Ünvanlı sosial yardım sistemi təkmilləşdiriləcək

Bakı:

25 °C

53 %

1 m/s

Əlaqə

AZ RU EN

Ana səhifə / Müsahibə / Ünvanlı sosial yardım sistemi təkmilləşdiriləcək

Ünvanlı sosial yardım sistemi təkmilləşdiriləcək

17.02.2011 [09:14]

İlqar Rəhimov: Nəzərdə tutulur ki, xüsusilə, kənd yerlərində aztəminatlı ailələrə ünvanlı yardım əvəzinə sahibkarlıq fəaliyyəti ilə məşğul olmaq üçün maliyyə dəstəyi verilsin
Azərbaycanda ünvanlı sosial yardım sisteminin təkmilləşdirilməsi istiqamətində işlər aparılır. Bu barədə jurnalistlərə müsahibəsində əmək və əhalinin sosial müdafiəsi nazirinin müavini İlqar Rəhimov məlumat verib:
- Biz bu mexanizmin əsas layihəsini işləmişik. ölkədə ünvanlı sosial yardımın verilməsi 2006-cı ildən başlanıb. Bir müddətdən sonra artıq aztəminatlı ailələrin reabilitasiyası məsələsini gündəmə gətirdik. çünki ünvanlı sosial yardımın icrası zamanı məlum oldu ki, bir çox insanlar müəyyən obyektiv səbəblərdən işləyə bilmirlər. Ona görə kasıbçılığa düçar olaraq ünvanlı yardıma ehtiyacları yaranır. Belə hallar nəzərə alınaraq biz aztəminatlı ailələrin sosial reabilitasiyası problemini qaldırdıq. İndi bununla bağlı bir çox istiqamətlər var. Milli Məclisin Sosial siyasət komitəsində müzakirə edilən sosial xidmət məsələləri də aztəminatlı ailələrin sosial reabilitasiyası ilə bağlıdır. Təcrübə göstərir ki, bir çox hallarda gənc ailə öz ailəsində olan əlilə, yaxud ahıl vətəndaşa xidmətə görə müstəqil şəkildə işləyə bilmir. Normal işə ona görə başlaya bilmir ki, evdə xidmətə ehtiyacı olan adam var. Bunun üçün biz sosial xidmət şəbəkələri yaratmalıyıq ki, həmin vətəndaşlara sosial xidmət göstərilsin və evdəkilər də işləyib ailəsini dolandıra bilsin. Hazırda sosial xidmətlə bağlı konturlar var. Bu gün evlərdə tənha ahıllara xidmət göstərilir, qocalar evləri var, amma günərzi mərkəzləri Azərbaycanda yoxdur. Belə mərkəzlər ondan ötrüdür ki, gün ərzində hansısa əlilə, ahıla baxılsın, ona xidmət göstərilsin ki, həmin ailədə iş qabiliyyəti olanlar gedib işləyə bilsinlər. Ahıl vətəndaş isə gəlib belə mərkəzlərdə gününü keçirsin, yeməyini yesin və ona orada tibbi xidmət göstərilsin. Ona əvvəllər xidmət edən oğlu, qızı və yaxud digər ailə üzvü gedib normal şəraitdə işləyə bilsin. Bunların hamısı problemlərdir və aztəminatlı ailələrin reabilitasiyası proqramının bir istiqamətidir.
ünvanlı sosial yardımın yeni mexanizmlə verilməsi də bir istiqamətdir, nəzərdə tutulur ki, xüsusilə, kənd yerlərində aztəminatlı ailələrə ünvanlı yardım əvəzinə sahibkarlıq fəaliyyəti ilə məşğul olmaq üçün maliyyə dəstəyi verilsin. Bunda da məqsəd özünədəstək, özünütəminetmədir. Əgər şərti desək, onsuz da bu gün orta hesabla hər bir ailəyə ünvanlı yardım kimi 100-110 manat vəsait ayırırıq. Orta hesabla bu il ərzində 1200-1300 manat edir. Aparılan təhlil nəticəsində, həmin vətəndaşların vəziyyətinin öyrənilməsi nəticəsində onlara yardımların birdəfəlik verilməsi və bu yardımların nəzarət altında sahibkarlıq fəaliyyətinə yönəldilməsi nəzərdə tutulur. Aztəminatlı ailə bu vəsaitlə məsələn, qoyun və inək alaraq özünə iş şəraiti yaradaraq kasıbçılıqdan çıxa bilər.
- ünvanlı sosial yardımların verilməsində müəyyən nöqsanlar da aşkarlanır. Artıq ölkədə rüşvətxorluq və korrupsiyaya qarşı ciddi mübarizə aparılır. Belə bir şəraitdə mövcud nöqsanların aradan qaldırılması istiqamətində hansı addımlar atılır?
- Bu, bizim gündəlik işimizdir. Nazirliyin bir çox fəaliyyət istiqamətləri var. Bir istiqamət də korrupsiya ilə mübarizədir. Məlumdur ki, nazirliyin xidmət şəbəkəsi və xidmət kontingenti çox genişdir. Sonuncu məlumata görə, ünvanlı dövlət sosial yardımı alan ailələrin sayı 120 mindən artıqdır, 400 minə yaxın ailə sosial müavinət alır, dövriyyədə olan daimi tibbi sosial ekspertiza komissiyasına müraciət edən əlillərin sayı 200 mindir. Bizim də məqsədimiz odur ki, bu şəbəkə idarə olunanda səmərəli idarə olunsun, vətəndaşlara yüksək səviyyədə xidmət göstərilsin. Bizim yerlərdə olan işçilər müraciət edən vətəndaşlarla münasibətlərini normal qursunlar. Bunun üçün əlimizdə kifayət qədər nəzarət mexanizmləri var. Buna baxmayaraq, neqativ hallar olur və biz həmin hallara qarşı mübarizə aparırıq. Nöqsanlara yol verənləri işdən çıxarırıq, sənədləri hüquq mühafizə orqanlarına göndəririk və digər inzibati tədbirlər görürük ki, bu, bizim daimi işimizdir.
- İlqar müəllim, Sosial Məcəllənin hazırlanması istiqamətində hansı işlər gedir?
- Hazırda bu istiqamətdə də işlər gedir. Sosial xidmət qanunu da həmin məcəllənin bir hissəsidir. Hazırda sırf sosial müdafiə ilə bağlı 15-dən artıq qanun fəaliyyətdədir, bundan başqa, əlillərin, veteranların, ahıl vətəndaşların, çoxuşaqlı ailələrin məsələləri var. İndi istəyirik ki, həmin qanunları toplayıb bir məcəllədə cəmləşdirək. İstəyirik ki, bu işi cari ilin axırına kimi yekunlaşdıraq.
- Əlilliyin verilməsi ilə bağlı yeni mexanizmlərin müəyyən edilməsi də nəzərdə tutulurmu?
- Hazırda bizim tibbi-sosail ekspert komissiyalarımızın təkmilləşdirilməsi prosesi gedir. Son zamana qədər tibbi-sosial ekspert komissiyaları zonalar üzrə fəaliyyət göstərirdi. Hər zonaya 5-6 rayon daxil idi. Lakin təhlillər onu göstərir ki, 100-120 min əhalisi olan rayonlardakı əhalinin 3-5 minini əlillər təşkil edir və bu zaman onu əhatə edən komissiyaların necə mürəkkəb şəraitdə işləməsi aydın olur. Komissiyalar hansı gərgin şəraitdə işləməlidir ki, müraciət edən vətəndaşlara xidmət göstərə bilsin. Ona görə hökumətə təklif etdik ki, Azərbaycanda 20 zona əvəzinə 38 zona üzrə tibbi-sosial ekspert komissiyası yaradılsın. Bununla biz komissiyalara imkan veririk ki, keyfiyyətli ekspert rəyləri çıxarılsın. Digər tərəfdən, əlillərin müəyyən olunması meyarlarını hazırlamışıq. Bununla meyarlar çox ciddiləşdirilir, əlilliyin müəyyən edilməsi səbəbləri daha da aydın və ciddi olur. Burada məqsəd əlilliyə meyilliyin qarşısının alınması və əlillərin reabilitasiyası şəbəkəsini genişləndirməkdir.
NARDAR

Paylaş:

Baxılıb: 1304 dəfə