Misirdə yaşayan Azərbaycan vətəndaşları Prezident İlham Əliyevin tapşırığına əsasən xüsusi təyyarə ilə Bakıya gətiriliblər

Bakı:

15 °C

94 %

1 m/s

AZ RU EN

Ana səhifə / Siyasət / Misirdə yaşayan Azərbaycan vətəndaşları Prezident İlham Əliyevin tapşırığına əsasən xüsusi təyyarə ilə Bakıya gətiriliblər

Misirdə yaşayan Azərbaycan vətəndaşları Prezident İlham Əliyevin tapşırığına əsasən xüsusi təyyarə ilə Bakıya gətiriliblər

20.08.2013 [09:01]

Xəbər verdiyimiz kimi, Misirdə baş verən hadisələrlə əlaqədar bu ölkədə yaşayan Azərbaycan vətəndaşlarının təxliyəsinin həyata keçirilməsi üçün Prezident İlham Əliyev tərəfindən respublikamızın Xarici İşlər və Fövqəladə Hallar nazirliklərinə təlimat verilib.
Azərbaycan Respublikasının Prezidenti İlham Əliyevin tapşırığına əsasən, Fövqəladə Hallar Nazirliyinə (FHN) məxsus təyyarə avqustun 18-də Bakıdan Qahirəyə yola düşüb.
AzərTAc xəbər verir ki, Misirdə yaşayan, işləyən və təhsil alan 48 Azərbaycan vətəndaşını gətirən FHN-ə məxsus təyyarə avqustun 19-da saat 14:20-də Bakıda yerə enib.
Heydər Əliyev Beynəlxalq Aeroportunda təyyarəni Azərbaycanın fövqəladə hallar nazirinin müavini, tibb xidməti general-leytenantı Faiq Tağızadə və digər şəxslər qarşılayıblar.
Azərbaycanın Misirdəki səfirliyinin müşaviri Rafael Bağırov jurnalistlərə bildirib ki, Misirdə yaranmış gərgin şəraitlə əlaqədar Prezident İlham Əliyevin təlimatı əsasında avqustun 18-də xüsusi təyyarə Azərbaycan vətəndaşlarının Misirdən təxliyə olunması üçün Qahirə şəhərinə gəlib.
Ölkədə fövqəladə vəziyyət rejiminin olduğunu bildirən Rafael Bağırov deyib ki, axşam saat 19:00-dan səhər saat 6:00-dək komendant saatıdır. Buna baxmayaraq, biz çətinliklə də olsa, vətəndaşlarımızı aeroporta yığa bildik. Şükürlər olsun ki, sağ-salamat gəlib ölkəmizə çatdıq. Bakıya gələn təyyarədə ümumilikdə 48 Azərbaycan vətəndaşı var.
O, deyib ki, səfirlik hazırda Qahirədə fəaliyyətini davam etdirir. Səfirlikdə “qaynar xətt” telefonları da elan olunub və açıqdır. Azərbaycan vətəndaşlarından orada qalanlar var. Misirdə qalan digər vətəndaşlarımızın da hissə-hissə gətirilməsi nəzərdə tutulub. Həmin vətəndaşlar səfirliyə müraciət etdikcə onların da ölkədən çıxarılmasına yardım göstəriləcək.
Müşavir vurğulayıb ki, vətəndaşlarımızın böyük əksəriyyəti yay mövsümü olduğu üçün artıq Azərbaycana dönüb. Misirdə qalan vətəndaşlarımızın bir qismi isə bu ölkə vətəndaşları ilə nikahları olanlardır.
Misirdən təxliyə olunanlar onlara göstərilən diqqət və qayğıya, eləcə də görülən təhlükəsizlik tədbirlərinə görə Azərbaycan Respublikasının Prezidenti İlham Əliyevə minnətdarlıqlarını bildiriblər.

Paylaş:

Baxılıb: 1410 dəfə