“Səs” media qrupunun hazırladığı “Xocalıda son gecə” filminin təqdimatı olub

Bakı:

25 °C

55 %

4 m/s

Əlaqə

AZ RU EN

Ana səhifə / Siyasət / “Səs” media qrupunun hazırladığı “Xocalıda son gecə” filminin təqdimatı olub

“Səs” media qrupunun hazırladığı “Xocalıda son gecə” filminin təqdimatı olub

27.02.2015 [01:06]

Ötən əsrin ən qanlı faciələrindən biri olan Xocalı soyqırımı bəşər tarixində silinməz iz buraxıb. Bir gecədə yer üzündən silinən Xocalı şəhərində 613 dinc sakin, o cümlədən, 63 uşaq, 106 qadın və 70 ahıl insan sırf azərbaycanlı olduqlarına görə erməni faşistləri tərəfindən xüsusi qəddarlıqla qətlə yetirilib.
AZƏRTAC xəbər verir ki, bu fikir fevralın 26-da Yeni Azərbaycan Partiyası Gənclər Birliyinin (YAP GB) ofisində “Səs” media qrupunun hazırladığı “Xocalıda son gecə” filminin təqdimat mərasimində səsləndirilib.
Tədbir iştirakçıları faciə qurbanlarının əziz xatirəsini bir dəqiqəlik sükutla yad etdikdən sonra “Xocalıda son gecə” filminə baxıblar.
“Səs” media qrupunun rəhbəri Bəhruz Quliyev tədbiri açaraq faciənin dəhşətlərinin olduğu kimi əks etdirilməsi baxımından filmin əhəmiyyətini xüsusi vurğulayıb. Xocalı soyqırımının Azərbaycan xalqının qan yaddaşı olduğunu qeyd edən B.Quliyev bu faciənin heç vaxt unudulmayacağını diqqətə çatdırıb.
Xocalı soyqırımının tariximizin ən qanlı səhifələrindən olduğunu vurğulayan Milli Məclisin sədr müavini Bahar Muradova bildirib ki, Azərbaycanın bütün sahələrdə qüdrəti artdıqca ölkəmizlə bağlı həqiqətlər də beynəlxalq ictimaiyyət tərəfindən dinlənilir, qəbul olunur. Milli Məclisin sədr müavini Xocalı faciəsini törədənlərin tezliklə ədalət məhkəməsi qarşısında cavab verməli olacaqlarını diqqətə çatdıraraq əsas fəaliyyətin bu soyqırımının hüquqi aspektlərinə yönəlməsinin vacibliyini qeyd edib.
Milli Məclisin sədr müavini Xocalı faciəsinin dəhşətlərini əks etdirən belə bir filmin hazırlanmasına görə təşəkkürünü bildirib, ölkəmizlə bağlı həqiqətlərin dünya ictimaiyyətində çatdırılması prosesində gənclərin fəallığını yüksək qiymətləndirib.
Tədbirdə Milli Məclisin deputatları Rövşən Rzayev, Kamilə Əliyeva, “Yeni Azərbaycan” qəzetinin baş redaktoru Hikmət Babaoğlu, “İki sahil” qəzetinin baş redaktoru Vüqar Rəhimzadə, YAP Siyasi Şurasının üzvü Aydın Hüseynov, Mətbuat Şurası idarə heyətinin üzvü Müşfiq Ələsgərli, Xocalı şəhərinin o vaxtkı polis rəisi Sabir Məmmədov, YAP GB-nin ofis rəhbəri Əli Pənahov və digər fəal gənclər çıxış edərək Xocalı soyqırımı ilə bağlı həqiqətlərin dünya ictimaiyyətinin diqqətinə çatdırılması, eləcə də ermənilərin xalqımıza qarşı törətdikləri qanlı qırğınların gənclərimiz tərəfindən öyrənilməsi baxımından belə təşəbbüslərin vacibliyindən danışıblar.
İdeya müəllifi Bəhruz Quliyev, rejissoru Bəxtiyar Məmmədov olan “Xocalıda son gecə” filmində soyqırımı şahidlərinin ifadələri və bu qanlı qətliamın dəhşətlərini əks etdirən görüntülər yer alıb.

Paylaş:

Baxılıb: 666 dəfə