Novruz bayramı ərəfəsində Milli Məclis Amnistiya Aktı haqqında qərar layihəsi qəbul edəcək

Bakı:

21 °C

68 %

2 m/s

Əlaqə

AZ RU EN

Ana səhifə / Siyasət / Novruz bayramı ərəfəsində Milli Məclis Amnistiya Aktı haqqında qərar layihəsi qəbul edəcək

Novruz bayramı ərəfəsində Milli Məclis Amnistiya Aktı haqqında qərar layihəsi qəbul edəcək

12.03.2009 [16:01]

Novruz bayramı ərəfəsində Milli Məclis Amnistiya Aktı haqqında daha bir qərar layihəsi qəbul edəcək. Milli Məclisin deputatı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyevanın hazırladığı “Novruz bayramı münasibətilə Amnistiya elan edilməsi haqqında” qərar layihəsi Milli Məclisin hüquq siyasəti və dövlət quruculuğu məsələləri daimi komissiyasının martın 11-də keçirilmiş iclasında müzakirə olunub. Layihədə deyilir ki, Azərbaycan xalqının ümummilli lideri Heydər Əliyevin zəngin irsini və siyasi məfkurəsini təşviq edən Heydər Əliyev Fondu ulu öndərin sosial-iqtisadi, mədəni inkişafa, dünya birliyinə inteqrasiyaya yönəlmiş siyasətinin öyrənilməsinə və bu ideyaların həyata keçirilməsinə hər zaman dəstək verir. İnsanpərvərlik, humanizm, qayğı və yardıma ehtiyacı olan insanlara kömək göstərilməsi Heydər Əliyev Fondunun fəaliyyətinin əsas qayələrindən biridir.
Heydər Əliyev Fonduna məhkum edilmiş şəxslərdən və onların ailə üzvlərindən çoxlu müraciətlərin daxil olduğu, bununla bağlı araşdırmaların aparıldığı və həmin insanlara münasibətdə mərhəmət göstərilməsi zərurəti vurğulanıb. ümummilli liderin humanist siyasətinə sədaqət nümayiş etdirilərək Azərbaycan xalqının firavanlıq, əmin-amanlıq və mərhəmət rəmzi olan milli bayramı - Novruz bayramı münasibətilə amnistiyanın elan edilməsi təşəbbüsü irəli sürülür.
Müzakirələr zamanı deputatlar bu addımı Azərbaycan vətəndaşının hüquqlarının qorunması istiqamətində həyata keçirilən dövlət siyasətinin tərkib hissəsi və humanizm prinsiplərinin qorunub saxlanması kimi xarakterizə edərək yüksək qiymətləndiriblər.
Komissiyanın sədri Əli Hüseynov layihənin qanunvericilik baxımından mükəmməl hazırlandığını deyib və bildirib ki, əvvəlkindən fərqli olaraq, bu dəfə Amnistiya Aktının əhatə dairəsi daha geniş olacaq.
Qeyd olunub ki, Novruz bayramı ərəfəsində minlərlə ailəni sevindirəcək qərar layihəsi bütün sosial təbəqələri əhatə edir. Amnistiya Aktı layihəsinə əsasən böyük ictimai təhlükə törətməyən və bir sıra az ağır cinayətlərə görə məhkum edilmiş qadınlar, cinayət törədərkən 18 yaşına çatmayanlar, birinci və ya ikinci qrup əlillər, 60 yaşına çatmış kişilər, öhdəsində yetkinlik yaşına çatmayan, yaxud birinci və ya ikinci qrup əlil övladı olanlar və bəzi digər kateqoriyadan olan şəxslər azadlıqdan məhrumetmə cəzasından azad ediləcəklər.
Həmçinin azadlıqdan məhrum edilmiş və cəzalarının bitməsinə bir il qalmış qadınlara və altı ay qalmış kişilərə, islah işləri, ictimai işlər cəzasına məhkum edilmiş bütün şəxslərə, habelə cərimə cəzasına məhkum edilmiş, cəzasının çəkilməsi təxirə salınmış, şərti məhkum edilmiş və digər qruplara daxil olan bir sıra məhkumlara amnistiya tətbiq etməklə, onların cəzadan azad olunmaları təklif edilir. Aparılan təhlillərə əsasən təqribən 9 min şəxsin Amnistiya Aktının təsiri altına düşməsi nəzərdə tutulub. Təqribən 1700 məhkumun azadlıqdan məhrumetmə yerlərindən azad edilməsi gözlənilir. Qərar layihəsi qüvvəyə mindiyi gündən 4 ay müddətində tam icra olunmalıdır. Amnistiya Aktı haqqında qərar layihəsi Milli Məclisin martın 17-də keçiriləcək iclasında müzakirə olunacaq.

Paylaş:

Baxılıb: 1709 dəfə