Fransa səfirliyi Leyla Yunusa tələsik viza verməsi və ölkədən getməsinə köməklik etməsi ilə bağlı izahat verməlidir

Bakı:

12 °C

87 %

6 m/s

AZ RU EN

Ana səhifə / Siyasət / Fransa səfirliyi Leyla Yunusa tələsik viza verməsi və ölkədən getməsinə köməklik etməsi ilə bağlı izahat verməlidir

Fransa səfirliyi Leyla Yunusa tələsik viza verməsi və ölkədən getməsinə köməklik etməsi ilə bağlı izahat verməlidir

30.04.2014 [08:50]

Fransa səfirliyinin bu addımı Azərbaycanın daxili işlərinə müdaxilə və “Diplomatik xidmət haqqında” 1961-ci il Vyana Konvensiyasının müddəalarının kobud şəkildə pozulması deməkdir
Aprelin 28-də Azərbaycanı tərk etməyə çalışan Sülh və Demokratiya İnstitutunun rəhbəri Leyla Yunus və həyat yoldaşı Arif Yunus Baş Prokurorluğa gətirilərək ifadə veriblər. Xatırladaq ki, həmin gün L.Yunus həbsdə olan Rauf Mirqədirovun cinayət işi ilə bağlı ifadə vermək üçün Baş Prokurorluğa dəvət olunub. L.Yunus tələb olunan vaxtda Baş Prokurorluğa gəlməyə və izahat verməyə hazır olduğunu bildirsə də, xəbərdarlığa baxmayaraq ölkəni tərk etməyə cəhd göstərib.
Bəlli olur ki, L.Yunusun bu addımı atmasında, ölkəni tərk etməyə cəhd göstərməsində ona yaxından “köməkliklər” edənlər də tapılıb. Belə ki, R.Mirqədirovun həbsindən sonra Fransanın Azərbaycandakı səfirliyi ABŞ-ın Azərbaycandakı səfirliyinin dəstəyi ilə Leyla və Arif Yunusların Azərbaycandan çıxarılması ilə bağlı xüsusi plan hazırlayıb. Aprelin 28-də 2 saat ərzində Fransanın Azərbaycandakı səfirliyi L.Yunus və A.Yunusa 5 illik viza rəsmiləşdirib.
Maraqlıdır, görəsən Fransanın Azərbaycandakı səfirliyi hansı prosedur qaydalarına “əsaslanaraq” 2 saat ərzində Leyla Yunusa və onun həyat yoldaşına 5 illik viza verib? Nəzərə alsaq ki, vizanın verilmə proseduru ən azı yarım gün çəkir, görəsən Fransa səfirliyi hansı “etiketinə” görə Leyla Yunusa xüsusi “diqqət” göstərib. Vurğulamaq lazımdır ki, Fransa səfirliyinin vətəndaşlara viza verilməsi prosedurunda Leyla Yunusun timsalında göstərdiyi ikili standart narazılıq yaradır. Yəqin ki, Fransa səfirliyinin Azərbaycan ictimaiyyətinə inandırıcı bir açıqlaması olacaq.
Digər tərəfdən, vurğulamaq lazımdır ki, Fransa səfirliyinin Leyla Yunusa 2 saat ərzində 5 illik viza “təşkil etməsi” Fransa qanunları ilə ziddiyyət təşkil edir. Güman etmək olar ki, fərqli “məziyyətlərinə” görə Leyla Yunusa 2 saata 5 illik viza verməklə hətta öz dövlətinin qanunlarını belə pozan Fransa səfirliyinin bu addımı atma səbəbləri ilə bağlı öz hökumətinə də hansısa bir açıqlaması olacaq. Çünki L.Yunusa görə öz dövlətinin qanunlarını belə pozan səfirlik bu addımı atma səbəblərini istər Azərbaycan, istərsə də Fransa ictimaiyyətinə açıqlamaq məcburiyyətindədir.
Yeri gəlmişkən, əldə etdiyimiz məlumatlara görə, Fransa səfirliyi Leyla Yunusa təkcə “yüksəksürətli” viza verməklə kifayətlənməyib. Belə ki, aprelin 28-də L.Yunus məhz Fransanın Azərbaycandakı səfirliyinin katibi və ABŞ-ın Azərbaycandakı səfirliyinin müvəqqəti işlər vəkilinin, o cümlədən, “Turan” İnformasiya Agentliyinin rəhbəri Mehman Əliyevin müşayiəti ilə hava limanına gəliblər. Hətta həmin gün Parisə birbaşa təyyarə reysi olmasına baxmayaraq, şübhə doğurmamaq üçün L.Yunus Doha (Qətərin paytaxtı) marşrutunu “seçib”. Görünür, ABŞ və Fransa səfirliklərinin nümayəndələri L.Yunus və onun həyat yoldaşının hava limanından maneəsiz keçməsini təmin etməyi öz üzərlərinə götürüblərmiş. Azərbaycan hüquq mühafizə orqanlarının müdaxiləsindən sonra bu plan baş tutmayıb, L.Yunus Baş Prokurorluğa gətirilib və ondan izahat alınıb.
İndi bir sual maraq doğurmaya bilməz. Görəsən, Fransa səfirliyini Leyla Yunusun arxasında “qarovulçu” qismində aeroporta sürükləyib gətirən hansı maraqdır? Bəyəm, Fransa səfirliyi hər bir viza verdiyi vətəndaşı Parisə qədər müşayiət edir? Yoxsa, “sürətli viza” kimi təyyarəyə qədər müşayiət də Fransa səfirliyinin sadəcə Leyla Yunusa istisnasıdır...
Əlbəttə ki, ABŞ və Fransa səfirliklərinin fəaliyyəti Azərbaycanın daxili işlərinə kobud müdaxilə və “Diplomatik xidmət haqqında” 1961-ci il Vyana Konvensiyasının müddəalarının kobud şəkildə pozulmasıdır. İstər KİV, istərsə də Azərbaycan cəmiyyəti bu diplomatik korpusların tutduqları əməllərə və göstərdikləri bu cür qanunsuz fəaliyyətlərə görə izahat tələb edir. Güman edirik ki, Fransa və ABŞ səfirlikləri öz əməkdaşlarının qeyri-qanuni əməlləri ilə bağlı izahat verəcəklər...
P.SADAYOĞLU

Paylaş:

Baxılıb: 774 dəfə