Azərbaycanın mütərəqqi xarici siyasəti regional təhlükəsizlik və qlobal inkişafa strateji töhfədir

Bakı:

12 °C

82 %

2 m/s

AZ RU EN

Ana səhifə / Siyasət / Azərbaycanın mütərəqqi xarici siyasəti regional təhlükəsizlik və qlobal inkişafa strateji töhfədir

Azərbaycanın mütərəqqi xarici siyasəti regional təhlükəsizlik və qlobal inkişafa strateji töhfədir

21.05.2014 [09:23]

Müstəqil siyasət yürütməsi, sivilizasiyalararası dialoqa mühüm töhfələr verməsi, regional və beynəlxalq təhlükəsizliyin təmin olunmasında strateji tərəfdaş qismində əhəmiyyətli rol oynaması dünya dövlətlərinin ölkəmizlə əməkdaşlığa xüsusi diqqət yetirmələrini şərtləndirir
Müstəqil xarici siyasət kursuna malik olan Azərbaycan Cənubi Qafqazın lider dövləti kimi çıxış etməklə yanaşı, müasir beynəlxalq münasibətlər sistemində etibarlı tərəfdaş kimi tanınır. Milli maraqlara müvafiq surətdə reallaşdırılan xarici siyasət sayəsində ölkəmiz həm ikitərəfli münasibətlər, həm də beynəlxalq təşkilatlar çərçivəsində səmərəli və qarşılıqlı-faydalı əməkdaşlıq əlaqələri formalaşdırıb.
Azərbaycan regional və beynəlxalq əməkdaşlığın inkişafında mühüm rol oynayır
Ümumiyyətlə, balanslaşdırılmış xarici siyasətin Prezident İlham Əliyev tərəfindən dövrün reallıqlarına, qanunauyğunluqlarına və tələblərinə müvafiq surətdə yeni keyfiyyətdə uğurla davam və inkişaf etdirilməsi Azərbaycanın beynəlxalq münasibətlər sisteminin nüfuz və güc iyerarxiyasında sürətli irəliləyişini təmin edib. Artıq Azərbaycan Cənubi Qafqazın siyasi güc mərkəzi və iqtisadi lokomotivi kimi regionun hərbi-siyasi təhlükəsizliyinin təmin olunmasına fundamental töhfələr verir.
O da qeyd edilməlidir ki, Azərbaycan özünün çoxvektorlu və balanslaşdırılmış xarici siyasət strategiyası ilə həm ikitərəfli münasibətlər kontekstində, həm də çoxşaxəli əlaqələr fonunda regional miqyaslı, qlobal xarakterli əməkdaşlıqlar platformasının mərkəzi oyunçusu rolunu oynamaqdadır. Ən əhəmiyyətlisi isə odur ki, bütün bunlar Azərbaycanın beynəlxalq mövqeyinin möhkəmlənməsinə, əməkdaşlığa əsaslanan tərəfdaşlıq münasibətlərinin inkişafına təkan verir, eyni zamanda, perspektiv nailiyyətlər üçün strateji zəmin rolunu oynayır.
Sadalananlar ölkəmizin milli maraqlarına uyğun olmaqla bərabər, Azərbaycanın suverenlik səviyyəsini, heç bir dövlətdən, təşkilatdan asılı olmadığını da təsdiq edir.
Dünya siyasətinin aparıcı aktorları, həmçinin mötəbər beynəlxalq təşkilatlar da Azərbaycanın mütərəqqi xarici siyasətini regional təhlükəsizlik və qlobal inkişafa mühüm töhfə kimi qiymətləndirirlər. Böyük Britaniyanın xarici işlər naziri Uilyam Heyq “The Business Year: Azerbaijan - 2014” jurnalına müsahibəsində bu barədə bildirib ki, Azərbaycan özünün regionda və ondan kənarda balanlaşdırılmış xarici siyasəti və tərəfdaşları ilə müsbət əlaqələri ilə yaxşı tanındığı bir vaxtda yeni tərəfdaşlar əldə etməyə və qlobal inkişafa töhfə verməyə davam edir.
Əlbəttə, müstəqil siyasət yürütməsi, sivilizasiyalararası dialoqa mühüm töhfələr verməsi, regional və beynəlxalq təhlükəsizliyin təmin olunmasında strateji tərəfdaş qismində əhəmiyyətli rol oynaması dünya dövlətlərinin ölkəmizlə əməkdaşlığa xüsusi diqqət yetirmələrini şərtləndirir.
Çoxtərəfli əməkdaşlıq əlaqələri ölkəmizin beynəlxalq mövqeyinin möhkəmlənməsini şərtləndirir
Digər tərəfdən, regionda, bütövlükdə, Avrasiya geosiyasi məkanında baş verən son mürəkkəb geosiyasi hadisələrin nəticələri bir daha göstərdi ki, həyata keçirilən balanslaşdırılmış siyasət Azərbaycanın müstəqil xarici siyasət kursunun əsasını təşkil etməklə yanaşı, ölkəmizin beynəlxalq münasibətlərdə uğurla təmsil olunmasını təmin edir. Eyni zamanda, Azərbaycan öz xarici siyasətini, ikitərəfli və çoxtərəli əlaqələrini sırf beynəlxalq hüquq normaları əsasında davam etdirir. Daha dəqiq desək, qarşılıqlı etimadı əsas götürən Azərbaycan beynəlxalq münasibətlərin milli dövlətlərin suverenliyi və milli maraqlara hörmət prinsipi əsasında inkişaf etdirilməsinin tərəfdarı kimi çıxış edir. Yəni, istər yerləşdiyi Cənubi Qafqaz regionunda, istərsə də Avrasiya geosiyasi məkanında baş verən hadisələr Azərbaycanın həm beynəlxalq hüquq normaları əsasında fəaliyyət göstərdiyini, həm də regional və qlobal təhlükəsizliyin təmin olunmasında müstəsna rol oynadığını sübuta yetirir.
Bu sırada ölkəmizin ayrı-ayrı regional və beynəlxalq təşkilatlarda uğurla təmsil olunması da xüsusilə qeyd edilməlidir. Belə ki, ayrı-ayrı ölkələrlə ticari-iqtisadi əlaqələrin dinamik templə davam etdirilməsi siyasi münasibətlərin inkişafına mühüm töhfələr verir. Eyni zamanda, Azərbaycan təmsil olunduğu beynəlxalq təşkilatlar çərçivəsində ikitərəfli və çoxşaxəli münasibətlərdə təhlükəsizlik məsələsinə xüsusi diqqət yetirir. Ölkəmiz BMT Təhlükəsizlik Şurasına sədrliyi müddətində də dünyanı narahat edən bir sıra mühüm məsələləri, təhlükəsizlik problemini müzakirəyə çıxarmaqla regional və beynəlxalq problemlərə xüsusi diqqətlə yanaşdığını növbəti dəfə nümayiş etdirdi.
Böyük Britaniyanın xarici işlər naziri Uilyam Heyq müsahibəsində bu məsələlərə də toxunub. O qeyd edib ki, Azərbaycan 150-dən çox ölkə ilə ticarət əlaqələrinə malikdir və Ümumdünya Ticarət Təşkilatı, BMT, Avropada Təhlükəsizlik və Əməkdaşlıq Təşkilatı, Qara Dəniz İqtisadi Əməkdaşlıq Təşkilatı kimi mühüm beynəlxalq təşkilatlarla əməkdaşlıq edir: “Bu ikitərəfli və çoxtərəfli əməkdaşlıq ötən il ərzində Azərbaycanın davamlı diplomatik səyləri sayəsində daha da genişlənib”.
Azərbaycanın çoxşaxəli enerji siyasəti beynəlxalq təhlükəsizliyə xidmət edir
Ölkəmizin səmərəli və mütərəqqi xarici siyasətindən bəhs edərkən o da qeyd edilməlidir ki, Azərbaycan sahib olduğu zəngin enerji ehtiyatlarından səmərəli şəkildə istifadə etməklə beynəlxalq miqyasda enerji təhlükəsizliyinin təmin edilməsində mühüm rol oynayan başlıca aktorlardan biri kimi çıxış edir. Ölkəmiz milli dövlətçilik prinsiplərinə müvafiq olaraq həyata keçirilən praqmatik siyasət nəticəsində miqyasına görə regional, əhəmiyyətinə görə isə qlobal xarakterli - transmilli layihələrin mərkəzi oyunçusu qismində çıxış edir. Azərbaycanın beynəlxalq enerji təhlükəsizliyinə verdiyi töhfələrdən danışarkən ölkəmizin iştirakı ilə gerçəkləşdirilən strateji xarakterli nəhəng layihələrdən bəhs etmək lazımdır. Bu kontekstdə son olaraq əldə edilən ən uğurlu nəticələrdən biri də “Şahdəniz-2” üzrə yekun investisiya qərarının imzalanmasıdır. “Şahdəniz-2”nin təsdiq edilməsi layihənin artıq reallaşdırılma mərhələsinə qədəm qoymasından xəbər verir. Mühüm strateji məqamlardan biri də budur ki, “Şahdəniz-2” layihəsinin gerçəkləşməsi “Cənub qaz dəhlizi” vasitəsilə “mavi yanacağ”ın Xəzər dənizindən Avropadakı bazarlara çatdırılacağı deməkdir. Bu, həm də Azərbaycanın enerji sektoruna böyük həcmdə yeni investisiyaların yatırılmasına və yeni iş yerlərinin yaradılmasına da səbəb olacaq. Uilyam Heyqin qeyd etdiyi kimi, ötən ilin dekabr ayında “Şahdəniz-2” layihəsinə başlanması da Azərbaycanın Avropa üçün ixracatçı və Mərkəzi Asiyadan enerji resurslarının mümkün tranzit nöqtəsi kimi əhəmiyyətini artırdı: “Şahdəniz-2” ölkələrimiz arasında yeni əlaqələr, əməkdaşlıq üçün yeni imkanlar və ticarət üçün yeni mənbələr yaradacaq. Bu, həmçinin Cənubi Qafqazda, Türkiyə və Avropa İttifaqında enerji təhlükəsizliyini gücləndirəcək yeni təchizat mənbələri yaradacaq. Xəzər qazının əlavə təchizatı bizim enerji təhlükəsizliyimizi, iqtisadiyyatlarımızın davamlılığını və rəqabət qabiliyyətini artıracaq”.
Nurlan QƏLƏNDƏRLİ