Mübariz Qurbanlı: İranda Azərbaycanı sevməyən qüvvələr var

Bakı:

23 °C

56 %

9 m/s

Əlaqə

AZ RU EN

Ana səhifə / Müsahibə / Mübariz Qurbanlı: İranda Azərbaycanı sevməyən qüvvələr var

Mübariz Qurbanlı: İranda Azərbaycanı sevməyən qüvvələr var

28.03.2012 [00:29]

Gün.Az-ın Milli Məclisin Azərbaycan-İran parlamentlərarası işçi qrupunun üzvü, hakim Yeni Azərbaycan Partiyasının İcra katibinin müavini, politoloq Mübariz Qurbanlı ilə müsahibəsi:
- İranın Xarici İşlər Nazirliyi (XİN) Azərbaycanın Tehrandakı səfirini son ay ərzində üç dəfə çağırıb, bu və ya digər səbəblərdən ona nota təqdim edib və ya narazılığını ifadə edib. Rəsmi Tehranın Azərbaycan tərəfinin hərəkətlərindən narazı olmaq üçün real səbəbləri varmı, yoxsa bu digər motivlərlə izah olunur?
- İranın bəzi dairələri, təəssüf ki, Azərbaycan-İran münasibətlərinə ziyan gətirən hərəkətlərə yol veriblər. Bu dairələr müxtəlif məsələlər, hadisələr bəhanəsi altında diplomatik yollarla Azərbaycana təsir və təzyiq göstərməyə çalışdılar. Lakin, İranın tutduğu bu yol düzgün deyil. Hesab edirəm ki, İranda Azərbaycan əleyhinə bəyanatlarla çıxış edən, İran ictimaiyyətində Azərbaycanın mənfi obrazını formalaşdırmağa çalışan şəxslər düzgün yol seçməyiblər. çünki, Azərbaycan-İran münasibətlərinin inkişafı həm Azərbaycan, həm də İran üçün faydalıdır.
Qeyd edim ki, bu dairələr ümumilikdə heç İranın da milli maraqlarına cavab verməyən hərəkətlərə yol verirlər. Bu dairələr Azərbaycan-İran münasibətlərinin inkişafına mənfi təsir göstərirlər.
Bu şəxslərin məqsədi və niyyəti yalnız ictimai rəyin ölkənin daxilindən digər istiqamətə yönəldilməsindən, İran ictimaiyyətində Azərbaycan haqqında mənfi rəyin yaradılmasından ibarətdir.
- Rəsmi Bakı tərəfindən Azərbaycan ərazisində kəşfiyyat fəaliyyəti ilə məşğul olan İranın casus şəbəkəsinin ifşa edilməsinin ictimaiyyətə açıqlanmasına Tehranın narazılığı nə dərəcədə əsaslı ola bilər?
- Azərbaycan öz milli təhlükəsizliyini müdafiə edir və bundan sonra da müdafiə edəcək. Azərbaycanın bu mövqeyi qısa müddətli siyasi maraqlara deyil, milli maraqlara əsaslanır. Azərbaycanın milli maraqlarına təhlükə törədən bu və ya digər hərəkətlərə adekvat olaraq cavab veriləcək.
Bununla yanaşı, Azərbaycan tərəfindən belə cavab təhlükənin hansı ölkə və ya hansı qüvvə tərəfindən gələcəyindən asılı olaraq veriləcək. Bu Azərbaycanın suveren hüququdur. çünki, digər dövlətlər, o cümlədən İran da analoji hüquqa malikdir.
Azərbaycan başqa dövlətlərin mənafeyi üçün casus hərəkətləri həyata keçirən şəxslərin fəaliyyətini araşdırır. Belə şəxslər vaxtaşırı olaraq, Azərbaycan məhkəmələri qarşısında cavab verməli olurlar. Belə hərəkətlərin ifşa edilməsi, yaxud edilməməsi Azərbaycanın bu və ya digər ölkə ilə dostluq münasibətlərinin səviyyəsindən asılı deyil. Bununla yanaşı hesab edirəm ki, İranda siyasətin mahiyyətini dərk edən şəxslər bunu çox gözəl başa düşürlər.
Azərbaycanın öz milli təhlükəsizliyini təmin etmək istiqamətində gördüyü tədbirlər İrana, yaxud başqa bir ölkəyə qarşı yönəlməyib. Bu addımları, təkrar edirəm, İranda da başa düşməlidirlər. Belə davranışlar təkrar edirəm, ölkənin milli təhlükəsizliyinin qorunmasına yönəlib və ədalətli tədbirlərdir. Buna görə də, İranda hər bir kəs Azərbaycan-İran münasibətlərinə xələl gətirilməsinin yolverilməz olduğunu başa düşməlidir.
- Azərbaycan İran tərəfindən səsləndirilən narazılıqlara lazımi dərəcədə hərtərəfli cavab verə bildimi?
- Azərbaycan İran tərəfindən göstərilən belə bir münasibəti özü üçün yolverilməz hesab edir. Belə davranışlar, notalar Azərbaycanı bu və ya digər beynəlxalq hadisəyə qarşı tutduğu mövqedən imtina etməyə, yaxud hər hansı dövlətlə dostluq münasibətini kəsməyə vadar edə bilməz.
Azərbaycanın belə bir mövqeyi mehriban qonşuluq münasibətlərinin yoluna qoyulmasından, dövlət müstəqilliyinin möhkəmləndirilməsi səylərindən ibarətdir. Bundan əlavə, Azərbaycan tərəfindən həyata keçirilən siyasət ədalətlidir və beynəlxalq hüququn prinsiplərinə cavab verir.
- Tehranın notalarının Azərbaycan-İran münasibətlərinə soyuqluq gətirəcəyini demək olarmı?
- Azərbaycan və onun rəhbərliyi, o cümlədən, Prezident İlham Əliyev hər zaman İranla münasibətlərə diqqət yetirib. Azərbaycan hər zaman öz gücü hesabına İranla münasibətləri inkişaf etdirməyə səy göstərib.
Azərbaycan öz xarici siyasətində əsas prioritet kimi bütün qonşu ölkələrlə mehriban qonşuluq münasibətlərinin yaradılmasını üstün tutur və dünyanın bütün dövlətləri ilə ikitərəfli əlaqələrin möhkəmlənməsinə can atır. Təbii ki, Azərbaycan belə bir halda mehriban qonşuluq və dostluq münasibətləri qurmağa çalışdığı ölkələrin siyahısında Ermənistanı istisna edir.
Bu isə məlum olduğu kimi Ermənistanın Azərbaycana qarşı təcavüzü ilə əlaqədardır.

Paylaş:

Baxılıb: 1089 dəfə