siz buna inanırsınızmı və ümumiyyətlə, sərhədlərin açılacağı təqdirdə, qondarma “erməni soyqırımı” ilə bağlı xaricdən edilən təzyiqlərin aradan qalxacağı nə qədər real görünür?
- Mən Xarici İşlər Nazirliyində baş hüquq müşaviri olmuşam. Ermənilərin yəhudilərin İsveçrədəki qızılları və mal-mülkləri ilə bağlı qaldırdıqları məhkəmə iddiasının eynisini Türkiyəyə qarşı tətbiq etmək istədiklərindən və bu yolla getdiklərindən xəbərim var. Yəni, bunu demək istəyirəm ki, ermənilərin bizə qarşı əsassız iddialarından əl çəkəcəklərini düşünmək sadəlövhlük olardı. Eyni zamanda, onların xaricdəki havadarlarının da bu məsələdən Türkiyəyə qarşı təzyiq vasitəsi kimi istifadədən əl çəkəcəkləri inandırıcı görünmür.
Nadir AZƏRİ

Paylaş:

Baxılıb: 1576 dəfə