“Freedom House” və “Human Rights Watch” təşkilatları müəyyən dairələrin sifarişlərini yerinə yetirir

Bakı:

23 °C

73 %

5 m/s

AZ RU EN

Ana səhifə / Siyasət / “Freedom House” və “Human Rights Watch” təşkilatları müəyyən dairələrin sifarişlərini yerinə yetirir

“Freedom House” və “Human Rights Watch” təşkilatları müəyyən dairələrin sifarişlərini yerinə yetirir

28.01.2014 [09:14]

Əli Həsənov: Biz hər iki təşkilatın sözügedən subyektiv mülahizələrini qərəzli yanaşma və müxtəlif məqsədlər üçün Azərbaycan hakimiyyətinə və dövlətinə olan təzyiq kimi dəyərləndiririk
Bu gün dünyanın müxtəlif ölkələrində ictimai-siyasi institutların mövcud durumu, insan və vətəndaşların hüquq və azadlıqları, demokratik dəyər və prinsiplərin qorunması səviyyəsi kimi fundamental məsələləri araşdırdıqlarını iddia edən bir sıra təşkilatlar faktiki olaraq beynəlxalq münasibətlər sistemində milli dövlətlərə qarşı təzyiq qrupu qismində çıxış edirlər. Müəyyən imperialist mərkəzlərin sifariş və göstərişləri əsasında fəaliyyət göstərən bu təsisatlar özlərinin təzyiq kampaniyasını daha çox müstəqil siyasət yürüdən ölkələrə qarşı yönəltməkdədirlər. Bu sırada “Freedom House” və “Human Rights Watch” təşkilatları xüsusilə fərqlənir. Bəhs edilən təşkilatlar vaxtaşırı olaraq tərtib etdikləri hesabatlarda subyektiv və qərəzli çalarları önə çəkməklə Azərbaycanın da pozitiv beynəlxalq imicinə kölgə salmaq istəyirlər. Təbii ki, bu təsadüfi xarakter daşımır. Ümumiyyətlə, Azərbaycanın dinamik iqtisadi inkişafı, müasir beynəlxalq münasibətlər sistemində öz mövqeyini davamlı surətdə möhkəmləndirməsi ölkəmizlə tərəfdaşlıq və əməkdaşlıq münasibətlərinə malik olan ölkələrdə pozitiv təəssürat yaratsa da, bəzi dairələrdə narahatlıq hissi meydana gətirir. Məhz buna görə də həmin anti-Azərbaycan dairələri, o cümlədən “Freedom House” və “Human Rights Watch” kimi qərəzli təşkilatlar ölkəmizdəki ictimai-siyasi sabitliyi pozmaq, dövlətimizə təzyiq etmək üçün “qara-piar” kampaniyası aparırlar.
Qeyd edək ki, “Freedom House” və “Human Rights Watch” son hesabatlarında da Azərbaycana qarşı subyektiv və ədalətsiz mövqe sərgiləyiblər. Bu fakt növbəti dəfə onu göstərir ki, bəhs olunan təşkilatlar qeyri-obyektiv mövqe sərgiləməklə öz imiclərini ayaqlar altına alır və bəyan etdikləri prinsipləri kobud surətdə pozurlar. Yeri gəlmişkən, Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov bu təşkilatların hesabatları ilə bağlı mətbuata açıqlamasında qeyd edib ki, son 6-7 ildir ki, “Freedom House” və “Human Rights Watch” təşkilatları subyektiv mülahizələrini Azərbaycanın daxili inkişafı, vətəndaş cəmiyyəti quruculuğu və ictimai-siyasi münasibətləri ilə bağlı real həqiqət kimi təqdim etməyə çalışırlar: “Dəfələrlə bu təşkilatların rəhbərlərinə Azərbaycanın rəsmi dairələri, qeyri-hökumət təşkilatları, siyasi partiya və mətbuat nümayəndələri öz etirazlarını bildiriblər və onları bu qərəzli yanaşmadan əl çəkməyə çağırıblar. Ancaq çox təəssüf edirik ki, həmin təşkilatlar bu siyasətlərini yenə də davam etdirirlər”.
Əli Həsənov əlavə edib ki, bu siyasət təkcə Azərbaycanın imicinə deyil, eyni zamanda, həmin təşkilatların öz imiclərinə də ciddi xələl gətirir: “Çünki insanlar real Azərbaycanla həmin təşkilatların təqdim etmək istədiyi “Azərbaycan” arasındakı uyğunsuzluğu görəndən sonra onlara olmayan inam daha da itir. Odur ki, biz hər iki təşkilatın sözügedən subyektiv mülahizələrini qərəzli yanaşma və müxtəlif məqsədlər üçün Azərbaycan hakimiyyətinə və dövlətinə olan təzyiq kimi dəyərləndiririk. Biz indiyədək həmin təşkilatlara rəsmi müraciət ünvanladığımız kimi, yenə də müraciət edib, onları doğru yola dəvət edəcəyik”.
Beləliklə, sadalananlar deməyə əsas verir ki, beynəlxalq miqyasda “demokratiya”, “insan hüquqlarının müdafiəsi” pərdəsi altında çıxış edən “Freedom House” və “Human Rights Watch” kimi təşkilatlar, əslində, müxtəlif ölkələrə qarşı təzyiq vasitəsi rolunu oynayırlar. Bu təşkilatların fəaliyyətinin əsasında duran məqsəd isə ideoloji təzyiq və təsir vasitəsilə konkret hədəflərin yerinə yetirilməsidir. Yəni qlobal güclərin maraqları əsasında çıxış edən bu təşkilatlar nəinki beynəlxalq hüquq normalarını ayaqlar altına atır, eləcə də, milli dövlətlərin beynəlxalq müstəvidəki fəaliyyətinə kobudcasına müdaxilə edir.
NURLAN

Paylaş:

Baxılıb: 1047 dəfə